Пс Псалтыр, псалом Псалтыр, псалом 103
Псальма Давідава пра стварэньне сьвету.
Дабраславі, душа мая, Госпада! Госпадзе, Божа мой! Ты дзівосна вялікі. Ты ўбраны ў славу і ў веліч,Пс 102:1; Пс 102:22
Ты ўбіраешся ў сьвятло, як у шаты, прасьціраеш нябёсы, як заслону,Быц 1:3; Быц 1:6; Быц 1:8
ладзіш над водамі вышынныя харомы Твае, робіш хмары Твае калясьніцаю, крочыш на крылах ветру.Быц 1:7
Ты творыш анёлаў Тваіх з духаў, слуг Тваіх - з вагню палымянага.Габр 1:7
Ты паставіў зямлю на цьвёрдых асновах: не пахісьнецца яна векавечна.
Безданьню, як вопраткаю, накрыў Ты яе; на горах воды стаяць.
Ад пагрозы Тваёй уцякаюць яны, ад голасу грому Твайго пабеглі яны;Ёў 37:5
узыходзяць на горы, сыходзяць у даліны, на месца, якое Ты ім назначыў.
Ты паклаў мяжу, якой не пяройдуць, і ня вернуцца зямлю пакрыць.Ёў 38:10
Ты паслаў крыніцы ў даліны; паміж гор цякуць воды,Пс 73:15; Дрз 11:11; Ёў 5:10
пояць усіх зьвяроў польных; дзікія аслы спатольваюць смагу сваю.
Каля іх жывуць птушкі нябесныя, з гольля падаюць галасы.
Ты напойваеш горы з вышыняў Тваіх, плёнам дзеяў Тваіх зямля насычаецца.
Ты росьціш быдлу траву, і зеляніну на спажытак чалавеку, каб ежу зь зямлі здабываў,Пс 146:8
і віно, якое вяселіць сэрца чалавеку, і алей, ад якога блішчыць твар ягоны, і хлеб, які мацуе сэрца чалавеку.Суд 9:13
Насычаюцца дрэвы Госпада, кедры Ліванскія, якія Ён пасадзіў;
на іх гняздуюцца птушкі: яліны - пад гняздо буслам,
высокія горы - сарнам; каменныя скалы - сховы зайцам.
Ён стварыў месяц на азначэньне часу; сонца ведае свой захад.
Ты прасьціраеш цемру, і бывае ноч: уначы бадзяюцца ўсе лясныя зьвяры;Быц 1:16
ільвы, якія рыкаюць па здабычы і просяць у Бога ежы сабе.Пс 146:9; Іс 31:4
Устае сонца, і яны зьбіраюцца і кладуцца ў свае логвішчы;Ёў 37:8
выходзіць чалавек на дзеі свае і на працу сваю да вечара.
Як многа дзеяў Тваіх, Госпадзе! Усё стварыў Ты мудра; зямля поўная твораў Тваіх.Пс 32:5; Пс 91:6
Гэта мора - вялікае і шырокае: там паўзуны, якім ліку няма, жывёлы малыя і вялікія;
там плаваюць караблі, там гэты левіяфан, якога Ты стварыў гуляць у ім.Ёў 40:20
Усе яны ад Цябе чакаюць, каб Ты даў ім ежу сваечасова.Пс 144:15
Даеш ім - прымаюць; адкрываеш далоню Тваю - насычаюцца дабром;Выс 6:8
схаваеш аблічча Тваё - палохаюцца; забіраеш у іх дух - паміраюць, і ў пыл свой вяртаюцца;Ёў 12:10; Дан 5:23
пашлеш дух Твой - ствараюцца, і Ты абнаўляеш улоньне зямлі.Ёў 33:4
Хай будзе Госпаду слава навечна; хай радуецца Гасподзь дзеямі Сваімі.
Паглядзіць на зямлю, і яна трасецца; дакранецца да гор, і дымяцца.Пс 143:5
Буду сьпяваць Госпаду ўсё жыцьцё маё, буду сьпяваць Богу майму, пакуль я ёсьць.Пс 33:2
Хай Яму паспрыяе песьня мая; буду радавацца ў Госпадзе.
Хай зьнікнуць грэшнікі зь зямлі, і бязбожных хай болей ня будзе. Дабраславі, душа мая, Госпада! Алілуя!Пс 102:1