Мф Матфея, глава От Матфея святое благовествование, глава 5
Другое письмо: церковнославянский
Узре́в же наро́ды, взы́де на гору́: и се́дшу ему́, приступи́ша к нему́ ученицы́ его́.
И отве́рз уста́ своя́, уча́ше их, глаго́ля:
блаже́ни ни́щии ду́хом: я́ко тех есть ца́рствие небе́сное.Лк 6:20
Блаже́ни пла́чущии: я́ко ти́и уте́шатся.Ис 61:2; Лк 6:21
Блаже́ни кро́тцыи: я́ко ти́и насле́дят зе́млю.Пс 36:11
Блаже́ни а́лчущии и жа́ждущии пра́вды: я́ко ти́и насы́тятся.
Блаже́ни ми́лостивии: я́ко ти́и поми́ловани бу́дут.
Блаже́ни чи́стии се́рдцем: я́ко ти́и бо́га у́зрят.Пс 23:4
Блаже́ни миротво́рцы: я́ко ти́и сы́нове бо́жии нареку́тся.Евр 12:14
Блаже́ни изгна́ни пра́вды ра́ди: я́ко тех есть ца́рствие небе́сное.1Петр 3:14
Блаже́ни есте́, егда́ поно́сят вам, и иждену́т, и реку́т всяк зол глаго́л на вы лжу́ще, мене́ ра́ди:Лк 6:22; 1Петр 4:14
ра́дуйтеся и весели́теся, я́ко мзда ва́ша мно́га на небесе́х: та́ко бо изгна́ша проро́ки, и́же (бе́ша) пре́жде вас.Мф 21:35
Вы есте́ соль земли́: а́ще же соль обуя́ет, чим осоли́тся? ни во что́же бу́дет ктому́, то́чию да изсы́пана бу́дет вон и попира́ема челове́ки.Мк 9:50; Лк 14:34
Вы есте́ свет ми́ра: не мо́жет град укры́тися верху́ горы́ стоя́:Фил 2:15
ниже́ вжига́ют свети́лника и поставля́ют его́ под спу́дом, но на све́щнице, и све́тит всем, и́же в хра́мине (суть).Мк 4:21; Лк 8:16; Лк 11:33
Та́ко да просвети́тся свет ваш пред челове́ки, я́ко да ви́дят ва́ша до́брая дела́ и просла́вят отца́ ва́шего, и́же на небесе́х.1Петр 2:12; Фил 2:15
(Да) не мни́те, я́ко приидо́х разори́ти зако́н, или́ проро́ки: не приидо́х разори́ти, но испо́лнити.
Ами́нь бо глаго́лю вам: до́ндеже пре́йдет не́бо и земля́, ио́та еди́на, или́ еди́на черта́ не пре́йдет от зако́на, до́ндеже вся бу́дут.Лк 16:17
И́же а́ще разори́т еди́ну за́поведий сих ма́лых и научи́т та́ко челове́ки, мний нарече́тся в ца́рствии небе́снем: а и́же сотвори́т и научи́т, сей ве́лий нарече́тся в ца́рствии небе́снем.
Глаго́лю бо вам, я́ко а́ще не избу́дет пра́вда ва́ша па́че кни́жник и фарисе́й, не вни́дете в ца́рствие небе́сное.
Слы́шасте, я́ко рече́но бысть дре́вним: не убие́ши: и́же (бо) а́ще убие́т, пови́нен есть суду́.Исх 20:13; Втор 5:17; Мф 19:18; Мк 10:19; Лк 18:20
Аз же глаго́лю вам, я́ко всяк гне́ваяйся на бра́та своего́ всу́е пови́нен есть суду́: и́же бо а́ще рече́т бра́ту своему́: рака́, пови́нен есть со́нмищу: а и́же рече́т: уро́де, пови́нен есть гее́нне о́гненней.
А́ще у́бо принесе́ши дар твой ко олтарю́ и ту помяне́ши, я́ко брат твой и́мать не́что на тя:
оста́ви ту дар твой пред олтаре́м и шед пре́жде смири́ся с бра́том твои́м, и тогда́ прише́д принеси́ дар твой.
Бу́ди увещава́яся с сопе́рником твои́м ско́ро, до́ндеже еси́ на пути́ с ним, да не преда́ст тебе́ сопе́рник судии́, и судия́ тя преда́ст слузе́, и в темни́цу вве́ржен бу́деши:Лк 12:58
ами́нь глаго́лю тебе́: не изы́деши отту́ду, до́ндеже возда́си после́дний кодра́нт.
Слы́шасте, я́ко рече́но бысть дре́вним: не прелюбы́ сотвори́ши.Исх 20:14; Втор 5:18
Аз же глаго́лю вам, я́ко всяк, и́же воззри́т на жену́ ко е́же вожделе́ти ея́, уже́ любоде́йствова с не́ю в се́рдцы свое́м:
а́ще же о́ко твое́ десно́е соблажня́ет тя, изми́ е и ве́рзи от себе́: у́не бо ти есть, да поги́бнет еди́н от уд твои́х, а не все те́ло твое́ вве́ржено бу́дет в гее́нну (о́гненную):Втор 13:6; Мф 18:8; Мк 9:43; Мк 9:47
а́ще десна́я твоя́ рука́ соблажня́ет тя, усецы́ ю и ве́рзи от себе́: у́не бо ти есть, да поги́бнет еди́н от уд твои́х, а не все те́ло твое́ вве́ржено бу́дет в гее́нну.
Рече́но же бысть, я́ко и́же а́ще пу́стит жену́ свою́, да даст ей кни́гу распу́стную.Втор 24:1; Мф 19:7; Мк 10:4; Мк 10:11; Лк 16:18; 1Кор 7:10
Аз же глаго́лю вам, я́ко всяк отпуща́яй жену́ свою́, ра́зве словесе́ любоде́йнаго, твори́т ю прелюбоде́йствовати: и и́же пущени́цу по́ймет, прелюбоде́йствует.
Па́ки слы́шасте, я́ко рече́но бысть дре́вним: не во лжу клене́шися, возда́си же го́сподеви кля́твы твоя́.Лев 19:12; Втор 23:21; Исх 20:7
Аз же глаго́лю вам не кля́тися вся́ко: ни не́бом, я́ко престо́л есть бо́жий:
ни земле́ю, я́ко подно́жие есть нога́ма его́: ни иерусали́мом, я́ко град есть вели́каго царя́:
ниже́ главо́ю твое́ю клени́ся, я́ко не мо́жеши вла́са еди́наго бе́ла или́ че́рна сотвори́ти:
бу́ди же сло́во ва́ше: ей, ей: ни, ни: ли́шше же сею́ от неприя́зни есть.Иак 5:12
Слы́шасте, я́ко рече́но бысть: о́ко за о́ко, и зуб за зуб.Исх 21:24; Лев 24:20; Втор 19:21
Аз же глаго́лю вам не проти́витися злу: но а́ще тя кто уда́рит в десну́ю твою́ лани́ту, обрати́ ему́ и другу́ю:Лк 6:29; Иак 3:13; Рим 12:17; 1Кор 6:7; 1Фес 5:15
и хотя́щему суди́тися с тобо́ю и ри́зу твою́ взя́ти, отпусти́ ему́ и срачи́цу:
и а́ще кто тя по́ймет по си́ле по́прище еди́но, иди́ с ним два.
Прося́щему у тебе́ дай, и хотя́щаго от тебе́ зая́ти не отврати́.Втор 15:7; Лк 6:34
Слы́шасте, я́ко рече́но есть: возлю́биши и́скренняго твоего́ и возненави́диши врага́ твоего́.Лев 19:18; Мф 22:39; Мк 12:31; Иак 2:8; Рим 13:9
Аз же глаго́лю вам: люби́те враги́ ва́шя, благослови́те клену́щыя вы, добро́ твори́те ненави́дящым вас, и моли́теся за творя́щих вам напа́сть и изгоня́щыя вы,Лк 6:27; Лк 23:34; Деян 7:60; 1Кор 4:12
я́ко да бу́дете сы́нове отца́ ва́шего, и́же есть на небесе́х: я́ко со́лнце свое́ сия́ет на злы́я и благи́я и дожди́т на пра́ведныя и на непра́ведныя.Лк 6:35
А́ще бо лю́бите лю́бящих вас, ку́ю мзду и́мате? не и мытари́ ли то́жде творя́т?
И а́ще целу́ете дру́ги ва́шя то́кмо, что ли́шше творите́? не и язы́чницы ли та́кожде творя́т?
Бу́дите у́бо вы соверше́ни, я́коже оте́ц ваш небе́сный соверше́н есть.