Мф Матфея, глава От Матфея святое благовествование, глава 15

Другое письмо: церковнославянский

Переводы Сравнить

Тогда́ приступи́ша ко иису́сови, и́же от иерусали́ма кни́жницы и фарисе́е, глаго́люще:Мк 7:1

Почто́ ученицы́ твои́ преступа́ют преда́ние ста́рец? не умыва́ют бо рук свои́х, егда́ хлеб ядя́т.

Он же отвеща́в рече́ им: почто́ и вы преступа́ете за́поведь бо́жию за преда́ние ва́ше?

Бог бо запове́да, глаго́ля: чти отца́ и ма́терь: и и́же злосло́вит отца́ или́ ма́терь, сме́ртию да у́мрет.Исх 20:12; Исх 21:17; Лев 20:9; Втор 5:16; Прит 20:20; Сир 3:7; Мк 7:10; Еф 6:2

Вы же глаго́лете: и́же а́ще рече́т отцу́, или́ ма́тери: дар, е́же а́ще от мене́ по́льзовался еси́.

И да не почти́т отца́ своего́, или́ ма́тере (своея́): и разори́сте за́поведь бо́жию за преда́ние ва́ше.

Лицеме́ри, до́бре проро́чествова о вас иса́иа, глаго́ля:

Приближа́ются мне лю́дие си́и усты́ свои́ми, и устна́ми чтут мя: се́рдце же их дале́че отстои́т от мене́.Мк 7:6

Всу́е же чтут мя, уча́ще уче́нием, за́поведем челове́ческим.Ис 29:13

И призва́в наро́ды, рече́ им: слы́шите, и разуме́йте:Мк 7:14

Не входя́щее во уста́ скверни́т челове́ка: но исходя́щее изоу́ст, то скверни́т челове́ка.

Тогда́ присту́пльше ученицы́ его́, ре́ша ему́: ве́си ли, я́ко фарисе́е слы́шавше сло́во, соблазни́шася?

Он же отвеща́в рече́: всяк сад, его́же не насади́ оте́ц мой небе́сный, искорени́тся.Ин 15:2

Оста́вите их: вожди́ суть сле́пи слепце́м: слепе́ц же слепца́ а́ще во́дит, о́ба в я́му впаде́тася.Ис 42:19; Иер 5:31; Лк 6:39

Отвеща́в же петр, рече́ ему́: скажи́ нам при́тчу сию́.

Иису́с же рече́ (им): едина́чееще́ ли и вы без ра́зума есте́?

Не у ли разумева́ете, я́ко вся́ко, е́же вхо́дит во уста́, во чре́во вмеща́ется, и афедро́ном исхо́дит?

Исходя́щая же изоу́ст, от се́рдца исхо́дят, и та скверня́т челове́ка.Иак 3:6

От се́рдца бо исхо́дят помышле́ния зла́я, уби́йства, прелюбодея́ния, любодея́ния, татьбы́, лжесвиде́тельства, хулы́.Быт 6:5; Быт 8:21; Мк 7:21

Сия́ суть скверня́щая челове́ка: а е́же неумове́нныма рука́ма я́сти, не скверни́т челове́ка.

И изше́д отту́ду иису́с, оти́де во страны́ ти́рския и сидо́нския.Мк 7:24

И се жена́ ханане́йска от преде́л тех изше́дши, возопи́ к нему́, глаго́лющи: поми́луй мя го́споди, сы́не дави́дов: дщи моя́ зле бесну́ется.

Он же не отвеща́ ей словесе́. и присту́пльше ученицы́ его́, моля́ху его́ глаго́люще: отпусти́ ю, я́ко вопие́т в след нас.

Он же отвеща́в, рече́: несмь по́слан, то́кмо ко овца́м поги́бшым до́му изра́илева.Ис 58:6; Иер 50:6; Иез 34:5; Мф 10:6

Она́ же прише́дши поклони́ся ему́, глаго́лющи: го́споди, помози́ ми.

Он же отвеща́в, рече́: несть добро́ отя́ти хле́ба ча́дом, и поврещи́ псом.

Она́ же рече́: ей го́споди: и́бо и пси ядя́т от крупи́ц па́дающих от трапе́зы господе́й свои́х.

Тогда́ отвеща́в иису́с, рече́ ей: о же́но, ве́лия ве́ра твоя́! бу́ди тебе́, я́коже хо́щеши. и исцеле́ дщи ея́ от того́ часа́.

И преше́д отту́ду иису́с, прии́де на мо́ре галиле́йское: и возше́д на гору́, се́де ту.

И приступи́ша к нему́ наро́ди мно́зи, иму́ще с собо́ю хромы́я, слепы́я, немы́я, бе́дныя, и и́ны мно́ги: и приверго́ша их к нога́ма иису́совыма, и исцели́ их.Ис 35:5

Я́коже наро́дом диви́тися ви́дящым немы́я глаго́лющя, бе́дныя здра́вы, хромы́я ходя́щя, и слепы́я ви́дящя, и сла́вляху бо́га изра́илева.

Иису́с же призва́в ученики́ своя́, рече́ (им): милосе́рдую о наро́де (сем), я́ко уже́ дни три приседя́т мне, и не и́мут чесо́ я́сти: и отпусти́ти их не я́дшя не хощу́, да не ка́ко ослабе́ют на пути́.Мк 8:1

И глаго́лаша ему́ ученицы́ его́: отку́ду нам в пусты́ни хле́би толи́цы, я́ко да насы́тится толи́к наро́д?

И глаго́ла им иису́с: коли́ко хле́бы и́мате? они́ же ре́ша: седмь, и ма́ло ры́биц.

И повеле́ наро́дом возлещи́ на земли́.

И прие́м седмь хле́бы и ры́бы, хвалу́ возда́в преломи́, и даде́ ученико́м свои́м, ученицы́ же наро́дом.

И ядо́ша вси, и насы́тишася: и взя́ша избы́тки укру́х, седмь ко́шниц испо́лнь.

Я́дших же бя́ше четы́ре ты́сящи муже́й, ра́зве жен и дете́й.

И отпусти́в наро́ды, вле́зе в кора́бль, и прии́де в преде́лы магдали́нски.