Мц Мацвея, раздзел Паводле Мацвея Святое Дабравесце, раздзел 24
І, выйшаўшы, Ісус ішоў ад сьвятыні; і падыйшлі вучні Ягоныя, каб паказаць Яму пабудовы сьвятыні.Мк 13:1; Лк 21:5
А Ісус сказаў ім: «Ці бачыце ўсё гэтае? Сапраўды кажу вам: не застанецца тут камяня на камяні, які б ня быў зруйнаваны».Мк 13:2; Лк 19:44; Лк 21:6
А калі сядзеў Ён на гары Аліўнай, падыйшлі да Яго вучні насамоце, кажучы: «Скажы нам, калі гэта будзе, і які знак Твайго прыйсьця і сканчэньня веку?»
І, адказваючы, Ісус сказаў ім: «Глядзіце, каб ніхто не падмануў вас,Мк 13:5; Лк 21:8; Эф 5:6; 2Фес 2:3
бо многія прыйдуць пад імем Маім, кажучы: “Я — Хрыстос”, — і шмат каго падмануць.
Маеце чуць пра войны і чуткі ваенныя. Глядзіце, не трывожцеся, бо ўсё гэта мусіць стацца, але гэта яшчэ не канец.
Бо паўстане народ на народ і валадарства на валадарства; і будуць голад, і пошасьці, і землятрусы месцамі.
А ўсё гэтае — пачатак мукаў радзін.
Тады будуць выдаваць вас на пакуты і забіваць вас, і зьненавідзяць вас усе народы за імя Маё.Мц 10:17; Мк 13:9; Лк 21:12; Ян 15:20
І тады згоршацца многія; і будуць выдаваць адзін аднаго, і ненавідзець адзін аднаго.
І многія фальшывыя прарокі паўстануць, і падмануць многіх.
І дзеля памнажэньня беззаконьня ў многіх асьцюдзянее любоў.
А хто вытрывае да канца, будзе збаўлены.
І будзе абвешчанае гэтае Эвангельле Валадарства па ўсім сьвеце на сьведчаньне ўсім народам, і тады прыйдзе канец.
Дык калі ўбачыце агіду спусташэньня, пра якую сказаў Данііл прарок, што паўстане на месцы сьвятым, — хто чытае, няхай зразумее, —Дан 9:27; Мк 13:14; Лк 21:20
тады тыя, што ў Юдэі, няхай бягуць у горы,
хто на даху, няхай не зыходзіць узяць што з дому свайго,
і хто ў полі, няхай не варочаецца назад узяць адзеньне сваё.
Гора ж тым, якія цяжарныя і якія кормяць грудзьмі, у тыя дні.
Маліцеся ж, каб ня сталіся ўцёкі вашыя зімою або ў суботу.
Бо тады будзе вялікі прыгнёт, якога не было ад пачатку сьвету аж дагэтуль, і ня будзе.
І калі б не былі скарочаныя тыя дні, не было б збаўленае ніводнае цела, але дзеля выбраных будуць скарочаныя тыя дні.
Тады, калі хто скажа вам: “Вось, тут Хрыстос, ці там”, — ня верце.Мк 13:21; Лк 17:23
Бо паўстануць фальшывыя хрысты і фальшывыя прарокі і дадуць вялікія знакі і цуды, каб падмануць, калі магчыма, і выбраных.
Вось, Я наперад сказаў вам.
Дык, калі скажуць вам: “Вось, Ён у пустыні”, — не выходзьце; “Вось, Ён у пакоях”, — ня верце.
Бо, як бліскавіца выходзіць з усходу і сьвеціць да захаду, так будзе і прыйсьце Сына Чалавечага.
Бо дзе мёртвае цела, там зьбяруцца і арлы.Лк 17:37
А адразу пасьля прыгнёту дзён тых сонца зацьмее, і месяц ня дасьць сьвятла свайго, і зоркі ўпадуць з неба, і сілы нябесныя захістаюцца.Іс 13:10; Езк 32:7; Ёіл 3:4; Мк 13:24; Лк 21:25
І тады зьявіцца знак Сына Чалавечага ў небе, і тады заплачуць усе калены зямлі і ўгледзяць Сына Чалавечага, Які ідзе на аблоках нябесных з сілаю і славаю вялікаю.Зах 12:10; Мк 14:62; Адкр 1:7
І пашле Ён анёлаў Сваіх з гучным голасам трубным, і зьбяруць яны выбраных Ягоных ад чатырох вятроў, ад краю неба да краю яго.1Кар 15:52; 1Фес 4:16
У дрэва фігавага навучыцеся прыповесьці: калі ўжо галінка ягоная робіцца мяккаю і пускае лісты, ведаеце, што блізка лета.
Гэтак і вы, калі ўбачыце ўсё гэтае, ведайце, што блізка, у дзьвярах.
Сапраўды кажу вам: не праміне пакаленьне гэтае, як усё гэта станецца.Мк 13:30
Неба і зямля прамінуць; а словы Мае не прамінуць.Іс 51:6; 2Пётр 3:10
А пра дзень той і гадзіну ніхто ня ведае, нават анёлы, якія ў небе, а толькі Айцец Мой адзін.
Але, як было ў дні Ноя, так будзе і ў прыйсьце Сына Чалавечага.Быц 7:7; Лк 17:26; 1Пётр 3:20
Бо як было ў дні перад патопам: елі, пілі, жаніліся і замуж выходзілі, аж да таго дня, як увайшоў Ной у каўчэг,
і не разумелі, пакуль не прыйшоў патоп і не забраў усіх, так будзе і ў прыйсьце Сына Чалавечага.
Тады будуць двое ў полі: адзін бярэцца, а другі пакідаецца.
Дзьве, якія мелюць у жорнах: адна бярэцца, а другая пакідаецца.
Дык чувайце, бо ня ведаеце, у якую гадзіну Госпад ваш прыйдзе.Мц 25:13; Мк 13:33
Вы ж разумееце тое, што, калі б ведаў гаспадар дому, у якую варту прыйдзе злодзей, чуваў бы і не дапусьціў падкапаць дом свой.Лк 12:39; 1Фес 5:2; Адкр 16:15
Дзеля гэтага і вы будзьце падрыхтаваныя, бо Сын Чалавечы прыйдзе ў гадзіну, у якую ня думаеце.
Хто такі верны і мудры слуга, якога гаспадар ягоны паставіў над хатнімі сваімі даваць ім ежу ў свой час?Лк 12:42; 1Кар 4:2
Шчасьлівы той слуга, якога гаспадар ягоны, прыйшоўшы, знойдзе, што робіць гэтак.Адкр 16:15
Сапраўды кажу вам, што над усёю маёмасьцю сваёю паставіць яго.
А калі скажа той злы слуга ў сэрцы сваім: “Марудзіць прыйсьці гаспадар мой”, —
і пачне біць таварышаў сваіх, таксама есьці і піць з п’яніцамі, —
прыйдзе гаспадар слугі таго ў дзень, у які ён не чакае, і ў гадзіну, у якую ня ведае,
і адлучыць яго, і ўчыніць яму адзін лёс з крывадушнікамі; там будзе плач і скрыгат зубоў.