Isa Isaias, kapitulo Ang Libro ni Isaias, kapitulo 13
Ang Mensahe bahin sa Babilonia
Mao kini ang mensahe bahin sa Babilonia nga gipadayag sa Ginoo kang Isaias nga anak ni Amos:Jer 30:1; Jer 50:1
Ibayaw ang usa ka bandera didto sa kinatumyan
sa hawan nga bungtod.
Unya singgit kamo ug kusog ngadto sa mga sundalo ug sinyasi sila
nga sulongon ang mga pultahan sa siyudad sa mga dungganong tawo.Isa 5:26; Isa 18:3; Jer 4:6
Gisugo ko na ang akong piniling mga sundalo
sa pagsilot sa mga tawong akong gikapungtan.
Kini nga mga sundalo nangalipay kay nagtuo gayod sila
nga himuon ko kini nga pagsilot.Jer 22:7
Pamatia ninyo ang kasaba gikan sa mga bukid
sa labihan kadaghang mga tawo.
Pamatia ninyo ang kasaba taliwala sa mga gingharian
ug mga nasod nga nagtigom.
Gitigom sa Ginoo nga Makagagahom
ang iyang mga sundalo alang sa pagpakig-gira.
Naggikan sila sa layo kaayong mga dapit.
Laglagon sa Ginoo ang tibuok yuta
pinaagi sa iyang mga sundalo.
Panghilak kamo tungod kay haduol na ang adlaw sa Ginoo,
ang adlaw nga manglaglag ang Makagagahom nga Dios.Jol 1:15
Nianang panahona, mangaluya ang tanang kamot sa mga tawo.
Malisang ang tanang mga tawo.
Magkurog sila sa kahadlok.
Bation nila ang labihang kasakit
ug maghigwaos sila sama sa babaye nga nagbati.
Magtinan-away sila sa usag usa,
ug ang ilang mga nawong mamula sa labihang kaulaw.2Ki 19:3; Psa 48:6; Isa 21:3
Pamati! Moabot ang adlaw sa Ginoo,
ang adlaw sa kapintas ug labihan nga kasuko.
Laglagon ang yuta hangtod nga dili na mapuy-an,
ug laglagon usab ang mga makasasala diha niini.Isa 22:5
Dili na mohatag sa ilang kahayag ang mga bitoon.
Mosubang ang adlaw nga walay kahayag
ug ang bulan dili usab mohatag ug kahayag.Isa 24:23; Ezk 32:7; Jol 2:31; Jol 3:15; Mat 24:29; Mrk 13:24; Luk 21:25
Miingon ang Ginoo, “Silotan ko ang kalibotan tungod sa iyang kadaotan,
ug ang mga tawong daotan tungod sa ilang mga sala.
Santaon ko ang mga garboso, ug sumpoon ko
ang pagkamapahitas-on sa mga tawong walay kaluoy.
Gamay na lang unya ang mahibiling mga tawo.
Mas nihit pa unya sila kay sa purong bulawan nga gikan sa Ofir.
Uyogon ko ang langit ug matay-og ang kalibotan.
Ako ang Ginoo nga Makagagahom, himuon ko kini sa adlaw nga ipakita ko ang akong labihan nga kapungot.”
Ang mga dumuduong sa Babilonia moikyas balik sa ilang tagsa-tagsa ka dapit
sama sa hayop nga usa nga gipangayam.
Manguli sila sama sa karnero nga walay magbalantay.1Ki 22:17; Mrk 6:34
Ang madakpan patyon pinaagi sa espada.
Dugmokon ang ilang gagmayng mga bata diha gayod mismo sa ilang atubangan.
Kuhaon ang mga kabtangan gikan sa ilang mga balay
ug lugoson ang ilang mga asawa.Psa 137:9; Jer 8:10
Pamati! Pasulongon ko sa Babilonia ang mga taga-Media
nga dili madani sa pilak ug bulawan.Jer 51:11; Dan 5:31
Pamatyon nila pinaagi sa pana ang mga batan-ong lalaki.
Dili nila kaloy-an ang mga kabataan bisan ang mga masuso.
Laglagon ko sama sa Sodoma ug Gomora ang Babilonia,
ang labing matahom nga gingharian sa tanan,
ang garbo ug dungog sa mga lumulupyo niini.Gen 19:24; Jer 50:40; Rev 18:2
Dili na gayod kini puy-an bisan kanus-a.
Walay Arabo nga magpatindog didto sa iyang tolda.
Ug wala usay magbalantay sa karnero nga magpasabsab
sa iyang mga karnero didto.
Puy-an na lang kini sa ihalas nga mga mananap.
Ang ilang mga balay puy-an sa mga kuwago ug sa uban pang mga mananap.
Molukso-lukso didto ang mga ihalas nga mga kanding.Jer 50:39
Ang mga mananap nga murag iro mag-uwang
sa mga tore ug sa mga palasyo sa Babilonia.
Hapit na ang kataposan sa Babilonia;
dili na kini madugay.