Флп Філіпійцам, раздзел Пасланне да Філіпійцаў, раздзел 2
Дык вось, калі ёсьць якая ўцеха ў Хрысьце, калі ёсьць якая радасьць любові, калі ёсьць якая супольнасьць Духа, калі ёсьць які мілажаль у сэрцы і спагадлівасьць,Кал 3:12
дык дапоўніце маю радасьць: майце адны думкі, майце тую ж любоў, будзьце аднадушныя і аднамысныя;Рым 15:5; Флп 3:16
нічога не рабеце зь перакорлівасьці альбо дзеля марнае славы, а ў пакорлівай мудрасьці ўважайце адно аднаго вышэй за сябе.Лк 14:11; Рым 12:10
Не за сябе толькі клопат майце, а кожны і за іншых.1Кар 10:24
Бо ў вас павінны быць тыя самыя адчуваньні, як і ў Хрысьце Ісусе;Мц 11:29
Ён, быўшы ў Божай прыродзе, не палічыў за рабунак Сваю роўнасьць з Богам,2Кар 4:4; Кал 1:15
а прынізіў Сябе Самога, узяўшы вобраз раба, зрабіўшыся падобным на людзей і з выгляду стаўшыся, як чалавек;Пс 21:7; Іс 49:6; Мц 20:28
упакорыў Сябе і быў паслухмяны аж да сьмерці, і сьмерці крыжовай.Мц 26:39; Габр 2:17
Таму і Бог узьнёс Яго і даў Яму імя вышэй за ўсякае імя,Мц 28:18; Габр 1:4
каб прад імем Ісуса схілілася кожнае калена на небе, зямлі і ў апраметнай,Іс 45:23; Рым 14:11; Адкр 5:14
і кожныя вусны вызнавалі, што Ісус Хрыстос ёсьць Гасподзь на славу Бога Айца.Ян 13:13; 1Кар 8:6
Дык вось, любасныя мае, як вы заўсёды былі паслухмяныя ня толькі ў прысутнасьці маёй, але яшчэ болей сёньня ў адсутнасьці маёй, са страхам і трымценьнем выконвайце сваё збавеньне,
бо гэта Бог учыняе ў вас і хаценьне і дзеяньне па Сваім упадабаньні.2Кар 3:5; Габр 13:21
Усё рабеце без нараканьня і сумненьня,1Пётр 4:9
каб вам быць бездакорнымі і чыстымі дзецьмі Божымі, беспахібнымі сярод упарцістага і разбэшчанага роду, у якім вы зьзяеце, як сьвяцілы ў сьвеце,Выс 4:18; Мц 5:14
ашчаджаючы слова жыцьця на пахвалу мне ў дзень Хрыстовы, што я ня марна змагаўся і ня марна працаваў.Флп 4:1
Але калі я і мушу зрабіцца ахвяраю за ахвяру і служэньне веры вашай, дык радуюся і цешуся разам з усімі за вас;2Цім 4:6
за гэта самае і вы радуйцеся і цешцеся са мною.
Спадзяюся ж у Госпадзе Ісусе неўзабаве паслаць да вас Цімафея, каб і я, даведаўшыся пра вашыя абставіны, суцешыўся духам.Дзеі 16:1
Бо няма ў мяне нікога роўнага яму ў рупнасьці, хто б так шчыра дбаў пра вас;
бо ўсе шукаюць свайго, а не таго, што даспадобы Ісусу Хрысту.1Кар 10:24
А ягоная вернасьць вам вядомая, бо ён, як сын пры бацьку, служыў мне ў зьвеставаньні.Дзеі 16:2
І вось я спадзяюся паслаць яго адразу ж, як толькі даведаюся, што будзе са мною.
Я ўпэўнены ў Госпадзе, што і сам хутка прыйду да вас.
Урэшце я палічыў патрэбным паслаць да вас Эпафрадыта, брата і супрацоўніка і падзьвіжніка майго ў змаганьні, а вашага пасланца і службіта ў патрэбе маёй,
бо ён моцна хацеў бачыць вас і цяжка журыўся, што да вас дайшлі чуткі пра ягоную хваробу.
Бо ён быў хворы пры сьмерці; але Бог памілаваў яго, і не яго толькі, але і мяне, каб не дадалося мне жальбы да жальбы.
Таму я хутчэй паслаў яго, каб вы, убачыўшы яго зноў, парадаваліся, і я быў меней засмучаны.
Прымеце ж яго ў Госпадзе з усякаю радасьцю, і такіх майце ў пашане,1Фес 5:12
бо ён за справу Хрыстовую хадзіў каля сьмерці, ставіў жыцьцё пад пагрозу, каб дапоўніць недахоп вашых паслугаў мне.