2Цім 2 Цімафею, раздзел Другое пасланне да Цімафея, раздзел 4
Дык, заклінаю цябе перад Богам і Госпадам (нашым) Ісусам Хрыстом, Які будзе судзіць жывых і мёртвых у прышэсьце Ягонае і Царстве Ягоным:Ян 5:22; Дзеі 10:42
прапаведуй слова, настаўляй у час і ня ў час, выкрывай, забараняй, умаўляй доўга з поўнай цярплівасьцю і настаўленьнем.2Цім 2:24; 2Цім 3:16
Бо будзе час, калі здаровага вучэньня прымаць ня будуць, а паводле сваіх прыхамацяў будуць выбіраць сабе настаўнікаў, лісьлівых слыху;
і ад ісьціны адвернуць вушы і прыгорнуцца да баек.
Але ты будзь пільны ва ўсім, цярпі скрушнасьць, выконвай справу дабравесьніка, выконвай служэньне тваё.
Бо я ўжо раблюся ахвяраю, і час майго ўшэсьця настаў.Флп 2:17
Подзьвігам добрым я змагаўся, шлях закончыў, веру захаваў;Флп 3:14; 1Цім 6:12
а цяпер рыхтуецца мне вянок праўды, які дасьць мне Гасподзь, справядлівы Судзьдзя, у дзень той; і ня толькі мне, але і ўсім, што палюбілі прышэсьце Яго.1Кар 9:25; Адкр 2:10
Пастарайся прыйсьці да мяне неўзабаве.
Бо Дымас пакінуў мяне, палюбіўшы цяперашняе жыцьцё, і пайшоў у Фесалоніку, Крыскент у Галятыю, Ціт у Далмацыю; адзін Лукаш са мною.Кал 4:14
Марка вазьмі і прывядзі з сабою, бо ён мне патрэбен на служэньне.
Тыхіка я паслаў у Эфэс.Дзеі 20:4
Як пойдзеш, прынясі плашч, які я пакінуў у Траадзе ў Карпа, і кнігі, асабліва пергамэнтныя.
Аляксандр-меднік шмат учыніў мне ліха. Няхай яму Бог аддасьць паводле ўчынкаў ягоных!1Цім 1:20
Асьцерагайся яго і ты, бо ён надта ж супрацівіўся нашым словам.
Пры першай маёй абароне нікога ня было са мною, а ўсе мяне пакінулі. Хай не залічыцца ім!
А Гасподзь зьявіўся мне і ўмацаваў мяне, каб празь мяне сьцьвердзілася Дабравесьце, і пачулі ўсе язычнікі; і я пазьбег ільвінай пашчы.Дзеі 23:11; 1Цім 1:12
І выратуе мяне Гасподзь ад усякіх ліхіх дзеяў і захавае для Свайго Нябеснага Царства. Яму слава на векі вякоў. Амін.Рым 14:26; 1Цім 6:16
Вітай Прыскілу і Акілу і дом Анісіфораў.2Цім 1:16
Эраст застаўся ў Карынфе; а Трахіма я пакінуў хворага ў Міліце.
Пастарайся прыйсьці да зімы. Вітаюць цябе Эвул і Пуд, і Лін і Клаўдзія, і ўсе браты.
Гасподзь Ісус Хрыстос з духам тваім. Мілата з вамі. Амін.Флм 1:25