Jhn Jan, kapitola Evangelium podle Jana, kapitola 10

Ами́нь, ами́нь глаго́лю вам: не входя́й две́рьми во двор о́вчий, но прела́зя и́нуде, той тать есть и разбо́йник:

а входя́й две́рьми па́стырь есть овца́м:

сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их:

и егда́ своя́ о́вцы иждене́т, пред ни́ми хо́дит: и о́вцы по нем и́дут, я́ко ве́дят глас его́:

по чужде́м же не и́дут, но бежа́т от него́, я́ко не зна́ют чужда́го гла́са.

Сию́ при́тчу рече́ им иису́с: они́ же не разуме́ша, что бя́ше, я́же глаго́лаше им.

Рече́ же па́ки им иису́с: ами́нь, ами́нь глаго́лю вам, я́ко аз есмь дверь овца́м.

Вси, ели́ко (их) прии́де пре́жде мене́, та́тие суть и разбо́йницы: но не послу́шаша их о́вцы.Jer 23:1; Jer 50:6; Ezk 34:2

Аз есмь дверь: мно́ю а́ще кто вни́дет, спасе́тся: и вни́дет и изы́дет, и па́жить обря́щет.Psa 22:2

Тать не прихо́дит, ра́зве да укра́дет и убие́т и погуби́т: аз приидо́х, да живо́т и́мут и ли́шше и́мут.

Аз есмь па́стырь до́брый: па́стырь до́брый ду́шу свою́ полага́ет за о́вцы:Psa 22:1; Isa 40:11; Ezk 34:13; Ezk 37:24; 1Pe 2:25; 1Pe 5:4

а нае́мник, и́же несть па́стырь, ему́же не суть о́вцы своя́, ви́дит во́лка гряду́ща, и оставля́ет о́вцы, и бе́гает: и волк расхи́тит их, и распу́дит о́вцы:

а нае́мник бежи́т, я́ко нае́мник есть, и неради́т о овца́х.

Аз есмь па́стырь до́брый: и зна́ю моя́, и зна́ют мя моя́:Ezk 34:11; 2Ti 2:19

я́коже зна́ет мя оте́ц, и аз зна́ю отца́: и ду́шу мою́ полага́ю за о́вцы.

И и́ны о́вцы и́мам, я́же не суть от двора́ сего́: и ты́я ми подоба́ет привести́, и глас мой услы́шат: и бу́дет еди́но ста́до и еди́н па́стырь.Ezk 37:22

Сего́ ра́ди мя оте́ц лю́бит, я́ко аз ду́шу мою́ полага́ю, да па́ки прииму́ ю:Isa 53:11

никто́же во́змет ю от мене́, но аз полага́ю ю о себе́: о́бласть и́мам положи́ти ю, и о́бласть и́мам па́ки прия́ти ю. Сию́ за́поведь прия́х от отца́ моего́.Jhn 2:19; Jhn 14:31

Ра́спря же па́ки бысть во иуде́ех за словеса́ сия́.

Глаго́лаху же мно́зи от них: бе́са и́мать и неи́стов есть: что его́ послу́шаете?Mrk 3:21; Jhn 7:20

Ини́и глаго́лаху: сии́ глаго́ли не суть бесну́ющагося: еда́ мо́жет бес слепы́м о́чи отве́рсти?

Бы́ша же (тогда́) обновле́ния во иерусали́мех, и зима́ бе.1Ma 4:59

И хожда́ше иису́с в це́ркви, в притво́ре соломо́ни.

Обыдо́ша же его́ иуде́е, и глаго́лаху ему́: доко́ле ду́шы на́шя взе́млеши, а́ще ты еси́ христо́с, рцы нам не обину́яся.

Отвеща́ им иису́с: рех вам, и не ве́руете: дела́, я́же аз творю́ о и́мени отца́ моего́, та свиде́телствуют о мне:Jhn 5:36

но вы не ве́руете: не́сте бо от ове́ц мои́х, я́коже рех вам:Jhn 8:19; 1Jn 4:6

о́вцы моя́ гла́са моего́ слу́шают, и аз зна́ю их, и по мне гряду́т:

и аз живо́т ве́чный дам им, и не поги́бнут во ве́ки, и не восхи́тит их никто́же от руки́ моея́:

оте́ц мой, и́же даде́ мне, бо́лий всех есть: и никто́же мо́жет восхи́тити их от руки́ отца́ моего́:Deu 33:3

аз и оте́ц еди́но есма́.

Взя́ша же ка́мение па́ки иуде́е, да побию́т его́.Jhn 5:18

Отвеща́ им иису́с: мно́га добра́ дела́ яви́х вам от отца́ моего́: за ко́е их де́ло ка́мение ме́щете на мя?

Отвеща́ша ему́ иуде́е, глаго́люще: о добре́ де́ле ка́мение не ме́щем на тя, но о хуле́, я́ко ты, челове́к сый, твори́ши себе́ бо́га.

Отвеща́ им иису́с: несть ли пи́сано в зако́не ва́шем: аз рех: бо́зи есте́?Psa 81:6

А́ще о́ных рече́ бого́в, к ни́мже сло́во бо́жие бысть, и не мо́жет разори́тися писа́ние:

его́же оте́ц святи́ и посла́ в мир, вы глаго́лете, я́ко хулу́ глаго́леши, зане́ рех: сын бо́жий есмь.Jhn 6:27

А́ще не творю́ дела́ отца́ моего́, не ими́те ми ве́ры:

а́ще ли творю́, а́ще и мне не ве́руете, дело́м (мои́м) ве́руйте: да разуме́ете и ве́руете, я́ко во мне оте́ц, и аз в нем.Jhn 14:10; Jhn 17:21

Иска́ху у́бо па́ки я́ти его́: и изы́де от рук их,

и и́де па́ки на он пол иорда́на, на ме́сто, иде́же бе иоа́нн пре́жде крестя́: и пребы́сть ту.Jhn 1:28

И мно́зи приидо́ша к нему́, и глаго́лаху, я́ко иоа́нн у́бо зна́мения не сотвори́ ни еди́наго: вся же, ели́ка рече́ иоа́нн о сем, и́стинна бя́ху.Jhn 5:33

И мно́зи ве́роваша в него́ ту.