Pro Mga Panultihon, kapitulo Ang Libro sa Mga Panultihon, kapitulo 19
Mas maayo pa ang kabos nga nagkinabuhi ug matarong
kaysa buang-buang nga bakakon.Pro 28:6
Dili maayo nga kugihan ka apan walay nahibaloan.
Dili usab maayo nga magdali-dali kay basig masayop ka.Pro 6:18
Adunay mga tawo nga nagdaot sa ilang kaugalingon
pinaagi sa ilang kabuang,
ug unya ang Ginoo pa ang ilang basolon.Jas 1:13
Ang adunahan daghag higala,
apan ang kabos biyaan sa iyang mga higala.Pro 14:20
Ang bakakon nga saksi silotan,
ug si bisan kinsa nga gabakak dili makalingkawas sa silot.Deu 19:19
Daghan ang makighigala sa mga iladong tawo aron paboran sila,
ug ang tanang mga tawo makighigala sa manggihatagon.
Kon kabos ka, dili ka tagdon sa imong mga paryente,
ug labaw na gayod sa imong mga higala.
Kon kinahanglanon mo sila,
dili mo sila madangpan.
Ang tawo nga nagtinguha nga magmaalamon nahigugma sa iyang kaugalingon,
ug siya magmauswagon.
Ang bakakon nga saksi silotan,
ug si bisan kinsa nga gabakak malaglag.Pro 21:28
Dili angayan nga magkinabuhi sa kaharuhay
ang tawong buang-buang,
ug labi nang dili angayan nga mogahom
sa mga tigdumala ang usa ka ulipon.Pro 30:21
Kon mapailubon ka, nagpadayag kana nga maalamon ka.
Ug kon magpasaylo ka sa mga nakasala kanimo,
maghatod kinig kadungganan kanimo.Pro 14:29
Ang kasuko sa hari sama sa ngulob sa liyon,
apan ang iyang kaayo sama sa yamog sa tanaman.Est 7:9; Rom 13:4
Ang buang-buang nga anak makadala ug kalaglagan sa iyang amahan.
Ang asawa nga tagawtawan perwisyo sama sa nagtulo nga atop.Pro 10:1
Mapanunod gikan sa ginikanan ang balay ug ang uban pang kabtangan,
apan ang Ginoo lang ang makahatag ug maalamon nga asawa.Pro 18:22
Kon tapolan ka ug sige rag katulog,
magutman ka gayod.
Ang tawo nga nagtuman sa mga sugo sa Dios magkinabuhi sa dayon,
apan ang wala nagtuman mamatay.Pro 3:21; Luk 11:28
Kon mohatag ka sa mga kabos,
sama lang nga nagpahulam ka sa Ginoo,
kay ang Ginoo mobayad kanimo.Psa 41:1; Mat 10:42; Mat 25:40
Disiplinaha ang imong mga anak
samtang aduna pay panahon.
Kon dili mo sila disiplinahon,
giguba mo ang ilang kinabuhi.Pro 13:24; Pro 23:13
Pasagdi nga manubag sa iyang binuhatan
ang tawong daling masuko,
kay kon tabangan mo siya, utrohon ra gihapon na niya.
Pamatia ang mga tambag ug pagtul-id sa imong pamatasan
aron magmaalamon ka sa umaabot.
Daghan kitag mga plano,
apan ang kabubut-on sa Ginoo maoy matuman.Job 23:13; Pro 16:1
Ganahan kitag tawo nga maayo.
Mas maayo pa ang tawong kabos kaysa bakakon.
Tahora ang Ginoo ug mabuhi kag dugay, kontento,
ug layo sa katalagman.
Adunay mga tawo nga labihan gayod katapolan
nga bisan sa pagkaon kapuyan pa.Pro 26:15
Angay kastigohon ang mga bugal-bugalon
aron ang sama nilang
walay alamag makat-on nga magmaalamon.
Badlonga ang tawong maalamon
ug mosamot siya kamaalamon.Pro 21:11
Makauulaw ug talamayon ang anak nga modagmal
sa iyang amahan ug mopalayas sa iyang inahan.Pro 15:20
Anak, kon dili ka mamati
sa mga pagtul-id sa imong pamatasan,
gisalikway mo ang mga pagtulon-an nga naghatag ug kaalam.
Ang bakakon nga saksi nagpakawalay-bili sa hustisya,
ug ang tawong daotan ganahan gayod nga mohimog daotan.Job 15:16
Sigurado gayod nga silotan
ang mga bugal-bugalon ug mga buang-buang.