Gal Galatians, chapter Epistle to the Galatians, chapter 5

Свобо́дою у́бо, е́юже христо́с нас свободи́, сто́йте, и не па́ки под и́гом рабо́ты держи́теся.Act 15:10; 1Pe 2:16

Се аз па́вел глаго́лю вам, я́ко а́ще обре́заетеся, христо́с вас ничто́же по́льзует.Gal 2:21

Свиде́телствую же па́ки вся́кому челове́ку обре́зающемуся, я́ко до́лжен есть весь зако́н твори́ти.

Упраздни́стеся от христа́, и́же зако́ном оправда́етеся, от благода́ти отпадо́сте:

мы бо ду́хом от ве́ры упова́ния пра́вды ждем.Rom 5:5

О христе́ бо иису́се ни обре́зание что мо́жет, ни необре́зание, но ве́ра любо́вию поспе́шествуема.Rom 2:29

Теча́сте до́бре: кто вам возбрани́ не покаря́тися и́стине?

Препре́ние не от призва́вшаго вы.

Мал квас все смеше́ние ква́сит.1Co 5:6

Аз наде́юся о вас в го́споде, я́ко ничто́же и́но разуме́ти бу́дете: смуща́яй же вас понесе́т грех, кто бы ни был.

Аз же, бра́тие, а́ще обре́зание еще́ пропове́дую, почто́ еще́ гони́мь есмь? у́бо упраздни́ся собла́зн креста́.1Co 1:23

О, да́бы отсече́ни бы́ли развраща́ющии вас.

Вы бо на свобо́ду зва́ни бы́сте, бра́тие: то́чию да не свобо́да ва́ша в вину́ пло́ти, но любо́вию рабо́тайте друг дру́гу.1Pe 2:16; 1Co 8:9

И́бо вес зако́н в еди́нем словеси́ исполня́ется, во е́же: возлю́биши бли́жняго твоего́ я́коже себе́.Lev 19:18; Mat 5:43; Mrk 12:31; Jas 2:8; Rom 13:8

А́ще же друг дру́га угрыза́ете и снеда́ете, блюди́теся, да не друг от дру́га истребле́ни бу́дете.

Глаго́лю же: ду́хом ходи́те, и по́хоти плотски́я не соверша́йте:

плоть бо похотству́ет на ду́ха, дух же на плоть: сия́ же друг дру́гу проти́вятся, да не я́же хо́щете, сия́ творите́.1Pe 2:11; Rom 7:23

А́ще ли ду́хом води́ми есте́, не́сте под зако́ном.Rom 6:14

Явле́на же суть дела́ плотска́я, я́же суть прелюбодея́ние, блуд, нечистота́, студодея́ние,1Co 6:9

идолослуже́ние, чародея́ния, вражды́, рве́ния, зави́ды, я́рости, разжже́ния, ра́спри, собла́зны, е́реси,

за́висти, уби́йства, пия́нства, безчи́нни кли́чи и подо́бная сим: я́же предглаго́лю вам, я́коже и предреко́х, я́ко такова́я творя́щии ца́рствия бо́жия не насле́дят.

Плод же духо́вный есть любы́, ра́дость, мир, долготерпе́ние, бла́гость, милосе́рдие, ве́ра,Col 3:12

кро́тость, воздержа́ние: на таковы́х несть зако́на.

А и́же христо́вы суть, плоть распя́ша со страстьми́ и похотьми́.Gal 2:20

А́ще живе́м ду́хом, ду́хом и да хо́дим.

Не быва́им тщесла́вни, друг дру́га раздража́юще, друг дру́гу зави́дяще.Php 2:3