Кніга Псальмаў, псальм 100

Псальм падзякі. Усклікай ГОСПАДУ, ўся зямля! Служыце ГОСПАДУ з радасьцю, прыходзьце прад аблічча Ягонае з хвалою! Ведайце, што ГОСПАД ёсьць Бог! Ён нас зрабіў, і мы — Ягоныя, народ Ягоны і авечкі чарады Ягонай. Уваходзьце ў брамы Ягоныя з падзякай, у панадворкі Ягоныя — з праслаўленьнем! Слаўце Яго, дабраслаўляйце імя Ягонае! Бо добры ёсьць ГОСПАД, на вякі міласэрнасьць Ягоная і з пакаленьня ў пакаленьне вернасьць Ягоная!