Mt. Mateo, capítulo Evangelio según Mateo, capítulo 10
Otra escritura: церковнославянский
И призва́ обана́десять ученики́ своя́, даде́ им власть на дусе́х нечи́стых, я́ко да изго́нят их, и цели́ти всяк неду́г, и вся́ку боле́знь.Mr. 3:14; Lc. 9:1
Двана́десятих же апо́столов имена́ суть сия́: пе́рвый си́мон, и́же нарица́ется петр, и андре́й брат его́: иа́ков зеведе́ев, и иоа́нн брат его́:
Фили́пп, и варфоломе́й: фома́, и матфе́й мыта́рь: иа́ков алфе́ев, и левве́й, нарече́нный фадде́й:
Си́мон канани́т, и иу́да искарио́тский, и́же и предаде́ его́.
Сия́ обана́десять посла́ иису́с, запове́да им, глаго́ля: на путь язы́к не иди́те, и во град самаря́нский не вни́дите.
Иди́те же па́че ко овца́м поги́бшым до́му изра́илева.Mt. 15:24
Ходя́ще же пропове́дуйте, глаго́люще: я́ко прибли́жися ца́рствие небе́сное.Lc. 9:2
Боля́щыя исцеля́йте, прокаже́нныя очища́йте, ме́ртвыя воскреша́йте, бе́сы изгоня́йте: ту́не прия́сте, ту́не дади́те.
Не стяжи́те зла́та, ни сребра́, ни ме́ди при поясе́х ва́ших:Mr. 6:8; Lc. 9:3
Ни пи́ры на пути́, ни двою́ ри́зу, ни сапо́г, ни жезл, досто́ин бо есть де́латель мзды своея́.Lc. 10:7; 1 Ti. 5:18
Во́ньже а́ще (коли́ждо) град или́ весь вни́дете, испыта́йте, кто в нем досто́ин есть: и ту пребу́дите, до́ндеже изы́дете.
Входя́ще же в дом, целу́йте его́ (глаго́люще: мир до́му сему́):Lc. 10:5
И а́ще у́бо бу́дет дом досто́ин, прии́дет мир ваш нань: а́ще ли же не бу́дет досто́ин, мир ваш к вам возврати́тся.
И и́же а́ще не прии́мет вас, ниже́ послу́шает слове́с ва́ших, исходя́ще из до́му, или́ из гра́да того́, оттряси́те прах ног ва́ших.Mr. 6:11; Lc. 9:5; Hch. 13:51
Ами́нь глаго́лю вам: отра́днее бу́дет земли́ содо́мстей и гомо́ррстей в день су́дный, не́же гра́ду тому́.
Се аз посыла́ю вас я́ко о́вцы посреде́ волко́в: бу́дите у́бо му́дри я́ко змия́, и це́ли я́ко го́лубие.Lc. 10:3; Ro. 16:19; 2 Co. 1:12
Внемли́те же от челове́к: предадя́т бо вы на со́нмы, и на собо́рищах их бию́т вас.
И пред влады́ки же и цари́ веде́ни бу́дете мене́ ра́ди, во свиде́тельство им и язы́ком.
Егда́ же предаю́т вы, не пецы́теся, ка́ко или́ что возглаго́лете: даст бо ся вам в той час что возглаго́лете.Mr. 13:11; Lc. 12:11
Не вы бо бу́дете глаго́лющии, но дух отца́ ва́шего глаго́ляй в вас.
Преда́ст же брат бра́та на смерть, и оте́ц ча́до: и воста́нут ча́да на роди́телей, и убию́т их.
И бу́дете ненави́дими все́ми и́мене моего́ ра́ди. претерпе́вый же до конца́, той спасе́н бу́дет.
Егда́ же го́нят вы во гра́де сем, бе́гайте в други́й. ами́нь бо глаго́лю вам: не и́мате сконча́ти гра́ды изра́илевы, до́ндеже прии́дет сын челове́ческий.
Несть учени́к над учи́телем свои́м, ниже́ раб над господи́ном свои́м.Lc. 6:40; Jn. 13:16; Jn. 15:20
Довле́ет ученику́, да бу́дет я́ко учи́тель его́, и раб, я́ко госпо́дь его́. а́ще господи́на до́му веельзеву́ла нареко́ша, кольми́ па́че дома́шния его́.Mt. 9:34
Не убо́йтеся у́бо их: ничто́же бо есть покрове́но, е́же не откры́ется: и та́йно, е́же не уве́дено бу́дет.Mr. 4:22; Lc. 8:17; Lc. 12:2
Е́же глаго́лю вам во тме, рцы́те во све́те: и е́же во у́ши слы́шите, пропове́дите на кро́вех.
И не убо́йтеся от убива́ющих те́ло, ду́шу же не могу́щих уби́ти: убо́йтеся же па́че могу́щаго и ду́шу и те́ло погуби́ти в гее́нне.Lc. 12:4
Не две ли пти́це цени́теся еди́ному асса́рию? и ни еди́на от нею́ паде́т на земли́ без отца́ ва́шего.Lc. 12:6
Вам же и вла́си главни́и вси изочте́ни суть.
Не убо́йтеся у́бо: мно́зех птиц лу́чши есте́ вы.
Всяк у́бо и́же испове́сть мя пред челове́ки, испове́м его́ и аз пред отце́м мои́м, и́же на небесе́х.Mr. 8:38; Lc. 9:26; Lc. 12:8
А и́же отве́ржется мене́ пред челове́ки, отве́ргуся его́ и аз пред отце́м мои́м, и́же на небесе́х.2 Ti. 2:12
Не мни́те, я́ко приидо́х воврещи́ мир на зе́млю: не приидо́х бо воврещи́ мир, но мечь.Lc. 12:51
Приидо́х бо разлучи́ти челове́ка на отца́ своего́, и дщерь на ма́терь свою́, и неве́сту на свекро́вь свою́.
И врази́ челове́ку дома́шнии его́.Mi. 7:6
И́же лю́бит отца́ или́ ма́терь па́че мене́, несть мене́ досто́ин: и и́же лю́бит сы́на или́ дщерь па́че мене́, несть мене́ досто́ин.Lc. 14:26
И и́же не прии́мет креста́ своего́, и в след мене́ гряде́т, несть мене́ досто́ин.Mt. 16:24; Mr. 8:34
Обреты́й ду́шу свою́, погуби́т ю: а и́же погуби́т ду́шу свою́ мене́ ра́ди, обря́щет ю.Mr. 8:35; Lc. 9:24; Jn. 12:25
И́же вас прие́млет, мене́ прие́млет: и и́же прие́млет мене́, прие́млет посла́вшаго мя.Lc. 10:16; Jn. 13:20
Прие́мляй проро́ка во и́мя проро́че, мзду проро́чу прии́мет: и прие́мляй пра́ведника во и́мя пра́ведниче, мзду пра́ведничу прии́мет.
И и́же а́ще напои́т еди́наго от ма́лых сих ча́шу студены́ воды́, то́кмо во и́мя ученика́, ами́нь глаго́лю вам, не погуби́т мзды своея́.Mr. 9:41