Ляв Лявіт, раздзел Трэцяя кніга Майсеева. Лявіт, раздзел 24
І наказаў Гасподзь Майсею сказаць:
загадай сынам Ізраілевым, каб яны прынесьлі табе алею чыстага, выціснутага з алівы, дзеля асьвячэньня, каб няспынна гарэла сьвяцільня;Вых 27:20
за заслонай каўчэга адкрыцьця ў скініі сходу Аарон і сыны ягоныя павінны ставіць яе прад Госпадам ад вечара да раніцы заўсёды: гэта вечная пастанова ў роды вашыя;1Цар 3:3; Вых 27:21
на сьвечніку чыстым павінны яны ставіць сьвяцільню перад Госпадам заўсёды.Вых 25:31; Ян 1:7
І вазьмі пшанічнай мукі і сьпячы зь яе дванаццаць хлябоў; у кожным хлебе павінны быць дзьве дзясятых эфы;Вых 25:30; Мц 12:4; Лк 6:4
і пакладзі іх у два рады, па шэсьць у рад, на чыстым стале прад Госпадам:Вых 25:30
і пакладзі на кожны рад чыстага лівану, і будзе гэта пры хлебе, у памяць, у ахвяру Госпаду;Ян 6:35
у кожны суботні дзень заўсёды трэба класьці іх перад Госпадам ад сыноў Ізраілевых: гэта наказ вечны;Мц 12:5
Яны будуць належаць Аарону і сынам ягоным, якія будуць есьці іх на сьвятым месцы, бо гэта вялікая сьвятыня ім з ахвяраў Гасподніх: гэта пастанова вечная.Ляв 8:31; Вых 29:32; Мц 12:4; Мк 2:26
І выйшаў сын адной Ізраільцянкі, які нарадзіўся ад Егіпцяніна, да сыноў Ізраілевых, і пасварыўся ў табары сын Ізраільцянкі зь Ізраільцянінам;
ганіў сын Ізраільцянкі імя Госпада і ліхасловіў. І прывялі яго да Майсея;Дрз 28:58; Мц 9:3
і пасадзілі яго пад варту, пакуль ня будзе абвешчана ім воля Гасподняя.Лік 15:34
І наказаў Гасподзь Майсею сказаць:
выведзі ганьбоўца прэч з табару, і ўсе, хто чуў яго, няхай пакладуць рукі свае на галаву ягоную, і ўсё супольства пабэе яго камянямі;
і сынам Ізраілевым скажы: хто будзе ліхасловіць Бога свайго, той панясе грэх свой;
і ганьбовец імя Гасподняга павінен памерці, камянямі пабэе яго ўсё супольства: хай тое прыхадзень, хай тубылец пачне ганіць імя, аддадзены будзе сьмерці.Вых 20:7; Мц 26:65
Хто забье якога-небудзь чалавека, той аддадзены будзе сьмерці.Вых 21:12
Хто забье быдла, павінен заплаціць за яго, быдла за быдла.
Хто зробіць шкодзіну на целе блізкага свайго, таму трэба зрабіць тое самае, што ён зрабіў:Вых 21:24; Дрз 19:21
пералом за пералом, вока за вока, зуб за зуб; як ён зрабіў шкодзіну на целе чалавека, так і яму трэба зрабіць.Вых 21:24; Дрз 19:21; Мц 5:38
Хто забье быдла, павінен заплаціць за яго; а хто забэе чалавека, таго трэба аддаць сьмерці.
Адзін суд павінен быць у вас, як прыхадню, так і тубыльцу, бо Я Гасподзь, Бог ваш.Вых 12:49; Дрз 1:16
І сказаў Майсей сынам Ізраілевым; і вывелі ліхаслоўца прэч з табара, і пабілі яго камянямі, і зрабілі сыны Ізраілевыя, як загадаў Гасподзь Майсею.