Ин Иоанна, глава От Иоанна святое благовествование, глава 17
Другое письмо: церковнославянский
Сия́ глаго́ла иису́с и возведе́ о́чи свои́ на не́бо и рече́: о́тче, прии́де час: просла́ви сы́на твоего́, да и сын твой просла́вит тя:Ин 12:23
я́коже дал еси́ ему́ власть вся́кия пло́ти, да вся́ко, е́же дал еси́ ему́, даст им живо́т ве́чный:Дан 7:14; Мф 28:18; Евр 2:5
се же есть живо́т ве́чный, да зна́ют тебе́ еди́наго и́стиннаго бо́га, и его́же посла́л еси́ иису́с христа́.Ин 6:29; 1Ин 3:23
Аз просла́вих тя на земли́, де́ло соверши́х, е́же дал еси́ мне да сотворю́:
и ны́не просла́ви мя ты, о́тче, у тебе́ самого́ сла́вою, ю́же име́х у тебе́ пре́жде мир не бысть.Откр 5:12
Яви́х и́мя твое́ челове́ком, и́хже дал еси́ мне от ми́ра: твои́ бе́ша, и мне их дал еси́, и сло́во твое́ сохрани́ша:Ин 18:9
ны́не разуме́ша, я́ко вся, ели́ка дал еси́ мне, от тебе́ суть:
я́ко глаго́лы, и́хже дал еси́ мне, дах им, и ти́и прия́ша, и разуме́ша вои́стинну, я́ко от тебе́ изыдо́х, и ве́роваша, я́ко ты мя посла́л еси́.Ин 16:27
Аз о сих молю́: не о (всем) ми́ре молю́, но о тех, и́хже дал еси́ мне, я́ко твои́ суть:
и моя́ вся твоя́ суть, и твоя́ моя́: и просла́вихся в них:Ин 16:15
и ктому́ несмь в ми́ре, и си́и в ми́ре суть, и аз к тебе́ гряду́. О́тче святы́й, соблюди́ их во и́мя твое́, и́хже дал еси́ мне, да бу́дут еди́но, я́коже (и) мы.Ин 10:30; Еф 4:3
Егда́ бех с ни́ми в ми́ре, аз соблюда́х их во и́мя твое́: и́хже дал еси́ мне, сохрани́х, и никто́же от них поги́бе, то́кмо сын поги́бельный, да сбу́дется писа́ние:Пс 108:17; Пс 108:8; Ин 18:9
ны́не же к тебе́ гряду́, и сия́ глаго́лю в ми́ре, да и́мут ра́дость мою́ испо́лнену в себе́.
Аз дах им сло́во твое́, и мир возненави́де их, я́ко не суть от ми́ра, я́коже (и) аз от ми́ра несмь:Ин 8:23
не молю́, да во́змеши их от ми́ра, но да соблюде́ши их от неприя́зни:
от ми́ра не суть, я́коже (и) аз от ми́ра несмь:
святи́ их во и́стину твою́: сло́во твое́ и́стина есть.Пс 118:142; Ин 14:6
Я́коже мене́ посла́л еси́ в мир, и аз посла́х их в мир,Ис 61:1
и за них аз свящу́ себе́, да и ти́и бу́дут свяще́ни во и́стину.Евр 9:14
Не о сих же молю́ то́кмо, но и о ве́рующих словесе́ их ра́ди в мя,
да вси еди́но бу́дут: я́коже ты, о́тче, во мне, и аз в тебе́, да и ти́и в нас еди́но бу́дут: да (и) мир ве́ру и́мет, я́ко ты мя посла́л еси́:Ин 17:11
и аз сла́ву, ю́же дал еси́ мне, дах им: да бу́дут еди́но, я́коже мы еди́но есма́:
аз в них, и ты во мне: да бу́дут соверше́ни во еди́но, и да разуме́ет мир, я́ко ты мя посла́л еси́ и возлюби́л еси́ их, я́коже мене́ возлюби́л еси́.
О́тче, и́хже дал еси́ мне, хощу́, да иде́же есмь аз, и ти́и бу́дут со мно́ю, да ви́дят сла́ву мою́, ю́же дал еси́ мне, я́ко возлюби́л мя еси́ пре́жде сложе́ния ми́ра.Ин 12:26
О́тче пра́ведный, и мир тебе́ не позна́, аз же тя позна́х, и си́и позна́ша, я́ко ты мя посла́л еси́:
и сказа́х им и́мя твое́, и скажу́, да любы́, е́юже мя еси́ возлюби́л, в них бу́дет, и аз в них.Ин 15:15