Genesi 40 in diverse traduzioni
Пераклад Сёмухі
40:1
Сёмуха
Пасьля гэтага чашнік цара Егіпецкага і пекар правінаваціліся перад гаспадаром сваім, царом Егіпецкім.
40:2
Сёмуха
І ўгневаўся фараон на двух царадворцаў сваіх, на галоўнага чашніка і на галоўнага пекара,
40:3
Сёмуха
і аддаў іх пад варту ў дом да начальніка целаахоўцаў, у цямніцу, у тое месца, дзе ўвязьнены быў Язэп.
40:4
Сёмуха
Начальнік целаахоўцаў прыставіў да іх Язэпа, і ён служыў ім. І прабылі яны пад вартаю некаторы час.
40:5
Сёмуха
Аднаго разу чашніку і пекару цара Егіпецкага, увязьненым у цямніцы, бачыліся сны, кожнаму свой сон, абодвум у адну ноч, кожнаму сон адмысловага значэньня.
40:6
Сёмуха
І прыйшоў да іх Язэп раніцай, убачыў іх, і вось, яны сумеліся.
40:7
Сёмуха
І спытаўся ён у царадворцаў фараонавых, якія былі зь ім у доме гаспадара ягонага пад вартаю, кажучы: чаго ў вас сёньня журботныя твары?
40:8
Сёмуха
Яны сказалі яму: нам прысьніліся сны, а растлумачыць іх няма каму. Язэп сказаў ім: ці не ад Бога тлумачэньні? раскажэце мне.
40:9
Сёмуха
І расказаў галоўны чашнік Язэпу сон свой і сказаў яму: мне сьнілася, вось вінаградная лаза перад мною;
40:10
Сёмуха
на лазе тры галінкі; яна разьвілася, паказаліся на ёй кветкі, вырасьлі і пасьпелі на ёй ягады;
40:11
Сёмуха
і чаша фараонавая ў мяне ў руцэ; я ўзяў ягад, выціснуў іх у чашу фараонавую і падаў чашу ў руку фараону.
40:12
Сёмуха
І сказаў яму Язэп: вось тлумачэньне яго: тры галінкі - гэта тры дні;
40:13
Сёмуха
праз тры дні фараон узьнясе галаву тваю і верне цябе на месца тваё, і ты падасі чашу фараонавую ў руку яму, па ранейшай завядзёнцы, калі ты быў у яго чашнікам;
40:14
Сёмуха
спамяні ж пра мяне, калі табе будзе добра, і зрабі мне дабрачынства, і нагадай пра мяне фараону, і выведзі мяне з гэтага дома;
40:15
Сёмуха
бо я ўкрадзены зь зямлі Габрэяў; а таксама і тут нічога не зрабіў, за што б кідаць мяне ў цямніцу.
40:16
Сёмуха
Галоўны пекар убачыў, што растлумачыў ён добра, і сказаў Язэпу: мне таксама сьнілася: вось на галаве ў мяне тры кашы кратаваныя;
40:17
Сёмуха
у верхнім кашы ўсялякая ежа фараонавая, вырабы пекара, і птушкі дзяўблі яе з каша на галаве маёй.
40:18
Сёмуха
І адказваў Язэп і сказаў: вось тлумачэньне яго: тры кашы - гэта тры дні.
40:19
Сёмуха
Праз тры дні фараон здыме зь цябе галаву тваю і павесіць цябе на дрэве, і птушкі будуць дзяўбці плоць тваю зь цябе.
40:20
Сёмуха
На трэці дзень, дзень народзінаў фараонавых, учыніў ён гасьціну ўсім слугам сваім і ўспомніў пра галоўнага чашніка і галоўнага пекара сярод слуг сваіх;
40:21
Сёмуха
і вярнуў галоўнага чашніка на ранейшае месца, і ён падаў чашу ў руку фараону;
40:22
Сёмуха
а галоўнага хлебадара павесіў на дрэве, як растлумачыў ім Язэп.
40:23
Сёмуха
І ня ўспомніў галоўны чашнік пра Язэпа, а забыў яго.