ЁўJob ЁўJob, раздзелkapitulo Кніга ЁваAng Libro ni Job, раздзелkapitulo 5

Mga hubad Itandi

Дык крычы, калі ёсьць той, хто адкажа табе? Да каго са сьвятых ты зьвернешся?

Бо неразумнага забівае гняўлівасьць, а дурнога губіць зайздрасьць.

Я бачыў, як дурны разжываецца, але ў момант спарахнеў дом ягоны.Пс 37:35

Сыны ягоныя без ратунку, іх топчуць у браме, і няма каму ратаваць іх.

Ураджай ягоны зьесьць галодны, і з-за агароджы схопіць, і прагны праглыне багацьце ягонае.

Ня з пылу бярэцца няшчасьце, і не з зямлі расьце гора.

Але чалавек нараджаецца на пакуты, як зьнічкі — каб падымацца ўгору.Ёў 14:1

Таму я буду прасіць Бога, і да Бога ўзьнясу справу маю.

Ён творыць рэчы недасьледныя і вялікія, і цуды незьлічоныя.Ёў 9:10; Пс 72:18

Ён дае дождж на аблічча зямлі і поіць палеткі вадою.Ёў 36:27; Пс 147:8

Ён падымае прыніжаных высока, і тых, што смуткуюць, суцяшае збаўленьнем.

Ён разьбівае намеры ліхотнікаў, каб не змаглі рукі іхнія выканаць тое, што задумалі.

Ён ловіць хітрых у глупоце іхняй, і змову крывадушнікаў робіць марнай.1Кар 3:19

Удзень падаюць у цемру, і быццам уначы, навобмацак ідуць апоўдні.Дрз 28:29

Ён ратуе беднага ад мяча, і бедака — ад рукі нахабніка.

І ёсьць надзея для ўбогага, а крыўда зачыняе вусны свае.

Шчасьлівы чалавек, якога дакарае Бог; таму навучаньнем Усемагутнага не пагарджай.Выс 3:11; Як 1:12; Габр 12:5; Адкр 3:19

Ён раніць, і Ён лечыць, Ён ударае і аздараўляе Сам рукамі Сваімі.Дрз 32:39

Ад шасьці бедаў збавіць цябе, і ў сёмы раз не кране няшчасьце цябе.Пс 91:10; Іс 43:2

У голад Ён захавае цябе ад сьмерці, і ў час вайны ад мяча ўратуе.Пс 33:19

Усьцеражэшся ты ад языка кусьлівага і ня будзеш баяцца спусташэньня, калі яно прыйдзе.Пс 55:22; Выс 26:22

У час спусташэньня і голаду будзеш ты сьмяяцца і ня будзеш баяцца зьвяроў палявых.

З камянямі палявымі дамова твая, і зьвяры дзікія будуць прыязныя табе.Пс 91:12; Іс 11:6

І ты даведаешся, што намёт твой у супакоі, і, наведваючы жытло тваё, ня знойдзеш нястачы.

І ты ўбачыш, што насеньне тваё шматлікае і нашчадкі твае — быццам трава на зямлі.

І ўвойдзеш у магілу ў гадах сьпелых, як кладзецца сноп пшаніцы ў час свой.

Як мы дасьледавалі гэта, так і ёсьць. Паслухай гэта, і сам зразумееш».