Дрз Другі закон, раздзел Пятая кніга Майсеева. Другі закон, раздзел 27
І наказаў Майсей і старэйшыны сыноў Ізраілевых народу, кажучы: выконвайце ўсе запаведзі, якія наказваю вам сёньня.
І калі пяройдзеце за Ярдан у зямлю, якую Гасподзь, Бог твой, дае табе, тады пастаў сабе вялікія камяні і абмаж іх вапнаю;Нав 3:17
і напішы на камянях гэтых усе словы закона гэтага, калі пяройдзеш Ярдан, каб уступіць у зямлю, якую Гасподзь, Бог твой, дае табе, у зямлю, дзе цячэ малако і мёд, як казаў табе Гасподзь, Бог бацькоў тваіх.Нав 8:32; Вых 3:8; Дрз 26:9
Калі пяройдзеце Ярдан, пастаўце камяні тыя, як я загадваю вам сёньня, на гары Гевал і абмажце іх вапнаю;
і зладзь там ахвярнік Госпаду, Богу твайму, ахвярнік з камянёў, не падымаючы на іх жалеза;Вых 20:25; Нав 8:31
з камянёў цэлых зладзь ахвярнік Госпада, Бога твайго, і ўчыняй на ім цэласпаленьні Госпаду, Богу твайму,
і прынось ахвяры мірныя, і еж там, і радуйся прад Госпадам, Богам тваім;Дрз 14:26
і напішы на камянях усе словы закона гэтага вельмі выразна.
І сказаў Майсей і сьвятары лявіты ўсяму Ізраілю, кажучы: уважай і слухай, Ізраіле; у дзень гэты ты зрабіўся народам Госпада, Бога твайго;Дрз 26:18
дык вось, слухайся голасу Госпада, Бога твайго, і выконвай запаведзі Ягоныя і пастановы Ягоныя, якія наказваю табе сёньня.Дрз 26:17; Дрз 28:1
І наказаў Майсей народу ў той дзень, кажучы:
гэтыя павінны стаць на гары Гарызім, каб дабраслаўляць народ, калі пяройдзеце Ярдан: Сымон, Лявій, Юда, Ісахар, Язэп і Веньямін;Дрз 11:29
а гэтыя павінны стаць на гары Гевал, каб праклінаць: Рувім, Гад, Асір, Завулон, Дан і Нэфталім.
Лявіты абвесьцяць і скажуць усім Ізраільцянам гучным голасам:
пракляты, хто зробіць разьбёнага альбо вылітага балвана, мярзоту прад Госпадам, твор рук мастака, і паставіць яго ў патайнай мясьціне! Увесь народ абвесьціць і скажа: амін.Дан 9:11
Пракляты той, хто ліхасловіць бацьку свайго і маці сваю! І ўвесь народ скажа: амін.Вых 21:17; Ляв 20:9; Выс 20:20
Пракляты той, хто парушае мяжу блізкага свайго! І ўвесь народ скажа: амін.Дрз 19:14
Пракляты, хто сьляпога зьбівае з дарогі! І ўвесь народ скажа: амін.
Пракляты, хто крыва судзіць прыхадня, сірату і ўдаву! І ўвесь народ скажа: амін.Вых 22:21; Ляв 19:33; Ер 5:28
Пракляты, хто ляжа з жонкаю бацькі свайго, бо ён адкрыў край вопраткі бацькі свайго! І ўвесь народ скажа: амін.Ляв 18:8; Ляв 20:11; Езк 22:10
Пракляты, хто ляжа зь якім-небудзь быдлам! І ўвесь народ скажа: амін.Вых 22:19; Ляв 18:23
Пракляты, хто ляжа зь сястрою сваёю, з дачкою бацькі свайго, альбо з дачкою маці сваёй! І ўвесь народ скажа: амін.Ляв 18:9
Пракляты, хто ляжа зь цешчаю сваёю! І ўвесь народ скажа: амін.Быц 38:18; Ляв 18:15
Пракляты, хто таемна забівае блізкага свайго! І ўвесь народ скажа: амін.Быц 9:6; Вых 21:12; Ляв 24:17
Пракляты, хто бярэ хабар, каб забіць душу і праліць кроў нявінную! І ўвесь народ скажа: амін.Вых 23:8
Пракляты, хто ня выконвае слоў закона гэтага і ня будзе рабіць паводле яго! І ўвесь народ скажа: амін.Гал 3:10