Amos 1 sa lain-laing mga hubad
Ang Pulong sa Dios
1:1
APD
Mao kini ang mensahe ni Amos, nga usa ka magbalantay sa mga karnero nga taga-Tekoa, mahitungod sa Israel. Gipadayag kini kaniya sa Dios duha ka tuig sa wala pa mahitabo ang linog, ug sa panahon nga si Uzias mao ang hari sa Juda ug si Jeroboam nga anak ni Joas mao ang hari sa Israel.
1:2
APD
Miingon siya, “Nagdahunog ang tingog sa Ginoo gikan sa Zion; naglanog kini gikan sa Jerusalem. Ug tungod niini nangalaya ang mga sagbot sa sibsiban sa mga magbalantay sa mga karnero apil ang mga tanom sa ibabaw sa Bukid sa Carmel.”
1:3
APD
Mao kini ang gisulti sa Ginoo bahin sa Siria: “Tungod sa padayon nga pagpakasala sa mga taga-Damasco, silotan ko gayod sila. Gipasipad-an nila pag-ayo ang mga taga-Gilead,
1:4
APD
busa sunogon ko ang palasyo ni Haring Hazael ug ang lig-ong mga bahin niini nga gipahimo sa iyang anak nga si Ben Hadad.
1:5
APD
Gub-on ko ang pultahan sa Damasco ug laglagon ko ang hari sa Walog sa Aven ug ang hari sa Bet Eden. Bihagon ngadto sa Kir ang mga katawhan sa Siria. Ako, ang Ginoo, ang nag-ingon niini.”
1:6
APD
Mao kini ang gisulti sa Ginoo bahin sa Filistia: “Tungod sa padayon nga pagpakasala sa mga taga-Gaza, silotan ko gayod sila. Gibihag nila ang tanang mga tawo sa mga lungsod ug gibaligya isip mga ulipon sa Edom,
1:7
APD
busa sunogon ko ang mga paril sa Gaza apil ang lig-ong mga bahin niini.
1:8
APD
Laglagon ko ang hari sa Ashdod ug ang hari sa Ashkelon, ug silotan ko ang mga taga-Ekron. Ang mga Filistihanon nga mabilin mangamatay usab. Ako, ang Ginoong Dios, ang nag-ingon niini.”
1:9
APD
Mao kini ang gisulti sa Ginoo bahin sa Tiro: “Tungod sa padayon nga pagpakasala sa mga taga-Tiro, silotan ko gayod sila. Gibaligya nila isip mga ulipon sa Edom ang tanang mga tawo sa mga lungsod, ug wala nila tumana ang ilang kasabotan uban niining mga tawhana ingon nga managhigala.
1:10
APD
Busa sunogon ko ang mga paril sa Tiro apil ang lig-ong mga bahin niini.”
1:11
APD
Mao kini ang gisulti sa Ginoo bahin sa Edom: “Tungod sa padayon nga pagpakasala sa mga taga-Edom, silotan ko gayod sila. Gipanggukod nila ang ilang mga kadugo nga Israelinhon ug gipangpatay, ug wala nila kini kaloy-i. Dili gayod mawala ang ilang kasuko sa mga Israelinhon.
1:12
APD
Busa sunogon ko ang Teman apil ang lig-ong mga bahin sa Bozra.”
1:13
APD
Mao kini ang gisulti sa Ginoo bahin sa Amon: “Tungod sa padayon nga pagpakasala sa mga taga-Amon, silotan ko gayod sila. Gipanglaplapan nila ang tiyan sa mga babayeng mabdos sa Gilead aron lang maangkon kining yutaa.
1:14
APD
Busa sunogon ko ang mga paril sa Raba apil ang lig-ong mga bahin niini. Madungog ang pagsinggit sa ilang mga kaaway nga nagsulong kanila nga daw naghaguros nga bagyo.
1:15
APD
Bihagon ang hari sa Ammon apil ang iyang mga opisyal. Ako, ang Ginoo, ang nag-ingon niini.”