1Th 1 Thessalonians, chapter First Epistle to the Thessalonians, chapter 3

Те́мже уже́ не терпя́ще, благоволи́хом оста́тися во афи́нех еди́ни,

и посла́хом тимофе́а, бра́та на́шего и служи́теля бо́жия и споспе́шника на́шего во благове́стии христо́ве, утверди́ти вас и уте́шити о ве́ре ва́шей,Act 16:1

я́ко ни еди́ному смуща́тися в ско́рбех сих: са́ми бо ве́сте, я́ко на сие́ и́стое лежи́м.2Ti 3:12

И́бо егда́ у вас бе́хом, предреко́хом вам, я́ко и́мамы скорбе́ти, е́же и бысть, и ве́сте.

Сего́ ра́ди и аз ктому́ не терпя́, посла́х разуме́ти ве́ру ва́шу, да не ка́ко искуси́л вы искуша́яй, и вотще́ бу́дет труд наш.

Ны́не же прише́дшу тимофе́ю к нам от вас и благовести́вшу нам ве́ру ва́шу и любо́вь, и я́ко и́мате па́мять о нас бла́гу, всегда́ жела́юще нас ви́дети, я́коже и мы вас:

сего́ ра́ди уте́шихомся, бра́тие, о вас, во вся́кой ско́рби и нужде́ на́шей, ва́шею ве́рою:

я́ко мы ны́не жи́ви есмы́, а́ще вы стои́те о го́споде.

Ко́е бо благодаре́ние бо́гу мо́жем возда́ти о вас, о вся́кой ра́дости, е́юже ра́дуемся вас ра́ди пред бо́гом на́шим,

нощь и день преизли́ха моля́щеся ви́дети лице́ ва́ше и соверши́ти лише́ние ве́ры ва́шея?Rom 1:10

Сам же бог и оте́ц наш и госпо́дь наш иису́с христо́с да испра́вит путь наш к вам.

Вас же госпо́дь да умно́жит и да избы́точествит любо́вию друг ко дру́гу и ко всем, я́коже и мы к вам,

во е́же утверди́ти сердца́ ва́ша непоро́чна в святы́ни пред бо́гом и отце́м на́шим, в прише́ствие го́спода на́шего иису́са христа́ со все́ми святы́ми его́. Ами́нь.1Co 1:8; Php 1:10; 1Th 5:23