Пс Псалтыр, псалом Псалтыр, псалом 68
Кіроўцу хору. На шошаніме. Псальма Давідава.
Ратуй мяне, Божа; бо воды дайшлі да душы маёй.Іс 43:2
Я заграз у глыбокай багне, і няма на чым стаць; увайшоў у глыбіні водаў, і хуткая плынь іх панесла мяне.Пс 39:3; Пс 41:8
Я зьнямог ад крыку; засьмягла горла маё; стаміліся вочы мае, выглядаючы Бога майго.
Тых, што ненавідзяць мяне бязь віны, болей, чым валос на маёй галаве: ворагі мае, што бязьвінна мяне перасьледуюць, набраліся сілы; чаго я не адбіраў, тое мушу аддаць.Пс 34:19; Іс 53:4; Езк 33:15
Божа! Ты ведаеш дурасьць маю, і грахі мае ад цябе не схаваны.
Хай не пасаромяцца празь мяне тыя, што на Цябе спадзяюцца, Госпадзе, Божа сілы. Хай не пасаромяцца празь мяне тыя, што шукаюць Цябе, Божа Ізраілеў;
бо дзеля Цябе я цярплю зьнявагу, і ганьбаю пакрываюць аблічча маё.
Счужынеў я братам маім, чужынцам зрабіўся сынам маці маёй,
бо клопат па доме Тваім пажырае мяне, і ліхаслоўе тых, што Цябе ліхасловяць, падае на мяне,Ян 2:17; Рым 15:3
і постам выплакаў я душу маю, і гэта робяць зьнявагаю мне.
І замест вопраткі я на сябе нацягнуў валасяніцу - і раблюся ім прытчаю;
і пра мяне балабоняць, седзячы каля брамы, і сьпяваюць у песьнях тыя, што п'юць віно.Ёў 30:9
А я з малітвай маёю да Цябе, Госпадзе; у час добрай зычлівасьці, Божа, па вялікай даброці Тваёй, пачуй мяне ў праўдзе ратунку Твайго;Іс 49:8
дастань мяне з багавіньня, каб не загразнуў я: хай я вызвалюся ад ненавісьнікаў маіх і ад глыбокіх водаў;Пс 39:3
хай не пацягне мяне цячэньне вады, хай не паглыне мяне багна, хай не замкне нада мною прорва пашчы свае.
Пачуй мяне, Госпадзе, бо добрая міласьць Твая; у мностве шчадротаў Тваіх дагледзь мяне,
не хавай твару Твайго ад раба Твайго, бо я смуткую; хутка пачуеш мяне;Пс 101:3
Наблізься да душы маёй, вызваль яе; дзеля ворагаў маіх уратуй мяне.
Ты ведаеш паганьбеньне маё, сорам мой і агуду маю; ворагі мае ўсе прад Табою.Пс 43:16
Маё сэрца зламала агуда, і я зьнямогся; чакаў спагады, але няма яе - і спагадцаў, ды не знаходжу.Мц 27:39; Лк 23:49
І далі мне за ежу жоўць, і ў смазе маёй воцатам напаілі мяне.Мц 27:34; Мц 27:48; Ян 19:29
Няхай стане трапеза іхняя сеткаю ім, і мірнае застольле іхняе - пасткаю;Рым 11:9
няхай запамрочацца іхнія вочы, каб ім ня бачыць, і сьцёгны расслабі ім назаўсёды;
вылі на іх лютасьць Тваю, і полымя гневу Твайго хай абдыме іх;
селішча іхняе няхай запусьцее, і ў палатках іхніх хай ніхто ня жыве,Дзеі 1:20
бо, каго Ты забіў, яны яшчэ перасьледуюць, і пакуты Табою параненых памнажаюць.Іс 53:4
Прыкладзі беззаконьне да іхняга беззаконьня, і хай ня ўвойдуць яны ў праўду Тваю;Рым 1:28
няхай скрэсьлены будуць з кнігі жывых, і хай ня будуць запісаны з праведнымі.Лк 10:20; Флп 4:3; Адкр 3:5
А я бедны і пакутую; дапамога Твая, Божа, хай адродзіць мяне.
Я буду славіць імя Бога майго ў песьні, буду ўзьвялічваць яго праслаўленьнем,
і будзе гэта даспадобы Госпаду болей, чым вол, чым цяля з рагамі і з капытамі.
Угледзяць гэта спрагненыя, і зарадуюцца. І ажыве сэрца ваша, богашукальнікі;Пс 21:27
бо Гасподзь чуе ўбогіх і не пагарджае вязьнямі Сваімі.Пс 33:7
Хай праславяць Яго зямля і нябёсы, моры, і ўсё рухомае ў іх,Пс 147:1
бо ўратуе Бог Сіён, створыць гарады Юдавыя, і паселяцца там, і ўспадкуюць яго,1Кар 3:10
і нашчадкі рабоў Ягоных умацуюцца ў ім, і тыя, што любяць імя Ягонае, сяліцца ў ім будуць.