Мф Матфея, глава От Матфея святое благовествование, глава 23

Другое письмо: церковнославянский

Переводы Сравнить

Тогда́ иису́с глаго́ла к наро́дом и ученико́м свои́м,

Глаго́ля: на моисе́ове седа́лищи седо́ша кни́жницы и фарисе́е.

Вся у́бо, ели́ка а́ще реку́т вам блюсти́, соблюда́йте и твори́те: по дело́м же их не твори́те, глаго́лют бо, и не творя́т.

Связу́ют бо бремена́ тя́жка и бе́дне носи́ма, и возлага́ют на плеща́ челове́ческа, пе́рстом же свои́м не хотя́т дви́гнути их.Лк 11:46; Деян 15:10

Вся же дела́ своя́ творя́т, да ви́дими бу́дут челове́ки: разширя́ют же храни́лища своя́, и велича́ют воскри́лия риз свои́х.Чис 15:38; Втор 22:12

Лю́бят же преждевозлега́ния на ве́черях, и преждеседа́ния на со́нмищах,Мк 12:39; Лк 11:43; Лк 20:46

И целова́ния на то́ржищах, и зва́тися от челове́к: учи́телю, учи́телю.

Вы же не нарица́йтеся учи́тели: еди́н бо есть ваш учи́тель, христо́с, вси же вы бра́тия есте́.Иак 3:1; 1Кор 3:4

И отца́ не зови́те себе́ на земли́: еди́н бо есть оте́ц ваш, и́же на небесе́х.Мал 1:6

Ниже́ нарица́йтеся наста́вницы: еди́н бо есть наста́вник ваш христо́с.

Бо́лий же в вас, да бу́дет вам слуга́.

И́же бо вознесе́тся, смири́тся: и смиря́яйся, вознесе́тся.Лк 14:11

Го́ре же вам кни́жницы и фарисе́е лицеме́ри, я́ко снеда́ете до́мы вдови́ц, и вино́ю дале́че моли́твы творя́щеи лицеме́рно на до́лзе моли́твы творите́: сего́ ра́ди ли́шшее прии́мете осужде́ние.Иез 22:26; Лк 11:52

Го́ре вам кни́жницы и фарисе́е лицеме́ри, я́ко затворя́ете ца́рствие небе́сное пред челове́ки: вы бо не вхо́дите, ни входя́щих оставля́ете вни́ти.Мк 12:40; Лк 20:47

Го́ре вам кни́жницы и фарисе́е лицеме́ри, я́ко прехо́дите мо́ре и су́шу, сотвори́ти еди́наго прише́льца: и егда́ бу́дет, творите́ его́ сы́на гее́нны сугу́бейша вас.

Го́ре вам вожди́ слепи́и, глаго́люще: и́же а́ще клене́тся це́рковию, ничесо́же есть: а и́же клене́тся зла́том церко́вным, до́лжен есть.

Бу́и и слепи́и, ко́е бо бо́ле есть? зла́то ли, или́ це́рковь святя́щая зла́то?

И и́же а́ще клене́тся олтаре́м, ничесо́же есть: а и́же клене́тся да́ром, и́же верху́ его́, до́лжен есть.

Бу́и и слепи́и, что бо бо́ле? дар ли, или́ олта́рь святя́й дар?Исх 29:37

И́же у́бо клене́тся олтаре́м, клене́тся им, и су́щим верху́ его́.

И и́же клене́тся це́рковию, клене́тся е́ю, и живу́щим в ней.2Пар 6:2; Пс 25:8

И клены́йся небесе́м, клене́тся престо́лом бо́жиим, и седя́щим на нем.

Го́ре вам кни́жницы и фарисе́е лицеме́ри, я́ко одеся́тствуете мя́тву, и копр, и ки́мин: и оста́висте вя́щшая зако́ну, суд, и ми́лость, и ве́ру. сия́ же подоба́ше твори́ти, и о́нех не оставля́ти.Ос 6:6; Мих 6:8; Мф 12:7; Лк 11:42

Вожди́ слепи́и, оцежда́ющии комары́, вельблу́ды же пожира́юще.

Го́ре вам кни́жницы и фарисе́е лицеме́ри, я́ко очища́ете вне́шнее сткля́ницы и блю́да: внутрью́ду же суть по́лни хище́ния и непра́вды.

Фарисе́е слепы́й, очи́сти пре́жде вну́треннее сткля́ницы и блю́да, да бу́дет и вне́шнее и́ма чи́сто.

Го́ре вам кни́жницы и фарисе́е лицеме́ри, я́ко подо́битеся гробо́м пова́пленым, и́же внею́ду у́бо явля́ются красны́, внутрью́ду же по́лни суть косте́й ме́ртвых, и вся́кия нечистоты́.Лк 11:44; Деян 23:3

Та́ко и вы, внею́ду у́бо явля́етеся челове́ком пра́ведни: внутрью́ду же есте́ по́лни лицеме́рия и беззако́ния.

Го́ре вам кни́жницы и фарисе́е лицеме́ри, я́ко зи́ждете гро́бы проро́ческия, и кра́сите ра́ки пра́ведных,

И глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли в кро́ви проро́к.

Те́мже са́ми свиде́тельствуете себе́, я́ко сы́нове есте́ изби́вших проро́ки.

И вы испо́лните ме́ру оте́ц ва́ших.

Змия́, порожде́ния ехи́днова, ка́ко убежите́ от суда́ огня́ гее́нскаго?Мф 3:7

Сего́ ра́ди се аз послю́ к вам проро́ки, и прему́дры, и кни́жники: и от них убие́те и ра́спнете, и от них бие́те на со́нмищах ва́ших, и изжене́те от гра́да во град.2Пар 36:15; Лк 11:49

Я́ко да прии́дет на вы вся́ка кровь пра́ведна, пролива́емая на земли́, от кро́ве а́веля пра́веднаго, до кро́ве заха́рии сы́на варахи́ина, его́же уби́сте между́ це́рковию и олтаре́м.Быт 4:8; 2Пар 24:21; Лк 11:51; 1Ин 3:12

Ами́нь глаго́лю вам: я́ко прии́дут вся сия́ на род сей.

Иерусали́ме, иерусали́ме изби́вый проро́ки, и ка́мением побива́яй по́сланныя к нему́, колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте!Втор 32:11; Лк 13:34

Се оставля́ется вам дом ваш пуст.Лк 13:35

Глаго́лю бо вам, я́ко не и́мате мене́ ви́дети отсе́ле, до́ндеже рече́те: благослове́н гряды́й во и́мя го́сподне.Пс 117:26; Мф 21:9