Psa Mga Salmo, salmo Ang Libro sa Mga Salmo, salmo 38
Ang awit ni David nga ginaawit panahon sa paghalad sa halad sa paghinumdom sa Ginoo.
Ginoo, sa imong kasuko, ayaw akog siloti.Psa 6:1; Jer 10:24
Daw sa gipana mo ako ug gidagmalan.Deu 32:23; Job 6:4
Nagsakit ako tungod kay nasuko ka sa nahimo kong mga kasal-anan.
Daw sa malumos na ako sa akong mga sala;
sama kini sa mabug-at nga palas-anon nga dili ko madaog.Psa 32:4; Ezk 33:10
Tungod sa akong kabuang,
ang akong mga samad nahimong kabahong.
Nabako na ako pag-ayo sa labihan nga kasakit,
ug nagsubo ako tibuok adlaw.Psa 42:9
Sakit kaayo ang tibuok nakong lawas
ug gangutngot ang akong mga kilid.
Naluya na gayod ako pag-ayo.
Nag-agulo ako sa kasakit nga akong gibati.
Ginoo, nahibalo ka sa tanan kong gipangandoy
ug nadungog mo ang akong pag-agulo.
Nagkuba-kuba ang akong dughan;
nawad-an na ako ug kusog,
ug nahalap na ang akong panan-aw.
Ginalikayan ako sa akong mga higala ug mga kauban tungod sa akong sakit.
Bisan ang akong mga paryente nagpahilayo na kanako.Job 19:13; Job 30:10; Psa 31:11
Ang mga tawo nga buot mopatay kanako nagbutang ug lit-ag.
Sila nga buot mosakit kanako naghisgot kon unsaon nila ako paglaglag.
Sa tibuok adlaw nagplano sila ug daotan batok kanako.
Nagpabungol-bungol ako nga kunohay dili makadungog.
Nagpaamang-amang ako nga kunohay dili makasulti.Isa 53:7; Mat 27:12; Act 8:32
Nahisama ako sa usa ka tawo nga dili makadungog,
ug dili makapangatarongan.
Kay nagsalig ako kanimo, Ginoo.
Ikaw, Ginoo nga akong Dios,
ang magtubag sa akong pag-ampo.
Busa nag-ampo ako nga dili mo itugot
nga ang akong mga kaaway maglipay
o magpasigarbo tungod sa akong pagkapukan.
Kay hapit na ako mapukan,
ug daw sa walay kataposan ang akong pag-antos.
Isulti ko ang akong mga sala;
gahasol kini kanako.Psa 32:5; 2Co 7:10
Mahitungod sa akong mga kaaway,
lig-on sila ug daghan.
Gikasilagan nila ako sa walay igong hinungdan.
Gibalosan nila ako ug daotan
sa maayong gipanghimo ko kanila.
Ug nakigbatok sila kanako
kay nagtinguha ako sa pagbuhat ug maayo.Psa 109:5
Ginoo nga akong Dios, ayaw ako pasagdi;
ayaw pagpahilayo kanako.
Tabangi ako dayon,
Ginoo nga akong manluluwas.