1Кор 1 Коринфянам, глава Первое послание к Коринфянам, глава 14

Другое письмо: церковнославянский

Переводы Сравнить

Держи́теся любве́: ревну́йте же духо́вным, па́че же да проро́чествуете.Чис 11:29

Глаго́ляй бо язы́ки, не челове́ком глаго́лет, но бо́гу: никто́же бо слы́шит, ду́хом же глаго́лет та́йны:

проро́чествуяй же, челове́ком глаго́лет созида́ние и утеше́ние и утвержде́ние.

Глаго́ляй (бо) язы́ки себе́ зи́ждет, а проро́чествуяй це́рковь зи́ждет.

Хощу́ же всех вас глаго́лати язы́ки, па́че же да прорица́ете: бо́лий бо проро́чествуяй, не́жели глаго́ляй язы́ки, ра́зве а́ще (кто) сказу́ет, да це́рковь созида́ние прие́млет.

Ны́не же, бра́тие, а́ще прииду́ к вам язы́ки глаго́ля, ку́ю вам по́льзу сотворю́, а́ще вам не глаго́лю или́ во открове́нии, или́ в ра́зуме, или́ в проро́чествии, или́ в науче́нии?

Оба́че безду́шная глас даю́щая, а́ще сопе́ль, а́ще гу́сли, а́ще ра́знствия писка́нием не дадя́т, ка́ко разу́мно бу́дет писка́ние или́ гуде́ние?

И́бо а́ще безве́стен глас труба́ даст, кто угото́вится на брань?

Та́ко и вы а́ще не благоразу́мно сло́во дадите́ язы́ком, ка́ко уразуме́ется глаго́лемое? Бу́дете бо на возду́х глаго́люще.

Толи́цы у́бо, а́ще ключи́тся, ро́ди гласо́в суть в ми́ре, и ни еди́н их безгла́сен.

А́ще у́бо не уве́м си́лы гла́са, бу́ду глаго́лющему иноязы́чник, и глаго́лющий мне иноязы́чник.

Та́ко и вы, поне́же ревни́теле есте́ духово́м, (я́же) к созида́нию це́ркве проси́теищи́те, да избы́точествуете.

Те́мже глаго́ляй язы́ком да мо́лится, да сказу́ет.

А́ще бо молю́ся язы́ком, дух мой мо́лится, а ум мой без плода́ есть.

Что у́бо есть? Помолю́ся ду́хом, помолю́ся же и умо́м: воспою́ ду́хом, воспою́ же и умо́м.Кол 3:16

Поне́же а́ще благослови́ши ду́хом, исполня́яй ме́сто неве́жды ка́ко рече́т ами́нь, по твоему́ благодаре́нию? Поне́же не весть, что глаго́леши.

Ты у́бо до́бре благодари́ши, но други́й не созида́ется.

Благодарю́ бо́га моего́, па́че всех вас язы́ки глаго́ля:

но в це́ркви хощу́ пять слове́с умо́м мои́м глаго́лати, да и и́ны по́льзую, не́жели тмы слове́с язы́ком.

Бра́тие, не де́ти быва́йте умы́: но зло́бою младе́нствуйте, умы́ же соверше́ни быва́йте.Мф 18:4; Мк 10:14; Рим 16:19

В зако́не пи́шет: я́ко ины́ми язы́ки и устны́ ины́ми возглаго́лю лю́дем сим, и ни та́ко послу́шают мене́, глаго́лет госпо́дь.Ис 28:11

Те́мже язы́цы в зна́мение суть не ве́рующым, но неве́рным: а проро́чество не неве́рным, но ве́рующым.

А́ще у́бо сни́дется це́рковь вся вку́пе, и вси язы́ки глаго́лют, вни́дут же (и) неразу́мивии или́ неве́рнии, не реку́т ли, я́ко бесну́етеся?

А́ще же вси проро́чествуют, вни́дет же не́кий неве́рен или́ неве́жда, облича́ется все́ми, (и) истязу́ется от всех,

и си́це та́йная се́рдца его́ явле́на быва́ют: и та́ко пад ниц покло́нится бо́гови, возвеща́я, я́ко вои́стинну бог с ва́ми есть.Ис 45:14

Что у́бо есть, бра́тие? Егда́ схо́дитеся, ки́йждо вас псало́м и́мать, уче́ние и́мать, язы́к и́мать открове́ние и́мать, сказа́ние и́мать: вся (же) к созида́нию да быва́ют.1Кор 12:8

А́ще язы́ком кто глаго́лет, по двема́, или́ мно́жае по трие́м, и по ча́сти: и еди́н да сказу́ет.

А́ще ли не бу́дет сказа́тель, да молчи́т в це́ркви, себе́ же да глаго́лет и бо́гови.

Проро́цы же два или́ трие́ да глаго́лют, и друзи́и да разсужда́ют:

а́ще ли ино́му откры́ется седя́щу, пе́рвый да молчи́т.

Мо́жете бо вси по еди́ному проро́чествовати, да вси уча́тся и вси утеша́ются.

И ду́си проро́честии проро́ком повину́ются:

несть бо нестрое́ния бог, но ми́ра, я́ко во всех це́рквах святы́х.1Кор 12:25; 1Фес 5:23

Жены́ ва́шя в це́рквах да молча́т: не повеле́ся бо им глаго́лати, но повинова́тися, я́коже и зако́н глаго́лет.Быт 3:16; Кол 3:18; 1Тим 2:11

А́ще ли чесому́ научи́тися хотя́т, в дому́ свои́х муже́й да вопроша́ют: сра́мно бо есть жене́ в це́ркви глаго́лати.

Или́ от вас сло́во бо́жие изы́де? Или́ вас еди́ных дости́же?

А́ще кто мни́тся проро́к бы́ти или́ духо́вен, да разуме́ет, я́же пишу́ вам, зане́ го́сподни суть за́поведи?

а́ще ли кто не разуме́ет, да не разумева́ет.

Те́мже, бра́тие моя́, ревну́йте е́же проро́чествовати, и е́же глаго́лати язы́ки не возбраня́йте:

вся же благообра́зно и по чи́ну да быва́ют.