Jhn John, chapter The Gospel According to John, chapter 13

Пре́жде же пра́здника па́схи, ве́дый иису́с, я́ко прии́де ему́ час, да пре́йдет от ми́ра сего́ ко отцу́, возлю́бль своя́ су́щыя в ми́ре, до конца́ возлюби́ их.Mat 26:2; Mrk 14:1

И ве́чери бы́вшей, диа́волу уже́ вложи́вшу в се́рдце иу́де си́монову искарио́тскому, да его́ преда́ст,

ве́дый иису́с, я́ко вся даде́ ему́ оте́ц в ру́це, и я́ко от бо́га изы́де и к бо́гу гряде́т:Mat 11:27; Mat 28:18

воста́ от ве́чери, и положи́ ри́зы, и прие́м ле́нтион, препоя́сася:Luk 17:8; Luk 22:27

пото́м влия́ во́ду во умыва́лницу, и нача́т умыва́ти но́ги ученико́м и отира́ти ле́нтием, и́мже бе препоя́сан.

Прии́де же к си́мону петру́, и глаго́ла ему́ той: го́споди, ты ли мои́ умы́еши но́зе?

Отвеща́ иису́с и рече́ ему́: е́же аз творю́, ты не ве́си ны́не, уразуме́еши же по сих.

Глаго́ла ему́ петр: не умы́еши но́гу мое́ю во ве́ки. Отвеща́ ему́ иису́с: а́ще не умы́ю тебе́, не и́маши ча́сти со мно́ю.

Глаго́ла ему́ си́мон петр: го́споди, не но́зе мои́ то́кмо, но и ру́це и главу́.

Глаго́ла ему́ иису́с: измове́нный не тре́бует, то́кмо но́зе умы́ти, есть бо весь чист: и вы чи́сти есте́, но не вси.Jhn 15:3

Ве́дяше бо предаю́щаго его́: се́го ра́ди рече́, я́ко не вси чи́сти есте́.

Егда́ же умы́ но́ги их, прия́т ри́зы своя́, возле́г па́ки, рече́ им: ве́сте ли, что сотвори́х вам?

Вы глаша́ете мя учи́теля и го́спода: и до́бре глаго́лете, есмь бо.1Co 8:6; 1Co 12:3; Php 2:11

А́ще у́бо аз умы́х ва́ши но́зе, госпо́дь и учи́тель, и вы до́лжни есте́ друг дру́гу умыва́ти но́зе:

о́браз бо дах вам, да, я́коже аз сотвори́х вам, и вы твори́те.

Ами́нь, ами́нь глаго́лю вам: несть раб бо́лий го́спода своего́, ни посла́нник бо́лий посла́вшаго его́.Mat 10:24; Luk 6:40; Jhn 15:20

А́ще сия́ ве́сте, блаже́ни есте́, а́ще творите́ я.

Не о всех вас глаго́лю: аз (бо) вем, и́хже избра́х: но да писа́ние сбу́дется: яды́й со мно́ю хлеб воздви́же на мя пя́ту свою́.Psa 40:10; Act 1:16

Отсе́ле глаго́лю вам, пре́жде да́же не бу́дет, да, егда́ бу́дет, ве́ру и́мете, я́ко аз есмь.Jhn 14:29

Ами́нь, ами́нь глаго́лю вам: прие́мляй, а́ще кого́ послю́, мене́ прие́млет: а прие́мляй мене́ прие́млет посла́вшаго мя.Mat 10:40; Luk 10:16

Сия́ рек иису́с возмути́ся ду́хом и свиде́телствова и рече́: ами́нь, ами́нь глаго́лю вам, я́ко еди́н от вас преда́ст мя.Mat 26:21; Mrk 14:18; Luk 22:21

Сзира́хуся у́бо между́ собо́ю ученицы́, недоуме́ющеся, о ком глаго́лет.

Бе же еди́н от учени́к его́ возлежя́ на ло́не иису́сове, его́же любля́ше иису́с:Jhn 21:20

поману́ же сему́ си́мон петр вопроси́ти, кто бы был, о не́мже глаго́лет.

Напа́д же той на пе́рси иису́совы, глаго́ла ему́: го́споди, кто есть?

Отвеща́ иису́с: той есть, ему́же аз омочи́в хлеб пода́м. И омо́чь хлеб, даде́ иу́де си́монову искарио́тскому.

И по хле́бе тогда́ вни́де в онь сатана́. Глаго́ла у́бо ему́ иису́с: е́же твори́ши, сотвори́ ско́ро.

Се́го же никто́же разуме́ от возлежа́щих, к чесому́ рече́ ему́.

Не́цыи же мня́ху, поне́же ковче́жец имя́ше иу́да, я́ко глаго́лет ему́ иису́с: купи́, е́же тре́буем на пра́здник: или́ ни́щым да не́что даст.

Прии́м же он хлеб, а́бие изы́де: бе же нощь. Егда́ изы́де,

глаго́ла иису́с: ны́не просла́вися сын челове́ческий, и бог просла́вися о нем:Jhn 12:23

а́ще бог просла́вися о нем, и бог просла́вит его́ в себе́, и а́бие просла́вит его́.

Ча́дца, еще́ с ва́ми ма́ло есмь: взы́щете мене́, и я́коже рех иуде́ом, я́ко а́може аз иду́, вы не мо́жете приити́: и вам глаго́лю ны́не.Jhn 7:34; Jhn 8:21

За́поведь но́вую даю́ вам, да лю́бите друг дру́га: я́коже возлюби́х вы, да и вы лю́бите себе́:Jhn 15:12; 1Jn 3:11; 1Th 4:9

о сем разуме́ют вси, я́ко мои́ ученицы́ есте́, а́ще любо́вь и́мате между́ собо́ю.

Глаго́ла ему́ си́мон петр: го́споди, ка́мо и́деши? Отвеща́ ему́ иису́с: а́може (аз) иду́, не мо́жеши ны́не по мне ити́: последи́ же по мне и́деши.

Глаго́ла ему́ петр: го́споди, почто́ не могу́ ны́не по тебе́ ити́? ны́не ду́шу мою́ за тя положу́.

Отвеща́ ему́ иису́с: ду́шу ли твою́ за мя положи́ши? ами́нь, ами́нь глаго́лю тебе́: не возгласи́т але́ктор, до́ндеже отве́ржешися мене́ три́щи.Mat 26:34; Mrk 14:30; Luk 22:34