1Кор 1 Коринфянам, глава Первое послание к Коринфянам, глава 12

Другое письмо: церковнославянский

Переводы Сравнить

О духо́вных же, бра́тие, не хощу́ вас не ве́дети.

Ве́сте, я́ко егда́ неве́рни бе́сте, ко и́долом безгла́сным я́ко ведо́ми ведо́стеся.Еф 2:12

Те́мже сказу́ю вам, я́ко никто́же, ду́хом бо́жиим глаго́ляй, рече́т ана́фема иису́са, и никто́же мо́жет рещи́ го́спода иису́са, то́чию ду́хом святы́м.Мф 16:17; Мк 9:39; Фил 2:11

Разделе́ния же дарова́ний суть, а то́йжде дух:Еф 4:11

и разделе́ния служе́ний суть, а то́йжде госпо́дь:

и разделе́ния действ суть, а то́йжде есть бог, де́йствуяй вся во всех.

Кому́ждо же дае́тся явле́ние ду́ха на по́льзу:Мф 25:15

о́вому бо ду́хом дае́тся сло́во прему́дрости, ино́му же сло́во ра́зума, о то́мже дусе:

друго́му же ве́ра, те́мже ду́хом: ино́му же дарова́ния исцеле́ний, о то́мже дусе:Мк 16:17

друго́му же де́йствия сил, ино́му же проро́чество, друго́му же разсужде́ния духово́м, ино́му же ро́ди язы́ков, друго́му же сказа́ния язы́ков.Деян 2:4

Вся же сия́ де́йствует еди́н и то́йжде дух, разделя́я вла́стию коему́ждо я́коже хо́щет.

Я́коже бо те́ло еди́но есть и у́ды и́мать мно́ги, вси же у́ди еди́наго те́ла, мно́зи су́ще, еди́но суть те́ло: та́ко и христо́с.Рим 12:4

И́бо еди́нем ду́хом мы вси во еди́но те́ло крести́хомся, а́ще иуде́е, а́ще е́ллини, или́ раби́, или́ свобо́дни: и вси еди́нем ду́хом напои́хомся.Мк 1:8; Гал 3:28

И́бо те́ло несть еди́н уд, но мно́зи.

А́ще рече́т нога́, я́ко несмь рука́, несмь от те́ла: еда́ сего́ ра́ди несть от те́ла?

И а́ще рече́т у́хо, я́ко несмь о́ко, несмь от те́ла: еда́ сего́ ра́ди несть от те́ла?

А́ще все те́ло о́ко, где слух? а́ще (же) все слух, где уха́ние?

Ны́не же положи́ бог у́ды, еди́наго коего́ждо их в телеси́, я́коже изво́ли.

А́ще ли бы́ша вси еди́н уд, где те́ло?

Ны́не же мно́зи у́бо у́дове, еди́но же те́ло.

Не мо́жет же о́ко рещи́ руце́: не тре́бе ми еси́: или́ па́ки глава́ нога́ма: не тре́бе ми есте́.

Но мно́го па́че, мня́щиися у́ди те́ла немощне́йши бы́ти, ну́жнейши суть,

и и́хже мним безче́стнейших бы́ти те́ла, сим честь мно́жайшую прилага́ем:

и неблагообра́знии на́ши благообра́зие мно́жайше и́мут, а благообра́знии на́ши не тре́бе и́мут. Но бог раствори́ те́ло, худе́йшему бо́лшу дав честь,

да не бу́дет ра́спри в телеси́, но да то́жде в себе́ (да ра́вно еди́н о друзе́м) пеку́тся у́ди.

И а́ще стра́ждет еди́н уд, с ним стра́ждут вси у́ди: а́ще ли же сла́вится еди́н уд, с ним ра́дуются вси у́ди.

Вы же есте́ те́ло христо́во, и у́ди от ча́сти.Еф 5:23

И о́вых у́бо положи́ бог в це́ркви пе́рвее апо́столов, второ́е проро́ков, тре́тие учи́телей: пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков.Рим 12:6; Еф 4:11

Еда́ вси апо́столи? еда́ вси проро́цы? еда́ вси учи́теле? еда́ вси си́лы?

еда́ вси дарова́ния и́мут исцеле́ний? еда́ вси язы́ки глаго́лют? еда́ вси сказу́ют?

Ревну́йте же дарова́ний бо́лших, и еще́ по превосхожде́нию путь вам показу́ю.