Мк Марка, глава От Марка святое благовествование, глава 11

Другое письмо: церковнославянский

Переводы Сравнить

И егда́ прибли́жи[ша]ся во иерусали́м, в вифсфаги́ю и вифа́нию, к горе́ елео́нстей, посла́ два от учени́к свои́хМф 21:1; Лк 19:29

и глаго́ла и́ма: иди́та в весь, я́же есть пря́мо ва́ма: и а́бие входя́ща в ню, обря́щета жребя́ привя́зано, на не́же никто́же от челове́к все́де: отре́шша е, приведи́та:

и а́ще кто ва́ма рече́т: что твори́та сие́? рцы́та, я́ко госпо́дь тре́бует е: и а́бие по́слет е се́мо.

Идо́ста же, и обрето́ста жребя́ привя́зано при две́рех вне на распу́тии, и отреши́ста е.

И не́цыи от стоя́щих ту глаго́лаху и́ма: что де́ета отреша́юща жребя́?

О́на же ре́ста им, я́коже запове́да и́ма иису́с: и оста́виша я.

И приведо́ста жребя́ ко иису́сови: и возложи́ша на не ри́зы своя́, и все́де на не.Мф 21:7; Лк 19:35

Мно́зи же ри́зы своя́ постла́ша по пути́: друзи́и же ва́иа ре́заху от дре́вия и постила́ху по пути́.Ин 12:13

И предходя́щии и вслед гряду́щии вопия́ху, глаго́люще: оса́нна, благослове́н гряды́й во и́мя го́сподне,Пс 117:26

благослове́но гряду́щее ца́рство во и́мя го́спода отца́ на́шего дави́да: оса́нна в вы́шних.

И вни́де во иерусали́м иису́с и в це́рковь: и согля́дав вся, по́зде уже́ су́щу часу́, изы́де в вифа́нию со обемана́десяте.

И нау́трие изше́дшым им от вифа́нии, взалка́:

и ви́дев смоко́вницу издале́ча, иму́щу ли́ствие, прии́де, а́ще у́бо что обря́щет на ней: и прише́д к ней, ничесо́же обре́те, то́кмо ли́ствие: не у бо бе вре́мя смо́квам.

И отвеща́в иису́с рече́ ей: да не ктому́ от тебе́ во ве́ки никто́же плода́ снесть. И слы́шаху ученицы́ его́.

И приидо́ша (па́ки) во иерусали́м. И вшед иису́с в це́рковь, нача́т изгони́ти продаю́щыя и купу́ющыя в це́ркви: и трапе́зы торжнико́м и седа́лища продаю́щих го́луби испрове́рже:Мф 21:12; Лк 19:45; Ин 2:14

и не дая́ше, да кто мимонесе́т сосу́д сквозе́ це́рковь.

И уча́ше, глаго́ля им: несть ли пи́сано, я́ко храм мой храм моли́твы нарече́тся всем язы́ком? вы же сотвори́сте его́ верте́п разбо́йником.Ис 56:7; Иер 7:11

И слы́шаша кни́жницы и архиере́е, и иска́ху, ка́ко его́ погубя́т: боя́хубося его́, я́ко весь наро́д дивля́шеся о учении его́.

И я́ко по́зде бысть, исхожда́ше вон из гра́да.

И у́тро мимоходя́ще, ви́деша смоко́вницу изсо́хшу из коре́ния.

И воспомяну́в петр глаго́ла ему́: равви́, виждь, смоко́вница, ю́же прокля́л еси́, у́сше.

И отвеща́в иису́с глаго́ла им:

име́йте ве́ру бо́жию: ами́нь бо глаго́лю вам, я́ко, и́же а́ще рече́т горе́ сей: дви́гнися и ве́рзися в мо́ре: и не размы́слит в се́рдцы свое́м, но ве́ру и́мет, я́ко е́же глаго́лет, быва́ет: бу́дет ему́, е́же а́ще рече́т:

сего́ ра́ди глаго́лю вам: вся ели́ка а́ще моля́щеся про́сите, ве́руйте, я́ко прие́млете: и бу́дет вам:Мф 7:7; Лк 11:9; Ин 14:13

и егда́ стоите́ моля́щеся, отпуща́йте, а́ще что и́мате на кого́, да и оте́ц ваш, и́же есть на небесе́х, отпу́стит вам согреше́ния ва́ша:Сир 28:2; Мф 6:14; Еф 4:32; Кол 3:13

а́ще ли же вы не отпуща́ете, ни оте́ц ваш, и́же есть на небесе́х, отпу́стит вам согреше́ний ва́ших.

И приидо́ша па́ки во иерусали́м. И в це́ркви ходя́щу ему́, приидо́ша к нему́ архиере́е и кни́жницы и ста́рцыМф 21:23; Лк 20:1

и глаго́лаша ему́: ко́ею о́бластию сия́ твори́ши? и кто ти о́бласть сию́ даде́, да сия́ твори́ши?

Иису́с же отвеща́в рече́ им: вопрошу́ вы и аз словесе́ еди́наго, и отвеща́йте ми: и реку́ вам, ко́ею о́бластию сия́ творю́:

креще́ние иоа́нново с небесе́ ли бе, или́ от челове́к? отвеща́йте ми.

И мы́сляху в себе́, глаго́люще: а́ще рече́м, с небесе́, рече́т: почто́ у́бо не ве́ровасте ему́?

но а́ще рече́м, от челове́к: боя́хуся люди́й: вси бо име́яху иоа́нна, я́ко вои́стинну проро́к бе.

И отвеща́вше глаго́лаша иису́сови: не ве́мы. И отвеща́в иису́с глаго́ла им: ни аз глаго́лю вам, ко́ею о́бластию сия́ творю́.