Дрз Другі закон, раздзел Пятая кніга Майсеева. Другі закон, раздзел 34
І ўзышоў Майсей з раўнін Маавіцкіх на гару Нэво, на вяршыню Фасгі, што насупроць Ерыхона, і паказаў яму Гасподзь усю зямлю Галаад да самага Дана,
і ўсю Нэфталімавую, і ўсю Яфрэмавую і Манасііную, і ўсю зямлю Юдавую, нават да самага заходняга мора,
і паўднёвую краіну і раўніну даліны Ерыхона, горад Пальмаў, да Сігора.4Цар 2:4; Быц 19:22
І сказаў яму Гасподзь: вось зямля, за якую Я прысягаў Абрагаму, Ісааку і Якаву, кажучы: «семені твайму дам яе»; Я дам табе пабачыць яе вачыма тваімі, але ў яе ты ня ўвойдзеш.Дрз 4:21; Быц 12:7; Быц 13:15; Быц 15:18; Быц 26:3
І памёр там Майсей, раб Гасподні, у зямлі Маавіцкай, паводле слова Гасподняга;Лік 20:12; Нав 24:29
і пахаваны ў даліне ў зямлі Маавіцкай насупраць Вэтэгора і ніхто ня ведае месца пахаваньня яго нават да гэтага дня.Дрз 32:50
Майсею было сто дваццаць гадоў, калі ён памёр; але зрок ягоны ня прытупіўся, моцнасьць у ім ня вычарпалася.Дрз 31:2
І аплаквалі Майсея сыны Ізраілевыя на раўнінах Маавіцкіх трыццаць дзён. І прайшлі дні плачу і галашэньня па Майсеі.Лік 20:29
І Ісус, сын Наваў, напоўніўся духам мудрасьці, бо Майсей усклаў на яго рукі свае, і слухаліся яго сыны Ізраілевыя і рабілі так, як загадаў Гасподзь Майсею.Дзеі 8:17; Лік 27:18
І ня было больш у Ізраіля прарока такога, як Майсей, якога Гасподзь знаў тварам да твару,Мц 12:41; Вых 33:11; Лік 12:8
па ўсіх азнаках і цудах, зрабіць якія ў зямлі Егіпецкай над фараонам і над усімі рабамі ягонымі і над усёю зямлёю ягонай паслаў яго Гасподзь,
і па руцэ моцнай і па вялікіх цудах, якія Майсей зьдзейсьніў перад вачыма ўсяго Ізраіля.