Эф Эфесянам, раздзел Пасланне да Эфесян, раздзел 6
Дзеці, слухайцеся сваіх бацькоў у Госпадзе, бо гэтага патрабуе справядлівасьць.Дрз 5:16; Выс 23:22; Мц 15:4; Мк 7:10; Кал 3:20
Шануй бацьку твайго і маці - гэта першая запаведзь з абяцаньнем:
«Хай будзе табе добра, і будзеш доўга жыць на зямлі».Вых 20:12
І вы, бацькі, не дакучайце дзецям вашым, а гадуйце іх у навуцы і настаўленьні Гасподнім.Выс 13:24
Рабы, слухайцеся гаспадароў сваіх цялесных са страхам і трымценьнем, у прастаце сэрца вашага, як Хрыста,1Пётр 2:18; Кал 3:22; Ціт 2:9
ня ў блізірнай толькі паслужлівасьці, як чалавекадагоднікі, а як рабы Хрыстовыя, выконваючы волю Божую ад душы,
служачы шчыра, як Госпаду, а ня як людзям,
ведаючы, што кожны атрымае ад Госпада ў меру дабра, якое ён зрабіў, хай то раб, хай вольнік.2Кар 5:10
І вы, гаспадары, рабеце зь імі гэтак сама, лагодзьце строгасьць, ведаючы, што і над вамі самімі і над імі ёсьць на нябёсах Гасподзь, Які не зважае на асобы.Дрз 10:17; 2Пар 19:7; Ёў 34:19; Гал 2:6
Нарэшце, браты мае, мацуйцеся Госпадам і магутнасьцю сілы Ягонай;
апранецеся ў поўную зброю Божую, каб вам можна было стаць супроць хітрыкаў д'ябальскіх;Рым 13:12; 1Фес 5:8
бо нашае змаганьне ня супроць крыві і плоці, а супроць начальстваў, супроць уладаў, супроць сьветаўпраўцаў цемры сьвету гэтага, супроць духаў злосьці паднябесных.Ян 12:31; Ян 14:30; Эф 2:2
Дзеля гэтага прымеце поўную зброю Божую, каб вы маглі супрацьстаць у часіну ліхую і, усё адолеўшы, выстаяць.
Так што станьце, апаясаўшы сьцёгны вашыя праўдаю, і апрануўшыся ў браню праведнасьці,Лк 12:35; 1Пётр 1:13
і абуўшы ногі ў гатовасьць абвяшчаць мір;
а найперш за ўсё вазьмеце шчыт веры, якім зможаце пагасіць усе распаленыя стрэлы ліхадзея;
і шалом ратунку вазьмеце, і меч духоўны, які ёсьць Слова Божае;Іс 59:17; 1Фес 5:8; Габр 4:12
усякаю малітваю і просьбаю малецеся ў любы час духам, і дбайце пра гэта самае з усёй сталасьцю і благаньнем за ўсіх сьвятыхЛк 18:1; Кал 4:2
і за мяне, каб мне дадзена было слова - вуснамі маімі адкрыта і адважна абвяшчаць таямніцу зьвеставаньня,2Фес 3:1
дзеля якога я пасольствую ў кайданах, каб я сьмела прапаведаваў, як я і павінен.Дзеі 21:11
А каб і вы ведалі пра мае акалічнасьці і дзеі, пра ўсё раскажа вам Тыхік, любасны брат і верны ў Госпадзе службіт,Дзеі 20:4; Кал 4:7
якога я і паслаў да вас на тое самае, каб вы даведаліся пра нас і каб ён суцешыў сэрцы вашыя.
Мір братам і любоў зь вераю ад Бога Айца і Госпада Ісуса Хрыста.
Мілата з усімі, што нязьменна любяць Госпада нашага Ісуса Хрыста. Амін.