Выс Выслоўі, раздзел Кніга выслоўяў Саламонавых, раздзел 6
Сыне мой, калі ты ручаўся за бліжняга твайго і даў руку тваю за чужога,
ты спутаў сябе словамі вуснаў тваіх, і ты злоўлены словамі вуснаў тваіх.
Дык зрабі, што раю, сыне мой, і вызвалі сябе, бо ты трапіў у рукі бліжняга твайго: бяжы, упадзі да ног і ўпрошвай бліжняга твайго,
не давай сну вачам тваім і спачынку павекам тваім,Пс 132:4
вырывайся, як сарна з рукі і як птушка з рукі птушкалова.Пс 124:7
Ідзі да мураша, гультаю, і паглядзі на шляхі ягоныя, і станься мудрым.
Няма ў яго начальніка, ані наглядчыка, ані кіраўніка,
але ён летам загатаўляе хлеб сабе і зьбірае ежу сваю ў жніво.
Як доўга, гультаю, будзеш спаць? Калі ты ўстанеш ад сну свайго?Выс 26:14
Крыху пасьпіш, крыху падрэміш, крыху, склаўшы рукі, паляжыш,Выс 24:33
і прыйдзе, як валацуга, беднасьць твая, і нястача твая, як чалавек узброены.
Чалавек нягодны, чалавек злачынны ходзіць з хлусьлівымі вуснамі,
лыпае вачыма сваімі, круціць нагамі сваімі, пальцамі сваімі знакі дае,Выс 10:10
хавае ліхоту ў сэрцы сваім, увесь час прыдумляе благое, сваркі расьсявае.Выс 17:20
Таму зьнянацку прыйдзе на яго загуба, раптоўна будзе зьнішчаны, і ня будзе яму аздараўленьня.Пс 58:9
Вось шэсьць, якіх ненавідзіць ГОСПАД, і сем, якія агідныя для душы Яго:
вочы пыхлівыя, язык хлусьлівы, рукі, што праліваюць кроў нявінную,Выс 30:13
сэрца, якое задумвае намеры зласьлівыя, ногі, што хутка бягуць на благое,
сьведка фальшывы, які дыхае няпраўдай, і той, хто сее нязгоду між братамі.Выс 19:5
Сыне мой, захавай прыказаньні бацькі твайго і не пакідай закон маці тваёй,Выс 1:8
навяжы іх назаўсёды на сэрцы тваім і абвяжы імі шыю тваю.Дрз 6:8
Калі пойдзеш, яны павядуць цябе, калі ляжаш спаць, будуць пільнаваць цябе, калі абудзішся, будуць гаварыць да цябе.Выс 3:23
Бо прыказаньне — сьветач, і закон — сьвятло, а настаўленьне і дакараньне — шлях жыцьця,Пс 119:105; 2Пётр 1:19
каб захаваць цябе ад жанчыны ліхой, ад лісьлівага языка чужаніцы.Выс 7:5
Няхай не пажадае сэрца тваё прыгажосьці яе, няхай ня ўхопіць яна цябе вейкамі сваімі,
бо з прычыны распусьніцы галеюць да бохана хлеба, і чужаложніца цікуе на дарагую душу.Выс 5:10
Ці схавае хто агонь у запазуху, каб не загарэлася адзеньне ягонае?
Ці можа хто хадзіць па распаленым вугольлі, не апёкшы ступняў сваіх?
Так і той, хто ўваходзіць да жонкі бліжняга свайго, хто дакранаецца да яе, не пазьбегне кары.Габр 13:4
Не пагарджаюць злодзеем, калі ён крадзе, каб насыціць душу сваю, калі ён галодны,
але злоўлены, сямікроць аддасьць, аддасьць усю маёмасьць дому свайго.
Хто чужаложыць з жанчынаю, той бязглузды; загубіць душу сваю той, хто гэтак чыніць.Ляв 20:10
Біцьцё і сорам знойдзе ён сабе, і ганьба яго ня змыецца,
бо рэўнасьць раз’юшвае мужа, і не пашкадуе ён у дзень помсты,
ня гляне ён на ніякую аднагароду і адкіне дары, хоць іх павялічыш.