Мц Мацвея, раздзел Паводле Мацвея Святое Дабравесце, раздзел 5
Убачыўшы люд, Ён узышоў на гару; і калі сеў, прыступілі да Яго вучні Ягоныя.
І, адкрыўшы вусны Свае, Ён вучыў іх, кажучы:
Дабрашчасныя ўбогія духам, бо іх ёсьць Царства Нябеснае.Лк 6:20
Дабрашчасныя тыя, што плачуць, бо яны суцешацца.Іс 61:2; Лк 6:21
Дабрашчасныя лагодныя, бо яны ўспадкуюць зямлю.Пс 36:11
Дабрашчасныя тыя, хто жадае і прагне праўды, бо яны спатоляцца.
Дабрашчасныя міласэрныя, бо яны памілаваны будуць.
Дабрашчасныя чыстыя сэрцам, бо яны Бога ўбачаць.Пс 23:4
Дабрашчасныя міратворцы, бо яны сынамі Божымі назавуцца.Габр 12:14
Дабрашчасныя гнаныя за праўду, бо іх ёсьць Царства Нябеснае.1Пётр 3:14
Дабрашчасныя вы, калі будуць вас ганьбіць і гнаць і ўсякім словам ліхім несправядліва зьневажаць за Мяне.Лк 6:22; 1Пётр 4:14
Радуйцеся і весялецеся, бо ўзнагарода ваша вялікая на нябёсах: так гналі прарокаў, што былі перад вамі.Мц 21:35
Вы - соль зямлі. Калі ж соль страціць сілу, дык чым асоліш яе? Яна ўжо ні на што ня прыдатная, хіба што выкінуць яе прэч на патаптаньне людзям.Мк 9:50; Лк 14:34
Вы - сьвятло сьвету: ня можа схавацца горад, які стаіць на версе гары.Флп 2:15
І запаліўшы сьвечку, ня ставяць яе пад пасудзінаю, а на сьвечніку, і сьвеціць усім, хто ў доме.Мк 4:21; Лк 8:16; Лк 11:33
Так няхай сьвеціць сьвятло ваша перад людзьмі, каб яны бачылі вашыя добрыя ўчынкі і ўслаўлялі Айца вашага, Які ёсьць у нябёсах.1Пётр 2:12; Флп 2:15
Ня думайце, што Я прыйшоў парушыць закон, альбо прарокаў: не парушыць прыйшоў Я, а зьдзейсьніць.
Бо праўду кажу вам: пакуль ня мінецца неба і зямля, ані ёта адна, ані рыска адзіная ня мінецца з закона, пакуль ня збудзецца ўсё.Лк 16:17
Дык вось, хто парушыць адну з запаведзяў гэтых найменшых і навучыць гэтак людзей, той найменшым назавецца ў Царстве Нябесным; а хто выканае і навучыць, той вялікім назавецца ў Царстве Нябесным.
Бо, кажу вам, калі праведнасьць ваша не пераважыць праведнасьці кніжнікаў і фарысэяў, дык ня ўвойдзеце вы ў Царства Нябеснае.
Вы чулі, што сказана продкам: «не забівай; а хто заб'е, падпадае суду».Вых 20:13; Дрз 5:17; Мц 19:18; Мк 10:19; Лк 18:20
А Я кажу вам, што кожны, хто гневаецца на брата свайго марна, падпадае суду; хто ж бо скажа брату свайму «пусты чалавек», падпадае сынедрыёну; а хто скажа «неразумны», падпадае геене вогненнай.
Дык вось, калі ты прынясеш дар твой да ахвярніка і ўспомніш там, што брат твой мбе нешта супроць цябе,
пакінь там дар твой перад ахвярнікам, і ідзі сьпярша памірыся з братам тваім, і тады прыйдзі і прынясі дар твой.
Мірыся з праціўнікам тваім хутчэй, пакуль ты яшчэ ў дарозе зь ім, каб не аддаў цябе праціўнік судзьдзі, а судзьдзя не аддаў цябе слузе, і ня ўкінуў цябе ў цямніцу;Лк 12:58
праўду кажу табе: ня выйдзеш адтуль, пакуль не аддасі апошняга кадранта.
Вы чулі, што сказана продкам: «Ня чыні пералюбу».Вых 20:14; Дрз 5:18
А Я вам кажу, што кожны, хто глядзіць на жанчыну з пажадаю, ужо ўчыніў пералюб зь ёю ў сэрцы сваім.
Калі ж правае вока тваё спакушае цябе, вырві яго і кінь ад сябе; бо лепей табе, каб загінуў адзін з чэлесаў тваіх, а ня ўсё цела тваё было ўкінута ў геену.Дрз 13:6; Мц 18:8; Мк 9:43; Мк 9:47
І калі правая твая рука спакушае цябе, адатні яе і кінь ад сябе; бо лепей табе, каб загінуў адзін з чэлесаў тваіх, а ня ўсё цела тваё было ўкінута ў геену.
Сказана таксама, што, калі хто разьвядзецца з жонкаю сваёю, няхай дасьць ёй разводны ліст.Дрз 24:1; Мц 19:7; Мк 10:4; Мк 10:11; Лк 16:18; 1Кар 7:10
А Я вам кажу: кожны, хто разводзіцца з жонкаю сваёю, акрамя як з прычыны распусты, той даводзіць яе да пералюбу; і хто ажэніцца з разьведзенай, той чыніць пералюб.
Зноў жа чулі вы, што сказана продкам: «Не давай ілжывай прысягі, а выконвай прад Госпадам прысягі твае».Ляв 19:12; Дрз 23:21; Вых 20:7
А Я вам кажу: не прысягай зусім: ні небам, бо яно - Трон Божы;
ні зямлёю, бо яна падножжа нагам Ягоным; ні Ерусалімам, бо ён горад Вялікага Цара;
ні галавою тваёю не прысягай, бо ня можаш ніводнай валасінкі зрабіць белаю альбо чорнаю.
А хай будзе слова ваша: «так - так», «не - не»; а што звыш гэтага, тое ад ліхога.Як 5:12
Вы чулі, што сказана: «Вока за вока, і зуб за зуб».Вых 21:24; Ляв 24:20; Дрз 19:21
А Я кажу вам не працівіцца злому. Калі хто цябе ўдарыць па правай шчацэ тваёй, падстаў яму і другую;Лк 6:29; Як 3:13; Рым 12:17; 1Кар 6:7; 1Фес 5:15
і калі хто захоча судзіцца з табою і ўзяць у цябе кашулю, аддай яму і вопратку;
і калі хто цябе змусіць ісьці зь ім адно попрышча, ідзі зь ім два.
Таму, хто просіць у цябе, дай і ад таго, хто хоча пазычыць у цябе, не адварочвайся.Дрз 15:7; Лк 6:34
Вы чулі, што сказана: «Любі блізкага твайго і ненавідзь ворага твайго».Ляв 19:18; Мц 22:39; Мк 12:31; Як 2:8; Рым 13:9
А Я кажу вам: любеце ворагаў вашых, дабраслаўляйце кляцьбітоў вашых, рабеце дабро ненавісьнікам вашым і малецеся за крыўдзіцеляў вашых і за ганіцеляў вашых;Лк 6:27; Лк 23:34; Дзеі 7:60; 1Кар 4:12
каб сталіся вы сынамі Айца вашага, Які ёсьць у нябёсах; бо Ён загадвае сонцу Свайму ўзыходзіць над ліхімі і добрымі і пасылае дождж на праведных і няправедных.Лк 6:35
Бо, калі вы будзеце любіць тых, што любяць вас, якая вам узнагарода? Ці ж ня тое самае робяць і мытнікі?
І калі вы вітаеце братоў вашых толькі, што асаблівага робіце? Ці ж ня гэтак тое самае робяць і язычнікі?
Дык вось, будзьце дасканалыя, як дасканалы Айцец ваш Нябесны.