Лік Лікі, раздзел Чацвёртая кніга Майсеева. Лікі, раздзел 34
І сказаў Гасподзь Майсею, кажучы:
загадай сынам Ізраілевым і скажы ім: калі ўвойдзеце ў зямлю Ханаанскую, дык вось зямля, якая дастанецца вам у надзел, зямля Ханаанская зь яе межамі:Быц 15:18
паўднёвы бок будзе ў вас ад пустыні Сін, каля Эдома, і пойдзе ў вас паўднёвая мяжа ад канца Салёнага мора з усходу,Нав 15:1
і пойдзе мяжа на поўдзень да ўзвышша Акравіма і пойдзе праз Сін, і будуць выступы яе на поўдзень да Кадэс-Варні, адтуль пойдзе да Гацар-Адара і пройдзе праз Ацмон;Нав 15:3
ад Ацмона пойдзе мяжа да патока Егіпецкага, і будуць выступы яе да мора;Быц 15:18; Нав 15:4
а мяжою заходняю будзе ў вас вялікае мора: гэта будзе ў вас мяжа на захад;Нав 15:47
а на поўнач будзе ў вас мяжа: ад вялікага мора правядзеце яе да гары Ор,
ад гары Ор правядзеце да Эмата, і будуць выступы мяжы да Цэдада;
адтуль пойдзе мяжа да Цыфрона, і выступы яе будуць да Гацар-Энана: гэта будзе ў вас мяжа паўночная;
мяжу ўсходнюю правядзеце сабе ад Гацар-Энана да Шэфама,1Цар 30:28
ад Шэфама пойдзе мяжа да Рыблы, з усходняга боку Аіна, потым пойдзе мяжа і кранецца берагоў мора Кінэрэт з усходняга боку;Дрз 3:17; Лк 5:1
і пойдзе мяжа да Ярдана, і будуць выступы яе да Салёнага мора. Гэта будзе мяжа ваша ў межах яе з усіх бакоў.Лік 32:33
І загадаў Майсей сынам Ізраілевым і сказаў: вось зямля, якую вы падзеліце на надзелы па жэрабі, якую загадаў Гасподзь даць дзевяці плямёнам і палавіне племя;Нав 14:2; Дзеі 13:19
бо племя сыноў Рувімавых паводле сямействаў іхніх, і племя сыноў Гадавых паводле сямействаў іхніх, і палавіна племя Манасіінага, атрымалі надзел свой;
два плямёны і палавіна племя атрымалі надзел свой за Ярданам насупраць Ерыхона на ўсход.
І сказаў Гасподзь Майсею, кажучы:
вось імёны мужоў, якія будуць дзяліць вам зямлю: Элеазар сьвятар і Ісус, сын Наваў;Нав 14:1; Нав 21:1
і па адным князі ад племя вазьмеце для падзелу зямлі.
І вось імёны гэтых мужоў: для племя Юдавага Халеў, сын Ефаніін;
для племя сыноў Сымонавых Самуіл, сын Аміудаў;
для племя Веньямінавага Элідад, сын Кіслонаў;
для племя сыноў Данавых князь Букій, сын Ёгліі;
для сыноў Язэпавых, для племя сыноў Манасііных князь Ханііл, сын Эфодаў;
для племя сыноў Яфрэмавых князь Кемуіл, сын Шыфтанаў;
для племя сыноў Завулонавых князь Эліцафан, сын Фарнакаў;
для племя сыноў Ісахаравых князь Фалтыіл, сын Азанаў;
для племя сыноў Асіравых князь Ахіуд, сын Шэломія;
для племя сыноў Нэфталімавых князь Пэдаіл, сын Аміудаў;
вось тыя, каму загадаў Гасподзь падзяліць надзелы сынам Ізраілевым у зямлі Ханаанскай.