Ин Иоанна, глава От Иоанна святое благовествование, глава 19
Другое письмо: церковнославянский
Тогда́ у́бо пила́т поя́т иису́са, и би (его́):Мф 27:26; Мк 15:15
и во́ини спле́тше вене́ц от те́рния, возложи́ша ему́ на главу́, и в ри́зу багря́ну облеко́ша его́,
и глаго́лаху: ра́дуйся, царю́ иуде́йский. И бия́ху его́ по лани́тома.
Изы́де у́бо па́ки вон пила́т, и глаго́ла им: се, извожду́ его́ вам вон, да разуме́ете, я́ко в нем ни еди́ныя вины́ обрета́ю.Ин 18:38; Деян 3:13
Изы́де же вон иису́с, нося́ терно́вен вене́ц и багря́ну ри́зу. И глаго́ла им: се, челове́к.
Егда́ же ви́деша его́ архиере́е и слуги́, возопи́ша глаго́люще: распни́, распни́ его́. Глаго́ла им пила́т: поими́те его́ вы, и распни́те, аз бо не обрета́ю в нем вины́.Мф 27:23; Мк 15:14; Лк 23:4; Деян 13:28
Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко себе́ сы́на бо́жия сотвори́.Втор 18:20
Егда́ у́бо слы́ша пила́т сие́ сло́во, па́че убоя́ся,
и вни́де в прето́р па́ки, и глаго́ла иису́сови: отку́ду еси́ ты? Иису́с же отве́та не даде́ ему́.Ис 53:7; Ин 18:33
Глаго́ла же ему́ пила́т: мне ли не глаго́леши? не ве́си ли, я́ко власть и́мам распя́ти тя и власть и́мам пусти́ти тя?
Отвеща́ иису́с: не и́маши вла́сти ни еди́ныя на мне, а́ще не бы ти дано́ свы́ше: сего́ ра́ди преда́вый мя тебе́ бо́лий грех и́мать.Лк 22:53
От сего́ иска́ше пила́т пусти́ти его́. Иуде́е же вопия́ху, глаго́люще: а́ще сего́ пу́стиши, не́си друг ке́сарев: всяк, и́же царя́ себе́ твори́т, проти́вится ке́сарю.
Пила́т у́бо слы́шав сие́ сло́во, изведе́ вон иису́са и се́де на суди́щи, на ме́сте глаго́лемем лифострото́н, евре́йски же гавва́фа.
Бе же пято́к па́сце, час же я́ко шесты́й. И глаго́ла иуде́ом: се, царь ваш.
Они́ же вопия́ху: возми́, возми́, распни́ его́. Глаго́ла им пила́т: царя́ ли ва́шего распну́? Отвеща́ша архиере́е: не и́мамы царя́ то́кмо ке́саря.
Тогда́ у́бо предаде́ его́ им, да ра́спнется. Пое́мше же иису́са и ведо́ша:
и нося́ крест свои́, изы́де на глаго́лемое ло́бное ме́сто, е́же глаго́лется евре́йски голго́фа,Мф 27:33; Мк 15:22; Лк 23:33; Евр 13:12
иде́же пропя́ша его́, и с ним и́на два сю́ду и сю́ду, посреде́ же иису́са.
Написа́ же и ти́тла пила́т, и положи́ на кресте́. Бе же напи́сано: иису́с назоряни́н, царь иуде́йский.
Сего́ же ти́тла мно́зи что́ша от иуде́й, я́ко близ бе ме́сто гра́да, иде́же пропя́ша иису́са: и бе напи́сано евре́йски, гре́чески, ри́мски.
Глаго́лаху у́бо пила́ту архиере́е иуде́йстии: не пиши́: царь иуде́йский: но я́ко сам рече́: царь есмь иуде́йский.
Отвеща́ пила́т: е́же писа́х, писа́х.
Во́ини же, егда́ пропя́ша иису́са, прия́ша ри́зы его́, и сотвори́ша четы́ри ча́сти, коему́ждо во́ину часть, и хито́н: бе же хито́н нешве́н, свы́ше истка́н весь.Мф 27:35; Мк 15:24; Лк 23:34
Ре́ша же к себе́: не предере́м его́, но ме́тнем жре́бия о нем, кому́ бу́дет: да сбу́дется писа́ние, глаго́лющее: раздели́ша ри́зы моя́ себе́ и о имати́сме мое́й мета́ша жре́бия. Во́ини у́бо сия́ сотвори́ша.Пс 21:19
Стоя́ху же при кресте́ иису́сове ма́ти его́, и сестра́ ма́тере его́, мари́а клео́пова, и мари́а магдали́на.Лк 2:35
Иису́с же ви́дев ма́терь и ученика́ стоя́ща, его́же любля́ше, глаго́ла ма́тери свое́й: же́но, се, сын твой.
Пото́м глаго́ла ученику́: се, ма́ти твоя́. И от того́ часа́ поя́т ю учени́к во своя́ си.
Посе́м ве́дый иису́с, я́ко вся уже́ соверши́шася, да сбу́дется писа́ние, глаго́ла: жа́жду.Пс 68:22; Мф 27:48
Сосу́д же стоя́ше полн о́цта. Они́ же испо́лнивше гу́бу о́цта и на трость во́нзше, приде́ша ко усто́м его́.
Егда́ же прия́т о́цет иису́с, рече́: соверши́шася. И прекло́нь главу́, предаде́ дух.
Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша пила́та, да пребию́т го́лени их и во́змут.Втор 21:23
Приидо́ша же во́ини, и пе́рвому у́бо преби́ша го́лени, и друго́му распя́тому с ним:
на иису́са же прише́дше, я́ко ви́деша его́ уже́ уме́рша, не преби́ша ему́ го́лений,
но еди́н от во́ин копие́м ре́бра ему́ прободе́, и а́бие изы́де кровь и вода́.
И ви́девый свиде́телствова, и и́стинно есть свиде́телство его́, и той весть, я́ко и́стину глаго́лет, да вы ве́ру и́мете.
Бы́ша бо сия́, да сбу́дется писа́ние: кость не сокруши́тся от него́.Исх 12:46; Чис 9:12
И па́ки друго́е писа́ние глаго́лет: воззря́т нань, его́же прободо́ша.Зах 12:10; Откр 1:7
По сих же моли́ пила́та ио́сиф, и́же от аримафе́а, сый учени́к иису́сов, потае́н же стра́ха ра́ди иуде́йска, да во́змет те́ло иису́сово: и повеле́ пила́т. Прии́де же и взят те́ло иису́сово.Мф 27:57; Мк 15:43; Лк 23:50
Прии́де же и никоди́м, прише́дый ко иису́сови но́щию пре́жде, нося́ смеше́ние сми́рнено и ало́йно, я́ко литр сто.Ин 3:2; Ин 7:50
Прия́ста же те́ло иису́сово, и обви́ста е ри́зами со арома́ты, я́коже обы́чай есть иуде́ом погреба́ти.
Бе же на ме́сте, иде́же распя́тся, вертвертогра́д, и в ве́рте гроб нов, в не́мже николи́же никто́же положе́н бе:
ту у́бо пятка́ ра́ди иуде́йска, я́ко близ бя́ше гроб, положи́ста иису́са.