Jer Ieremia, capitolul Cartea profetului Ieremia, capitolul 21

Сло́во, е́же бысть от го́спода ко иереми́и, егда́ посла́ к нему́ царь седеки́а пасхо́ра сы́на мелхи́ина и софо́нию сы́на васаи́ева, свяще́нника, глаго́ля:1Ch 24:9

вопроси́ о нас го́спода, я́ко навуходоно́сор царь вавило́нский воста́ на нас: сотвори́т ли госпо́дь с на́ми по всем чудесе́м свои́м, и оти́дет от нас?

И рече́ иереми́а к ним: та́ко рцы́те седеки́и: сия́ глаго́лет госпо́дь бог изра́илев:

се, аз обраща́ю ору́жия бра́нная, я́же суть в рука́х ва́ших, и́миже вы ополча́етеся на царя́ вавило́нска и халде́йска, и́же обстоя́т вас о́крест вне стен: и соберу́ та посреде́ гра́да сего́,

и поборю́ аз по вас руко́ю просте́ртою и мы́шцею кре́пкою с я́ростию и гне́вом вели́ким,Exo 6:6; Deu 5:15; Jer 32:21

и побию́ всех обита́ющих во гра́де сем, челове́ки и скоты́, губи́телством вели́ким, и и́змрут.

И по сих, та́ко глаго́лет госпо́дь, дам седеки́ю царя́ иу́дина и рабы́ его́, и лю́ди его́ и оста́вльшыяся во гра́де сем от губи́телства и гла́да и меча́, в руку́ навуходоно́сора царя́ вавило́нска и в руку́ враго́в их и в руку́ и́щущих душ их, и побие́т их о́стрием меча́: и не пощажу́ их, ниже́ ми́лостив бу́ду им.Jer 20:4; Jer 34:2; Exo 4:19

И к лю́дем сим рече́ши: сия́ глаго́лет госпо́дь: се, аз даю́ пред ва́ми путь живота́ и путь сме́рти:Sir 15:17

и́же обита́ет во гра́де сем, у́мрет мече́м и гла́дом и губи́телством, а исходя́й, и́же прибежи́т ко халде́ом обстоя́щым вас, жив бу́дет, и бу́дет душа́ его́ в плен, и жив бу́дет.Jer 38:2; Jer 45:5

Утверди́х бо лице́ мое́ на град сей во зла́я, а не во блага́я, рече́ госпо́дь: в ру́ки царя́ вавило́нска преда́стся, и сожже́т его́ огне́м.Lev 17:10; Jer 32:29; Jer 34:2

До́ме царя́ иу́дина, слы́шите сло́во го́сподне:

до́ме дави́дов, сия́ глаго́лет госпо́дь: суди́те зау́тра суд и испра́вите, и изба́вите си́лою угнете́наго от руки́ оби́дящаго и, да не зажже́тся я́ко огнь я́рость моя́ и возгори́тся, и не бу́дет угаша́ющаго, ра́ди лука́вых умышле́ний ва́ших.Jer 4:4; Jer 22:3

Се, аз к тебе́ обита́ющему во кре́пце и по́льне удо́лии, рече́ госпо́дь, и́же глаго́лете: кто побие́т нас? или́ кто вни́дет в до́мы на́шя?Jer 49:4; Ezk 11:15

И посещу́ на вас по лука́вым начина́нием ва́шым, рече́ госпо́дь, и возжгу́ огнь в ле́се его́, и поя́ст вся, я́же о́крест его́.Jer 17:27; Jer 22:7