Мк Марка, глава От Марка святое благовествование, глава 13
Другое письмо: церковнославянский
И исходя́щу ему́ от це́ркве, глаго́ла ему́ еди́н от учени́к его́: учи́телю, виждь, каково́ ка́мение и какова́ зда́ния.Мф 24:1; Лк 21:5
И отвеща́в иису́с рече́ ему́: ви́диши ли сия́ вели́кая зда́ния? не и́мать оста́ти зде ка́мень на ка́мени, и́же не разори́тся.Лк 19:44; Лк 21:6
И седя́щу ему́ на горе́ елео́нстей пря́мо це́ркве, вопроша́ху его́ еди́наго петр и иа́ков, и иоа́нн и андре́й:
рцы нам, когда́ сия́ бу́дут? и ко́е (бу́дет) зна́мение, егда́ и́мут вся сия́ сконча́тися?
Иису́с же отвеща́в им, нача́т глаго́лати: блюди́теся, да не кто вас прельсти́т.Мф 24:4; Лк 21:8; Еф 5:6; 2Фес 2:3
Мно́зи бо прии́дут во и́мя мое́, глаго́люще, я́ко аз есмь: и мно́ги прельстя́т.
Егда́ же услы́шите бра́ни и слы́шания бра́нем, не ужаса́йтеся: подоба́ет бо бы́ти: но не у кончи́на.
Воста́нет бо язы́к на язы́к, и ца́рство на ца́рство: и бу́дут тру́си по ме́стом, и бу́дут гла́ди и мяте́жи. Нача́ло боле́знем сия́.
Блюди́теся же вы са́ми: предадя́т бо вы в со́нмища, и на собо́рищих бие́ни бу́дете: и пред воево́ды и цари́ веде́ни бу́дете мене́ ра́ди, во свиде́телство им.Ин 15:20
И во всех язы́цех подоба́ет пре́жде пропове́датися ева́нгелию.
Егда́ же поведу́т вы предаю́ще, не пре́жде пецы́теся, что возглаго́лете, ни поуча́йтеся: но е́же а́ще да́стся вам в той час, се глаго́лите: не вы бо бу́дете глаго́лющии, но дух святы́й.Мф 10:19; Лк 12:11
Преда́ст же брат бра́та на смерть, и оте́ц ча́до: и воста́нут ча́да на роди́тели и убию́т их.
И бу́дете ненави́дими все́ми и́мене моего́ ра́ди: претерпе́вый же до конца́, той спасе́н бу́дет.
Егда́ же у́зрите ме́рзость запусте́ния, рече́нную дании́лом проро́ком, стоя́щу, иде́же не подоба́ет: чтый да разуме́ет: тогда́ су́щии во иуде́и да бежа́т на го́ры:Дан 9:27; Мф 24:15; Лк 21:20
и и́же на кро́ве, да не сла́зит в дом, ни да вни́дет взя́ти чесо́ от до́му своего́:
и и́же на селе́ сый, да не возврати́тся вспять взя́ти ри́зу свою́.
Го́ре же непра́здным и доя́щым в ты́я дни.
Моли́теся же, да не бу́дет бе́гство ва́ше в зиме́.
Бу́дут бо дни́е ти́и скорбь, якова́ не бысть такова́ от нача́ла созда́ния, е́же созда́ бог, доны́не, и не бу́дет.
И а́ще не бы госпо́дь прекрати́л дний, не бы у́бо спасла́ся вся́ка плоть: но избра́нных ра́ди, и́хже избра́, прекрати́т дни.
Тогда́ а́ще кто рече́т вам: се, зде христо́с, или́: се, о́нде: не ими́те ве́ры.Мф 24:23; Лк 17:23
Воста́нут бо лжехри́сти и лжепроро́цы и дадя́т зна́мения и чудеса́, е́же прельсти́ти, а́ще возмо́жно, и избра́нныя.
Вы же блюди́теся: се, пре́жде рех вам вся.
Но в ты́я дни, по ско́рби той, со́лнце поме́ркнет, и луна́ не даст све́та своего́,Ис 13:10; Иез 32:7; Иоил 2:31; Мф 24:29; Лк 21:25
и зве́зды бу́дут с небесе́ спа́дающя, и си́лы, я́же на небесе́х, подви́жутся.
И тогда́ у́зрят сы́на челове́ческаго гряду́ща на о́блацех с си́лою и сла́вою мно́гою.Мф 24:30; Откр 1:7
И тогда́ по́слет а́нгелы своя́ и собере́т избра́нныя своя́ от четы́рех ветр, от конца́ земли́ до конца́ не́ба.
От смоко́вницы же научи́теся при́тчи: егда́ уже́ ве́твие ея́ бу́дет мла́до и израща́ет ли́ствие, ве́дите, я́ко близ есть жа́тва:
та́ко и вы, егда́ сия́ ви́дите быва́юща, ве́дите, я́ко близ есть, при две́рех.
Ами́нь глаго́лю вам, я́ко не и́мать прейти́ род сей, до́ндеже вся сия́ бу́дут.Мф 24:34
Не́бо и земля́ пре́йдут, словеса́ же моя́ не пре́йдут.
О дни же том или́ о часе́ никто́же весть, ни а́нгели, и́же суть на небесе́х, ни сын, то́кмо оте́ц.
Блюди́те, бди́те и моли́теся: не ве́сте бо, когда́ вре́мя бу́дет.Мф 24:42; Мф 25:13
Я́коже челове́к отходя́ оста́вль дом свой, и дав рабо́м свои́м власть, и кому́ждо де́ло свое́, и вратарю́ повеле́, да бдит.
Бди́те у́бо: не ве́сте бо, когда́ госпо́дь до́му прии́дет, ве́чер, или́ полу́нощи, или́ в петлоглаше́ние, или́ у́тро:
да не прише́д внеза́пу, обря́щет вы спя́щя.
А я́же вам глаго́лю, всем глаго́лю: бди́те.