Рим Римлянам, глава Послание к Римлянам, глава 15
Другое письмо: церковнославянский
До́лжни есмы́ мы си́льнии не́мощи немощны́х носи́ти, и не себе́ угожда́ти:Рим 14:1; 1Кор 9:22
ки́иждо же вас бли́жнему да угожда́ет во благо́е к созида́нию.1Кор 10:24
И́бо и христо́с не себе́ угоди́, но я́коже есть пи́сано: поноше́ния понося́щих тебе́ нападо́ша на мя.Пс 68:10
Ели́ка бо преднапи́сана бы́ша, в на́ше наказа́ние преднаписа́шася, да терпе́нием и утеше́нием писа́ний упова́ние и́мамы.Рим 4:23
Бог же терпе́ния и утеше́ния да даст вам то́жде му́дрствовати друг ко дру́гу о христе́ иису́се,1Кор 1:10; Фил 2:2
да единоду́шно еди́ными усты́ сла́вите бо́га и отца́ го́спода на́шего иису́са христа́.
Те́мже прие́млите друг дру́га, я́коже и христо́с прия́т вас во сла́ву бо́жию.Ин 17:24
Глаго́лю же христа́ иису́са служи́теля бы́вша обре́зания по и́стине бо́жией, во е́же утверди́ти обетова́ния отце́в:Деян 3:25; Рим 3:30
а язы́ком по ми́лости, просла́вити бо́га, я́коже есть пи́сано: сего́ ра́ди испове́мся тебе́ во язы́цех, го́споди, и и́мени твоему́ пою́.Пс 17:50; 2Цар 22:50
И па́ки глаго́лет: возвесели́теся, язы́цы, с людьми́ его́.Втор 32:43
И па́ки: хвали́те го́спода, вси язы́цы, и похвали́те его́, вси лю́дие.Пс 116:1
И па́ки иса́иа глаго́лет: бу́дет ко́рень иессе́ов, и востая́й владе́ти над язы́ки: на того́ язы́цы упова́ют.Ис 11:10; Откр 5:5
Бог же упова́ния да испо́лнит вас вся́кия радо́сти и ми́ра в ве́ре, избы́точествовати вам во упова́нии, си́лою ду́ха свята́го.Рим 12:12; Рим 14:17
Извеще́н же есмь, бра́тие моя́, и сам аз о вас, я́ко и са́ми вы по́лни есте́ благости, испо́лнени вся́каго ра́зума, могу́ще и ины́я научи́ти:
де́рзее же писа́х вам, бра́тие моя́, от ча́сти, я́ко воспомина́я вам, за благода́ть да́нную ми от бо́га,
во е́же бы́ти ми служи́телю иису́с христо́ву во язы́цех, священноде́йствующу благовествова́ние бо́жие, да бу́дет приноше́ние е́же от язы́к благоприя́тно и освяще́нно ду́хом святы́м.Ис 66:19; Деян 9:15; Рим 12:2
Има́м у́бо похвалу́ о христе́ иису́се в тех, я́же к бо́гу:
не сме́ю бо глаго́лати что, и́хже не соде́я христо́с мно́ю, в послуша́ние язы́ков, сло́вом и де́лом,
в си́ле зна́мений и чуде́с, си́лою ду́ха бо́жия, я́коже ми от иерусали́ма и о́крест да́же до иллири́ка испо́лнити благовествова́ние христо́во.
Си́це же потща́хся благовести́ти, не иде́же именова́ся христо́с, да не на чуже́м основа́нии сози́жду,1Кор 3:10; 2Кор 10:15
но я́коже есть пи́сано: и́мже не возвести́ся о нем, у́зрят, и и́же не слы́шаша, уразуме́ют.Ис 52:15
Те́мже и возбране́н бых мно́гажды приити́ к вам.Рим 1:13
Ны́не же ктому́ ме́ста не имы́й в страна́х сих, жела́ние же имы́й приити́ к вам от мно́гих лет,1Фес 3:10
я́ко а́ще поиду́ во испа́нию, прииду́ к вам. Упова́ю бо ми́мо гряды́й ви́дети вас и ва́ми проводи́тися та́мо, а́ще вас пре́жде от ча́сти насы́щуся.
Ны́не же гряду́ во иерусали́м, служя́й святы́м,Деян 24:17
благоволи́ша бо македо́ниа и аха́иа обще́ние не́кое сотвори́ти к ни́щым святы́м живу́щым во иерусали́ме.1Кор 16:1; 2Кор 8:4
Благоволи́ша бо, и до́лжни им суть. А́ще бо в духо́вных их прича́стницы бы́ша язы́цы, до́лжни суть и в плотски́х послужи́ти им.1Кор 9:11
Сие́ у́бо сконча́в, и запечатле́в им плод сей, поиду́ ва́ми во испа́нию:
вем же, я́ко гряды́й к вам, во исполне́нии благослове́ния благове́стия христо́ва прииду́.Рим 1:11
Молю́ же вы, бра́тие, го́сподем на́шим иису́с христо́м и любо́вию ду́ха, споспе́шствуйте ми в моли́твах о мне к бо́гу,2Кор 1:11
да изба́влюся от противля́ющихся во иуде́и, и да слу́жба моя́, я́же во иерусали́ме, благоприя́тна бу́дет святы́м:Деян 20:23
да с ра́достию прииду́ к вам во́лею бо́жиею и упоко́юся с ва́ми.Рим 1:10
Бог же ми́ра со все́ми ва́ми. Ами́нь.Рим 16:20; 1Кор 14:33