Mrk Mark, chapter The Gospel According to Mark, chapter 3
Other script: церковнославянский
И вни́де па́ки в со́нмище: и бе та́мо челове́к, су́ху имы́й ру́ку.Mat 12:9; Luk 6:6
И назира́ху его́, а́ще в суббо́ты исцели́т его́, да нань возглаго́лют.
И глаго́ла челове́ку су́ху иму́щему ру́ку: ста́ни посреде́.
И глаго́ла им: досто́ит ли в суббо́ты добро́ твори́ти, или́ зло твори́ти? ду́шу спасти́, или́ погуби́ти? Они́ же молча́ху.
И воззре́в на них со гне́вом, скорбя́ о окамене́нии серде́ц их, глаго́ла челове́ку: простри́ ру́ку твою́. И простре́: и утверди́ся рука́ его́ цела́ я́ко друга́я.
И изше́дше фарисе́е, а́бие со иродиа́ны сове́т творя́ху нань, ка́ко его́ погубя́т.Jhn 10:39
Иису́с же оти́де со учени́ки свои́ми к мо́рю: и мног наро́д от галиле́и по нем и́де, и от иуде́и,Mat 4:25
и от иерусали́ма, и от идуме́и, и со о́наго по́лу иорда́на. И от ти́ра и сидо́на мно́жество мно́гое, слы́шавше, ели́ка творя́ше, (и) приидо́ша к нему́.
И рече́ ученико́м свои́м, да кора́бль бу́дет у него́ наро́да ра́ди, да не стужа́ют ему́.
Мно́ги бо исцели́, я́коже напада́ти на него́, да ему́ прико́снутся, ели́цы имея́ху ра́ны.
И ду́си нечи́стии, егда́ ви́дяху его́, припада́ху к нему́ и зва́ху, глаго́люще, я́ко ты еси́ сын бо́жий.Mat 16:16
И мно́го преща́ше им, да не явле́на его́ сотворя́т.
И взы́де на гору́ и призва́, и́хже хотя́ше сам: и приидо́ша к нему́.
И сотвори́ двана́десяте, да бу́дут с ним, и да посыла́ет их пропове́дати,Mat 10:1; Luk 9:1
и име́ти власть цели́ти неду́ги и изгони́ти бе́сы:
и нарече́ си́мону и́мя петр:Mat 16:18
и иа́кова зеведе́ова и иоа́нна бра́та иа́ковля: и нарече́ и́ма имена́ воанерге́с, е́же есть сы́на гро́мова:
и андре́а, и фили́ппа, и варфоломе́а, и матфе́а, и фому́, и иа́кова алфе́ова, и фадде́а, и си́мона канани́та,
и иу́ду искарио́тскаго, и́же и предаде́ его́.
И приидо́ша в дом: и собра́ся па́ки наро́д, я́ко не мощи́ им ни хле́ба я́сти.
И слы́шавше и́же бя́ху у него́, изыдо́ша, да и́мут его́: глаго́лаху бо, я́ко неи́стов есть.Jhn 10:20
И кни́жницы, и́же от иерусали́ма низше́дшии, глаго́лаху, я́ко веельзеву́ла и́мать и я́ко о кня́зи бесо́встем изго́нит бе́сы.Mat 9:34; Luk 11:15
И призва́в их, в при́тчах глаго́лаше им: ка́ко мо́жет сатана́ сатану́ изгони́ти?
И а́ще ца́рство на ся раздели́тся, не мо́жет ста́ти ца́рство то:Mat 12:25; Luk 11:17
и а́ще дом на ся раздели́тся, не мо́жет ста́ти дом той:
и а́ще сата́на воста́ на ся сам и раздели́ся, не мо́жет ста́ти, но коне́ц и́мать.
Никто́же мо́жет сосу́ды кре́пкаго, вшед в дом его́, расхи́тити, а́ще не пе́рвее кре́пкаго свя́жет: и тогда́ дом его́ расхи́тит.
Ами́нь глаго́лю вам, я́ко вся отпу́стятся согреше́ния сыно́м челове́ческим, и хуле́ния, ели́ка а́ще восхуля́т:Mat 12:31; Luk 12:10; 1Jn 5:16; Heb 10:26
а и́же восху́лит на ду́ха свята́го, не и́мать отпуще́ния во ве́ки, но пови́нен есть ве́чному суду́.
Зане́ глаго́лаху: ду́ха нечи́стаго и́мать.
Приидо́ша у́бо ма́ти и бра́тия его́, и вне стоя́ще посла́ша к нему́, зову́ще его́.Mat 12:46; Luk 8:19
И седя́ше наро́д о́крест его́. Ре́ша же ему́: се, ма́ти твоя́ и бра́тия твоя́ (и сестры́ твоя́) вне и́щут тебе́.
И отвеща́ им, глаго́ля: кто есть ма́ти моя́, или́ бра́тия моя́?
И согля́дав о́крест себе́ седя́щыя, глаго́ла: се, ма́ти моя́ и бра́тия моя́:
и́же бо а́ще сотвори́т во́лю бо́жию, сей брат мой и сестра́ моя́ и ма́ти (ми) есть.