Выс Выслоўі, раздзел Кніга выслоўяў Саламонавых, раздзел 11
Няправільныя вагі - агідныя Госпаду, а правільныя вагі ўпадабаньне Яму.Дрз 25:13
Прыйдзе пыхлівасьць, прыйдзе і ганьба; а са сьціплымі - мудрасьць.
Беззаганнасьць будзе кіраваць пабожнымі, а хітрасьць вераломных загубіць іх.
Не паможа багацьце ў дзень гневу; а праўда ўратуе ад сьмерці.Выс 10:2; Езк 7:19; Саф 1:18
Праўда беззаганнага прастуе дарогу яму, а бязбожны ўпадзе ад бязбожнасьці сваёй.
Праўда пабожных ратуе іх, а бязбожнікі будуць злоўлены беззаконьнем сваім.
Надзея бязбожніка зьнікае пры сьмерці, і спадзяваньне бязбожных зьнікае.
Праведніку ёсьць ратунак зь нягоды, а замест яго трапляе ў яе бязбожны.Эст 7:9; Пс 33:20
Вуснамі крывадушнік нішчыць блізкага свайго, а праведнікі празорлівасьцю ратуюцца.
З дабрадзенства праведнікаў радуецца горад, а як гіне бязбожны - сьпявае.Выс 28:12
Дабраславеньнем праведных узвышаецца горад, а вуснамі бязбожнікаў руйнуецца.Быц 18:32
Недавумак пагарджае блізкім сваім; а разумны чалавек маўчыць.
Хто ходзіць у паклёпніках, той адкрывае таямніцу; а верны чалавек яе хавае.Выс 20:19
Дзе няма добрае рады, там занепадае народ, а пры многіх радцах - дабрадзенствуе.Выс 15:22
Ліха той сабе спрычыняе, хто паручаецца за староньняга; а хто ненавідзіць заруку, той у бясьпецы.
Жанчына з добрым норавам здабывае гонар, а працавітыя дасягаюць багацьця.
Чалавек мілажальны дабрачыніць душы сваёй, а жорсткі сэрцам разбурае плоць сваю.
Бязбожны робіць справу ненадзейную, а таму, хто сее праўду - узнагарода пэўная.Гал 6:8
Праведнасьць вядзе да жыцьця, а хто імкнецца да ліхога, імкнецца да сьмерці сваёй.
Агіда Госпаду - падступныя сэрцам; а падабаецца Яму, хто ў беспахібнасьці ходзіць.Пс 5:7; Пс 118:1
Можна паручыцца, што грэшнік не застанецца без пакараньня; а насеньне праведных уратуецца.Выс 16:5
Што залатое колца ў лычы ў сьвіньні, тое жанчына прыгожая і - неразумная.
Жаданьне праведных - толькі дабро, надзея бязбожных - гнеў.Пс 111:10
Адзін сыпле шчодра і яму яшчэ дадаецца; а другі звыш меры ашчадлівы, і аднак жа бяднее.2Кар 9:6
Дабрачынная душа будзе насычана, і хто напойвае іншых, той і сам напоены будзе.
Хто хавае ў сябе збожжа, таго народ кляне; і дабраслаўляе таго, хто прадае.
Хто імкнецца да дабра, той шукае Божае ласкі; а хто шукае благога, да таго яно і прыходзіць.
Хто спадзяецца на багацьце сваё, упадзе; а праведнікі, як лісьце, зазелянеюць.Ёў 31:25; Мц 19:23; 1Цім 6:17
Хто разладжвае дом свой, успадкуе вецер, а неразумны будзе слугаваць мудраму.
Плод праведніка - дрэва жыцьця, а мудры яднае душы.Выс 3:18
Так аддаецца на зямлі праведніку, тым болей бязбожнаму і грэшніку.1Пётр 4:18