Mat Matthew, chapter The Gospel According to Matthew, chapter 25

Тогда́ уподо́бися ца́рствие небе́сное десяти́м де́вам, я́же прия́ша свети́льники своя́, и изыдо́ша в сре́тение жениху́.

Пять же бе от них мудры́, и пять юро́дивы.

Юро́дивыя же прие́мше свети́льники своя́, не взя́ша с собо́ю еле́а.

Му́дрыя же прия́ша еле́й в сосу́дех, со свети́льники свои́ми.

Косня́щу же жениху́, воздрема́шася вся, и спа́ху.

Полу́нощи же вопль бысть: се жени́х гряде́т, исходи́те в сре́тение его́.

Тогда́ воста́вше вся де́вы ты́я, и украси́ша свети́льники своя́.

Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют.

Отвеща́ша же му́дрыя, глаго́люще: еда́ ка́ко не доста́нет нам и вам: иди́те же па́че к продаю́щым, и купи́те себе́.

Иду́щым же им купи́ти, прии́де жени́х, и гото́выя внидо́ша с ним на бра́ки: и затворе́ны бы́ша две́ри.Luk 13:25

Последи́ же приидо́ша и про́чыя де́вы, глаго́люще: го́споди, го́споди, отве́рзи нам.Mat 7:21

Он же отвеща́в, рече́ им: ами́нь глаго́лю вам, не вем вас.Psa 5:5; Hab 1:13

Бди́те у́бо, я́ко не ве́сте дне, ни часа́, во́ньже сын челове́ческий прии́дет.Mrk 13:33; 1Co 16:13

Я́коже бо челове́к не́кий отходя́ призва́ своя́ рабы́, и предаде́ им име́ние свое́.Luk 19:12

И о́вому у́бо даде́ пять тала́нт, о́вому же два, о́вому же еди́н, кому́ждо проти́ву си́лы его́: и оти́де а́бие.Rom 12:6; 1Co 12:7; 1Co 12:11

Шед же прие́мый пять тала́нт, де́ла в них, и сотвори́ други́я пять тала́нт.

Та́кожде и и́же два, приобре́те и той друга́я два.

Прие́мый же еди́н, шед вкопа́ его́ в зе́млю, и скры сребро́ господи́на своего́.

По мно́зе же вре́мени прии́де господи́н раб тех, и стяза́ся с ни́ми о словеси́.

И присту́пль пять тала́нт прие́мый, принесе́ други́я пять тала́нт, глаго́ля: го́споди, пять тала́нт ми еси́ пре́дал, се други́я пять тала́нт приобрето́х и́ми.

Рече́ же ему́ госпо́дь его́: до́брый ра́бе, благи́й и ве́рный, о ма́ле был еси́ ве́рен, над мно́гими тя поста́влю: вни́ди в ра́дость го́спода твоего́.Isa 61:7

Присту́пль же и и́же два тала́нта прие́мый, рече́: го́споди, два тала́нта ми еси́ пре́дал, се друга́я два тала́нта приобрето́х и́ма.

Рече́ же ему́ госпо́дь его́: до́брый ра́бе, благи́й и ве́рный, о ма́ле ми был еси́ ве́рен, над мно́гими тя поста́влю: вни́ди в ра́дость го́спода твоего́.

Присту́пль же и прие́мый еди́н тала́нт, рече́: го́споди, ве́дях тя, я́ко же́сток еси́ челове́к: жне́ши, иде́же не се́ял еси́, и собира́еши, ю́дуже не расточи́л еси́:

И убоя́вся шед скрых тала́нт твой в земли́, и се и́маши твое́.

Отвеща́в же госпо́дь его́, рече́ ему́: лука́вый ра́бе и лени́вый, ве́дяше, я́ко жну, иде́же не се́ях, и собира́ю, ю́дуже не расточи́х:

Подоба́ше у́бо тебе́ вда́ти сребро́ мое́ торжнико́м, и прише́д аз взял бых свое́ с ли́хвою.

Возми́те у́бо от него́ тала́нт, и дади́те иму́щему де́сять тала́нт.

Иму́щему бо везде́ дано́ бу́дет, и преизбу́дет: от неиму́щаго же, и е́же мни́тся име́я, взя́то бу́дет от него́.Mat 13:12; Mrk 4:25; Luk 8:18; Luk 19:26

И неключи́маго раба́ вве́рзите во тму кроме́шнюю: ту бу́дет плачь и скре́жет зубо́м. сия́ глаго́ля возгласи́: име́яй у́ши слы́шати, да слы́шит.Mat 24:51

Егда́ же прии́дет сын челове́ческий в сла́ве свое́й, и вси святи́и а́нгели с ним, тогда́ ся́дет на престо́ле сла́вы своея́:Mat 13:49; Mat 16:27; Act 1:11

И соберу́тся пред ним вси язы́цы, и разлучи́т их друг от дру́га, я́коже па́стырь разлуча́ет о́вцы от ко́злищ.

И поста́вит о́вцы одесну́ю себе́, а ко́злища ошу́юю.

Тогда́ рече́т царь су́щым одесну́ю его́: прииди́те благослове́ннии отца́ моего́, насле́дуйте угото́ванное вам ца́рствие от сложе́ния ми́ра.Mat 20:23

Взалка́хся бо, и да́сте ми я́сти: возжада́хся, и напои́сте мя: стра́нен бех, и введо́сте мене́:Isa 58:7; Ezk 18:7; 2Ti 1:18

Наг, и оде́ясте мя: бо́лен, и посети́сте мене́: в темни́це бех, и приидо́сте ко мне.

Тогда́ отвеща́ют ему́ пра́ведницы, глаго́люще: го́споди, когда́ тя ви́дехом а́лчуща, и напита́хом? или́ жа́ждуща, и напои́хом?

Когда́ же тя ви́дехом стра́нна, и введо́хом? или́ на́га, и оде́яхом?

Когда́ же тя ви́дехом боля́ща, или́ в темни́це, и приидо́хом к тебе́?

И отвеща́в царь рече́т им: ами́нь глаго́лю вам, поне́же сотвори́сте еди́ному сих бра́тий мои́х ме́ньших, мне сотвори́сте.Pro 14:31; Pro 19:17; Mat 10:42

Тогда́ рече́т и су́щым ошу́юю его́: иди́те от мене́ прокля́тии ко огнь ве́чный, угото́ванный диа́волу и а́ггелом его́.Psa 6:9; Luk 13:27

Взалка́хся бо, и не да́сте ми я́сти: возжада́хся, и не напои́сте мене́.

Стра́нен бех, и не введо́сте мене́: наг, и не оде́ясте мене́: бо́лен, и в темни́це, и не посети́сте мене́.

Тогда́ отвеща́ют ему́ и ти́и, глаго́люще: го́споди, когда́ тя ви́дехом а́лчуща, или́ жа́ждуща, или́ стра́нна, или́ на́га, или́ бо́льна, или́ в темни́це, и не послужи́хом тебе́?

Тогда́ отвеща́ет им, глаго́ля: ами́нь глаго́лю вам, поне́же не сотвори́сте еди́ному сих ме́ньших, ни мне сотвори́сте.

И и́дут си́и в му́ку ве́чную, пра́ведницы же в живо́т ве́чный.Dan 12:2; Jhn 5:29