Jhn John, chapter The Gospel According to John, chapter 12

Иису́с же пре́жде шести́ дний па́схи прии́де в вифа́нию, иде́же бе ла́зарь уме́рый, его́же воскреси́ от ме́ртвых.Mat 26:6; Mrk 14:3; Jhn 11:2

Сотвори́ша же ему́ ве́черю ту, и ма́рфа служа́ше: ла́зарь же еди́н бе от возлежа́щих с ним.Luk 10:40

Мари́а же прие́мши ли́тру ми́ра на́рда писти́ка многоце́нна, пома́за но́зе иису́сове, и отре́ власы́ свои́ми но́зе его́: хра́мина же испо́лнися от вони́ ма́сти (благово́нныя).

Глаго́ла же еди́н от учени́к его́, иу́да си́монов искарио́тский, и́же хотя́ше его́ преда́ти:

чесо́ ра́ди ми́ро сие́ не про́дано бысть на трие́х стех пе́нязь и дано́ ни́щым?

Сие́ же рече́, не я́ко о ни́щих печа́шеся, но я́ко тать бе, и ковче́жец име́яше, и вмета́емая ноша́ше.Jhn 13:29

Рече́ же иису́с: не де́йте ея́, да в день погребе́ния моего́ соблюде́т е:

ни́щыя бо всегда́ и́мате с собо́ю, мене́ же не всегда́ и́мате.Deu 15:11

Разуме́ же наро́д мног от иуде́й, я́ко ту есть: и приидо́ша не иису́са ра́ди то́кмо, но да и ла́заря ви́дят, его́же воскреси́ от ме́ртвых.

Совеща́ша же архиере́е, да и ла́заря убию́т,

я́ко мно́зи его́ ра́ди идя́ху от иуде́й и ве́роваху во иису́са.

Во у́трий (же) день наро́д мног прише́дый в пра́здник, слы́шавше, я́ко иису́с гряде́т во иерусали́м,

прия́ша ва́иа от фи́ник, и изыдо́ша в сре́тение ему́, и зва́ху (глаго́люще): оса́нна, благослове́н гряды́й во и́мя го́сподне, царь изра́илев.Mat 21:8; Mrk 11:8; Luk 19:36

Обре́т же иису́с осля́, все́де на не, я́коже есть пи́сано:

не бо́йся, дщи сио́ня: се царь твой гряде́т, седя́ на жребя́ти о́сли.Zec 9:9; Isa 62:11; Mat 21:5

Сих же не разуме́ша ученицы́ его́ пре́жде: но егда́ просла́вися иису́с, тогда́ помяну́ша, я́ко сия́ бы́ша о нем пи́сана, и сия́ сотвори́ша ему́.

Свиде́телствоваше у́бо наро́д, и́же бе (пре́жде) с ним, егда́ ла́заря возгласи́ от гро́ба и воскреси́ его́ от ме́ртвых:

сего́ ра́ди и сре́те его́ наро́д, я́ко слы́шаша его́ сие́ сотво́рша зна́мение.

Фарисе́е у́бо ре́ша к себе́: ви́дите, я́ко ника́яже по́льза есть? се мир по нем и́дет.

Бя́ху же не́цыи е́ллини от прише́дших, да покло́нятся в пра́здник:

си́и у́бо приступи́ша к фили́ппу, и́же бе от вифсаи́ды галиле́йския, и моля́ху его́, глаго́люще: го́споди, хо́щем иису́са ви́дети.

Прии́де фили́пп и глаго́ла андре́ови: и па́ки андре́й и фили́пп глаго́ласта иису́сови.

Иису́с же отвеща́ и́ма, глаго́ля: прии́де час, да просла́вится сын челове́ческий:

ами́нь, ами́нь глаго́лю вам: а́ще зе́рно пшени́чно пад на земли́ не у́мрет, то еди́но пребыва́ет: а́ще же у́мрет, мног плод сотвори́т:

любя́й ду́шу свою́, погуби́т ю: и ненави́дяй души́ своея́ в ми́ре сем, в живо́т ве́чный сохрани́т ю:Mat 10:39; Mrk 8:35; Luk 9:24; Luk 14:27

а́ще кто мне слу́жит, мне да после́дствует: и иде́же есмь аз, ту и слуга́ мой бу́дет: и а́ще кто мне слу́жит, почти́т его́ оте́ц мой:Jhn 17:24

ны́не душа́ моя́ возмути́ся и что реку́? О́тче, спаси́ мя от часа́ сего́: но сего́ ра́ди приидо́х на час сей:Mat 26:38; Heb 5:7

о́тче, просла́ви и́мя твое́. Прии́де же глас с небесе́: и просла́вих, и па́ки просла́влю.

Наро́д же стоя́й и слы́шав, глаго́лаху: гром бысть. Ини́и глаго́лаху: а́нгел глаго́ла ему́.

Отвеща́ иису́с и рече́: не мене́ ра́ди глас сей бысть, но наро́да ра́ди:

ны́не суд есть ми́ру сему́: ны́не князь ми́ра сего́ изгна́н бу́дет вон:Jhn 14:30; Jhn 16:11

и а́ще аз вознесе́н бу́ду от земли́, вся привлеку́ к себе́.Jhn 3:14

Сие́ же глаго́лаше, назна́менуя, ко́ею сме́ртию хотя́ше умре́ти.

Отвеща́ ему́ наро́д: мы слы́шахом от зако́на, я́ко христо́с пребыва́ет во ве́ки: ка́ко ты глаго́леши: вознести́ся подоба́ет сы́ну челове́ческому? кто есть сей сын челове́ческий?2Sa 7:13; Psa 88:37; Isa 9:7; Ezk 37:25; Dan 2:44; Dan 7:14; Mic 5:2; Luk 1:33

Рече́ же им иису́с: еще́ ма́ло вре́мя свет в вас есть: ходи́те, до́ндеже свет и́мате, да тма вас не и́мет: и ходя́й во тме не весть, ка́мо и́дет:

до́ндеже свет и́мате, ве́руйте во свет, да сы́нове све́та бу́дете. Сия́ глаго́ла иису́с, и отше́д скры́ся от них.

Толи́ка же зна́мения сотво́ршу ему́ пред ни́ми, не ве́роваху в него́,

да сбу́дется сло́во иса́ии проро́ка, е́же рече́: го́споди, кто ве́рова слу́ху на́шему? и мы́шца го́сподня кому́ откры́ся?Isa 53:1; Rom 10:16

Сего́ ра́ди не можа́ху ве́ровати, я́ко па́ки рече́ иса́иа:

ослепи́ о́чи их, и ока́менил есть сердца́ их, да не ви́дят очи́ма, ни разуме́ют се́рдцем, и обратя́тся, и исцелю́ их.Isa 6:9; Mat 13:14; Mrk 4:12; Luk 8:10; Act 28:26; Rom 11:8

Сия́ рече́ иса́иа, егда́ ви́де сла́ву его́ и глаго́ла о нем.

Оба́че у́бо и от князь мно́зи ве́роваша в него́: но фарисе́й ра́ди не испове́доваху, да не из со́нмищ изгна́ни бу́дут:

возлюби́ша бо па́че сла́ву челове́ческую, не́же сла́ву бо́жию.Jhn 5:44

Иису́с же воззва́ и рече́: ве́руяй в мя не ве́рует в мя, но в посла́вшаго мя:

и ви́дяй мя ви́дит посла́вшаго мя:

аз свет в мир приидо́х, да всяк ве́руяй в мя во тме не пребу́дет:Jhn 3:19

и а́ще кто услы́шит глаго́лы моя́ и не ве́рует, аз не сужду́ ему́: не приидо́х бо, да сужду́ ми́рови, но да спасу́ мир:Jhn 3:17

отмета́яйся мене́ и не прие́мляй глаго́л мои́х и́мать судя́щаго ему́: сло́во, е́же глаго́лах, то су́дит ему́ в после́дний день:Mrk 16:16

я́ко аз от себе́ не глаго́лах: но посла́вый мя оте́ц, той мне за́поведь даде́, что реку́ и что возглаго́лю:Jhn 14:10

и вем, я́ко за́поведь его́ живо́т ве́чный есть: я́же у́бо аз глаго́лю, я́коже рече́ мне оте́ц, та́ко глаго́лю.