Выс Выслоўі, раздзел Кніга выслоўяў Саламонавых, раздзел 1
Выслоўі Саламона, сына Давідавага, цара Ізраільскага.3Цар 4:32
Каб спазнаць мудрасьць і настаўленьне, зразумець разумныя выслоўі;
засвоіць правілы добрай разважлівасьці, справядлівасьці, права і слушнасьці;
прастадушным даць кемнасьць, юнаку - веды і разважлівасьць;
паслухае мудры і памножыць веды, і разумны знойдзе мудрыя парады;
каб разумець выслоўе і загадкавую мову, словы мудрацоў і загадкі іхнія.
Пачатак мудрасьці - страх Гасподні; толькі дурні пагарджаюць мудрасьцю і настаўленьнем.Ёў 28:28; Пс 110:10; Экл 12:13
Слухай, сыне мой, настаўленьне бацькі твайго, і не адкідай запавету маці тваёй:
бо гэта - прыгожы вянок на галаву тваю і акраса на шыю тваю.Выс 4:9
Сыне мой! калі цябе будуць намаўляць грэшнікі, не згаджайся.Выс 4:14
Калі будуць казаць: «ідзі з намі, зробім засаду на кроў, падпільнуем бязгрэшнага і бязьвіннага,Ер 5:26; Міх 7:2
жывых праглынем іх, як апраметная, і - цэлых, як тых, што ў магілу сыходзяць;Пс 123:3
набяром усякага каштоўнага дабра, напоўнім дамы нашыя здабычаю;
далучы сваю долю да нашай, складка адна будзе на ўсіх нас»:
Сыне мой! не хадзі адною дарогаю зь імі, утрымай нагу тваю ад сьцежкі іхняй,Пс 1:1
бо іхнія ногі бягуць да ліхога і сьпяшаюцца кроў праліваць.Іс 59:7; Рым 3:15
На вачах ва ўсіх птушак дарма раскідаецца сетка;
а яны кроў сваю сочаць, засады ладзяць на душы свае.Мц 26:16
Такія дарогі ва ўсіх, хто прагне чужога дабра: яно забірае жыцьцё ў свайго ўласьніка.
Мудрасьць кліча на вуліцах, на плошчах узносіць свой голас,Выс 8:1; Лк 11:49
на шумных сходах прапаведуе, каля гарадское брамы прамаўляе слова сваё:Выс 8:3
«Дакуль, немысьлі, любіцьмеце невуцтва? дакуль пакепнікі будуць кепствам цешыцца? дакуль бязглуздыя будуць ненавідзець навуку?
паслухайце маёй засьцярогі: вось, я вылью на вас Духа майго, абвяшчу вам словы мае.
Я клікала, а вы не паслухаліся; я падавала руку маю, і ніхто не зважаў;Іс 65:12; Іс 66:4; Ер 7:13
і вы адкінулі ўсе мае рады, і перасьцярогаў маіх не прынялі:
за тое і я пасьмяюся з вашай пагібелі; парадуюся, калі прыйдзе ваш страх;Дрз 28:63; Езк 21:17
калі прыйдзе ваш страх, як бура, і няшчасьце, як віхура, наляціць на вас; калі спадобіць вас нядоля і ўціск.
Тады будуць клікаць мяне, і я не пачую.Іс 1:15; Ер 11:11
За тое, што зьненавідзелі веды і ня выбралі страху Гасподняга,Выс 1:24; Дзеі 13:40
не схацелі парады маёй, пагардзілі ўсімі перасьцярогамі маімі;
за тое няхай ядуць яны з плоду дарог сваіх і насычаюцца з парадаў сваіх.Іс 3:10
Бо адступніцтва неразумных заб'е іх, і бястурботнасьць немысьляў загубіць іх.
А хто мяне слухае, будзе жыць у бясьпецы і спакойна, не баючыся ліха».Пс 111:7