Рым Рымлянам, раздзел Пасланне да Рымлян, раздзел 10
Браты! Упадабаньне сэрца майго і просьба да Бога пра Ізраіль на збаўленьне.
Бо сьведчу ім, што маюць руплівасьць Божую, але не паводле пазнаньня.
Бо, не разумеючы праведнасьці Божае і шукаючы паставіць сваю праведнасьць, яны не падпарадкаваліся праведнасьці Божай.Флп 3:9
Бо канец Закону — Хрыстос, дзеля праведнасьці кожнаму, хто верыць.Гал 3:24
Бо Майсей піша пра праведнасьць паводле Закону, што чалавек, які выканае яго, жыць будзе ім.Ляв 18:5; Езк 20:11; Гал 3:12
А праведнасьць праз веру гэтак кажа: «Не кажы ў сэрцы тваім: “Хто ўзыйдзе ў неба?”» — гэта ёсьць Хрыста зьвесьці [на зямлю];Дрз 30:12
або: «“Хто зыйдзе ў бездань?”» — гэта ёсьць Хрыста з мёртвых вывесьці.
Але што кажа? «Блізка да цябе слова, у вуснах тваіх і ў сэрцы тваім», — гэта ёсьць слова веры, якое мы абвяшчаем.Дрз 30:14
Бо калі ты вуснамі тваімі вызнаеш Ісуса Госпадам і ў сэрцы тваім будзеш верыць, што Бог уваскрасіў Яго з мёртвых, будзеш збаўлены,Мц 10:32
бо сэрца верыць дзеля праведнасьці, а вусны вызнаюць дзеля збаўленьня.
Бо Пісаньне кажа: «Кожны, хто верыць у Яго, ня будзе асаромлены».Іс 28:16
Бо няма розьніцы між Юдэем і Грэкам, бо Ён — Госпад усіх, багаты для ўсіх, што клічуць Яго.Дзеі 10:34; Рым 3:29
Бо кожны, хто будзе клікаць імя Госпада, будзе збаўлены.Ёіл 3:5; Дзеі 2:21
Але як клікаць Таго, у Каго ня вераць? А як верыць у Таго, пра Каго ня чулі? Як чуць без таго, хто абвяшчае?
А як абвяшчаць, калі не былі пасланыя? Як напісана: «Якія прыгожыя ногі таго, хто дабравесьціць супакой, дабравесьціць добрае!»Іс 52:7; Нау 2:1
Але ня ўсе паслухаліся Эвангельля, бо Ісая кажа: «Госпадзе! Хто паверыў пачутаму ад нас?»Іс 53:1; Ян 12:38
Таму вера — ад слуханьня, а слуханьне — праз слова Божае.
Але кажу: Ці ж яны ня чулі? Наадварот, «на ўсю зямлю пайшоў голас іхні, і да межаў сусьвету — словы іхнія».Пс 19:5; Мц 24:14; Мц 28:19
Але кажу: Ці ж Ізраіль ня ведаў? Першы Майсей кажа: «Я збуджу ў вас рупнасьць праз [тых, хто] не народ, праз народ, які ня цяміць, раздражню вас».Дрз 32:21; Рым 11:11
А Ісая адважваецца і кажа: «Мяне знайшлі тыя, якія не шукалі Мяне, Я аб’явіўся тым, якія не пыталіся Мяне».Іс 65:1
А наконт Ізраіля кажа: «Увесь дзень выцягваў Я рукі Мае да народу, які не скараецца і працівіцца».Іс 65:2