Выс Выслоўі, раздзел Кніга выслоўяў Саламонавых, раздзел 28
Бязбожнік бяжыць, калі ніхто ня гоніцца за ім; а праведнік адважны, як леў.Ляв 26:36; Дрз 28:25
Калі краіна адступіцца ад закона, тады многа ў ёй начальнікаў; а пры разумным і ўсяведным мужы яна даўгавечная.Выс 29:8
Чалавек бедны і прыгнятальнік слабых тое самае, што праліўны дождж, які змывае хлеб.
Адступнікі ад закона хваляць бязбожных, а тыя, што трымаюцца закона, абураюцца імі.Іс 5:20
Злыя людзі не разумеюць справядлівасьці, а шукальнікі Госпада разумеюць усё.
Лепш бедны, які ходзіць у сваёй беззаганнасьці, чым той, хто выкручвае шляхі свае, хоць ён і багаты.Выс 19:1
Хто захоўвае закон - сын разумны, а хто водзіцца з марнатраўцамі, той уводзіць у сорам бацьку свайго.Выс 29:3
Хто памнажае маёмасьць сваю ростам і ліхвою, той зьбірае яе дабрачынцам бедных.Ёў 27:16
Хто ўхіляе вуха сваё, каб ня слухаць закону, у таго і малітва - мярзота.Ёў 27:8
Хто зводзіць праведных на дарогу зла, сам упадзе ў сваю яму; а беззаганныя спадкуюць дабро.Выс 26:27
Чалавек багаты - мудрэц у вачах сваіх, але разумны бядняк бачыць яго наскрозь.
Калі трыумфуюць праведнікі, вялікая слава; але калі ўзвышаюцца бязбожныя, людзі хаваюцца.Выс 29:2
Той, хто хавае свае злачынствы, ня будзе мець посьпеху; а хто прызнаецца і пакідае іх, той будзе памілаваны.Пс 31:5; 1Ян 1:9
Шчасны чалавек, які заўсёды ў страху Божым; а хто робіць жорсткім сэрца сваё, той трапляе ў бяду.Ёў 3:25; Рым 11:20
Як рыклівы леў і галодны мядзьведзь, так бязбожны валадар над бедным народам.
Неразумны валадар шмат чыніць крыўды; а той, які ненавідзіць карысьлівасьць, падоўжыць дні.
Чалавек вінаваты ў крыві чалавечай, будзе ўцякаць да сьмерці, каб хто не схапіў яго.
Хто ходзіць беззаганна, той будзе ўратаваны; а хто ходзіць крывымі дарогамі, упадзе на адной зь іх.
Хто ўрабляе зямлю сваю, той будзе есьці хлеб; а хто пераймае гультаёў, таго накорміць галеча.Выс 12:11
Верны чалавек багаты на дабраславеньні; а хто сьпяшаецца разбагацець, той не застанецца без пакараньня.Выс 20:21
Зважаць на асобы - нядобра; такі чалавек і за кавалак хлеба зробіць крыўду.Выс 18:5; Выс 24:23
Сьпяшаецца да багацьця зайздросьлівы чалавек, і ня думае, што галеча спасьцігне яго.1Цім 6:9
Хто дакарае чалавека, знойдзе большую прыязнасьць, чым той, хто лісьлівіць языком.
Хто абкрадвае бацьку свайго і маці сваю і кажа: «гэта ня грэх», той - саўдзельнік грабежнікаў.Мц 15:5
Пыхлівец распальвае свару, а хто спадзяецца на Госпада, будзе ў дабрадзенстве.Выс 13:10
Хто спадзяецца на сябе, той неразумны; а хто ходзіць у мудрасьці, той будзе цэлы.
Хто дае жабраку, не зьбяднее; а хто засланяе вочы ад яго, на тым шмат праклёнаў.Дрз 15:7; 2Кар 9:9
Калі ўзвышаюцца бязбожныя, людзі хаваюцца; а калі яны падаюць, множацца праведнікі.