Гал Галатам, раздзел Пасланне да Галатаў, раздзел 5
Дык стойце ж у свабодзе, якую даў нам Хрыстос, і ня схіляйцеся зноў пад ярмо рабства.Дзеі 15:10; 1Пётр 2:16
Вось, я, Павал, кажу вам: калі вы абразаецеся, ня будзе вам ніякае карысьці ад Хрыста.Гал 2:21
Яшчэ сьведчу кожнаму чалавеку, які абразаецца, што ён павінен выконваць увесь закон.
Вы, хто апраўдвае сябе законам, засталіся бяз Хрыста, адпаліся ад мілаты,
а мы духам чакаем і спадзяёмся на праведнасьць ад веры;Рым 5:5
бо ў Хрысьце Ісусе ня мае сілы ні абразаньне, ні неабразаньне, а вера, якая дзее празь любоў.Рым 2:29
Вы ішлі хораша: хто спыніў вас, каб вы не скараліся ісьціне?
Такое перакананьне не ад Таго, Хто заклікае вас.
Каліва закваскі расчыняе ўсё цеста.1Кар 5:6
Я пэўны за вас у Госпадзе, што вы ня будзеце думаць іначай; а той, хто змушчае вас, хто б ён ні быў, панясе на сабе асуду.
За што ж гоняць мяне, браты, калі я і цяпер прапаведую абразаньне? Тады ганьба крыжа спынілася б.1Кар 1:23
О, калі б выдаліць тых, якія баламуцяць вас!
Да вольнасьці закліканы вы, браты, толькі вольнасьць ваша ня была б повадам дагаджаць плоці; а любоўю служэце адно аднаму.1Пётр 2:16; 1Кар 8:9
Бо ўвесь закон у адзін сказ укладваецца: «любі блізкага твайго, як самога сябе».Ляв 19:18; Мц 5:43; Мк 12:31; Як 2:8; Рым 13:8
Калі ж паміж сабою грызяцеся і ясьце адно аднаго, дык глядзеце, каб не панішчылі вы адно аднаго.
Я кажу: рабеце паводле Духа, і вы ня будзеце паддавацца пажадзе плоці;
бо плоць жадае супраціўнага Духу, а Дух - супраціўнага плоці: яны адно аднаму супрацівяцца, так што вы ня тое робіце, чаго хацелі б.1Пётр 2:11; Рым 7:23
Калі ж вас Дух водзіць, дык вы не пад законам.Рым 6:14
Дзеі плоці вядомыя; вось яны: пералюбства, блуд, нечыстата, непатрэбства,1Кар 6:9
ідаласлужэньне, чарадзейства, варожасьць, свары, зайздрасьць, гнеў, звады, раздоры (спакусы), ерасі,
нянавісьць, забойствы, п'янства, закалоты і іншае такое; папярэджваю вас, як і раней папярэджваў, што тыя, хто робіць так, Царства Божага не ўспадкуюць.
А плод Духа: любоў, радасьць, згода, доўгая цярплівасьць, добрасьць, міласэрнасьць, вера,Кал 3:12
лагоднасьць, устрымлівасьць. На такіх няма закона.
А тыя, якія Хрыстовыя, укрыжавалі цела з пажадлівасьцю і пахацінствамі.Гал 2:20
Калі мы жывём Духам, дык згодна з Духам і рабіць павінны.
Ня будзем пустаславіцца, адно аднаго дражніць, адно аднаму зайздросьціць.Флп 2:3