Выс Выслоўі, раздзел Кніга выслоўяў Саламонавых, раздзел 10
Выслоўі Саламона. Сын мудры радуе бацьку, а сын бязглузды - засмучэньне маці ягонай.Выс 15:20
Не даюць карысьці скарбы няправедныя, а праўда ратуе ад сьмерці.Выс 11:4; Ёў 20:20
Не дапусьціць Гасподзь, каб галадала душа праведнага, а зьдзірства бязбожных адкіне.Пс 32:19; Іс 49:26
Лянівая рука робіць бедным, а рука руплівая ўзбагачае.Выс 21:5
Хто зьбірае летам - сын разумны, а хто сьпіць у жніва - сын шалапутны.
Дабраславеньні - на галаву праведнага, а вусны бязбожным затуліць насільле.
Памяць пра праведнага дабраславёная будзе, а імя бязбожных спаганьбіцца.Пс 111:6; Мц 26:13
Мудры сэрцам прымае запаведзі, а бязглузды вуснамі спатыкнецца.Пс 140:5; Як 3:17
Хто ходзіць у беззаганнасьці, той ходзіць бясьпечна; а хто скрыўляе шляхі свае, той будзе выкрыты.
Хто міргае вачыма, той чыніць прыкрасьць, а бязглузды вуснамі спатыкнецца.Выс 6:13
Вусны праведніка - крыніца жыцьця, а вусны бязбожным затуліць насільле.
Нянавісьць будзіць разлад, любоў акупае ўсе грахі.1Пётр 4:8; 1Кар 3:4
На вуснах у разумнага мудрасьць, а на целе ў дурнога - дубец.
Мудрыя зьберагаюць веды, а вусны немысьля - блізкая пагібель.
Маёмасьць багатага - моцны горад яго, бяда бедным - іхняе ўбоства.Выс 18:10
Праца праведнага - на жыцьцё, прыбытак бязбожнага - на грэх.
Хто захоўвае настаўленьне, той на дарозе да жыцьця; а хто пагарджае засьцярогай - блукае.Выс 12:1
Хто хавае нянавісьць, у таго вусны ілжывыя; і хто пашырае паклёпы - неразумны.
Пры шматслоўі ня ўнікнуць грэху, а хто стрымлівае вусны свае - разумны.Экл 10:14
Чыстае срэбра - язык праведнага, а сэрца бязбожных - нікчэма.
Вусны праведнага пасьвяць многіх, а неразумныя мруць ад нястачы глузду.Мц 12:35
Дабраславеньне Гасподняе - яно ўзбагачае і смутку з сабой ня прыносіць.
Радуе немысьля - учынак ганебны, а чалавека разумнага - мудрасьць.
Чаго баіцца бязбожнік, тое спасьцігне яго, а жаданьне праведнікаў збудзецца.
Як падымецца бура, так і няма бязбожнага; а ў праведніка - аснова вечная.Пс 36:36
Што воцат зубам і дым вачам, тое гультай тым, хто пасылае яго.
Страх Гасподні дадае дзён, а гады бязбожных скароцяцца.
Спадзяваньне праведнікам - радасьць, а надзея бязбожных загіне.Ёў 8:13; Пс 111:10
Шлях Гасподні - цьвярдыня нявінным і пагібель бязбожным.
Праведнік вавек не пахісьнецца, а бязбожныя не пажывуць на зямлі.
З вуснаў праведніка крынічыць мудрасьць, а язык шкодлівы будзе вырваны.
Вусны праведніка любяць богаспадобнае, а вусны бязбожных - разбэшчанае.