Мц Мацвея, раздзел Паводле Мацвея Святое Дабравесце, раздзел 15
Тады прыходзяць да Ісуса Ерусалімскія кніжнікі і фарысэі і кажуць:Мк 7:1
навошта вучні Твае парушаюць звычай старцаў? бо ня ўмываюць рук сваіх, калі ядуць хлеб.
А Ён сказаў ім у адказ: навошта і вы парушаеце запаведзь Божую дзеля звычаю вашага?
Бо Бог запаведаў, сказаўшы: шануй бацьку і маці; і: хто ліхасловіць бацьку альбо маці, сьмерцю хай памрэ.Вых 20:12; Вых 21:17; Ляв 20:9; Дрз 5:16; Выс 20:20; Мк 7:10; Эф 6:2
А вы кажаце: калі хто скажа бацьку альбо маці: «дар Богу - тое, чым бы ты ад мяне карыстаўся»,
той можа і не ўшанаваць бацьку альбо маці сваю; такім чынам вы скасавалі запаведзь Божую дзеля звычаю вашага.
Крывадушнікі! добра прарочыў пра вас Ісая, кажучы:
«Набліжаюцца да Мяне людзі гэтыя вуснамі сваімі і шануюць Мяне языком; а сэрца іхняе далёка адлягае ад Мяне;Мк 7:6
але марна шануюць Мяне, навучаючы вучэньням, запаведзям чалавечым».Іс 29:13
І паклікаўшы люд, сказаў яму: слухайце і разумейце:Мк 7:14
ня тое, што ўваходзіць у вусны, апаганьвае чалавека; а што выходзіць з вуснаў, тое апаганьвае чалавека.
Тады вучні Ягоныя, прыступіўшы, сказалі Яму: ці ведаеш, што фарысэі, пачуўшы слова гэтае, запаняверыліся?
А Ён сказаў у адказ: усякая расьліна, якую не Айцец Мой Нябесны пасадзіў, выкараніцца,Ян 15:2
пакіньце іх: яны - сьляпыя павадыры сьляпых; а калі сьляпы сьляпога вядзе, дык абодва ў яму ўпадуць.Іс 42:19; Ер 5:31; Лк 6:39
А Пётр сказаў Яму ў адказ: растлумач нам прытчу гэтую.
Ісус сказаў: няўжо і вы яшчэ ня маеце разуменьня?
ці яшчэ не разумееце, што ўсё, што ўваходзіць у вусны, праходзіць у чэрава і праз кішку выходзіць?
а што выходзіць з вуснаў - з сэрца выходзіць; і гэта апаганьвае чалавека;Як 3:6
бо з сэрца выходзяць ліхія намыслы, забойствы, пералюбы, распуста, крадзяжы, ілжывыя сьведчаньні, зьнявагі:Быц 6:5; Быц 8:21; Мк 7:21
гэта апаганьвае чалавека; а есьці няўмытымі рукамі - не апаганьвае чалавека.
І выйшаўшы адтуль, адышоў Ісус у межы Тырскія і Сідонскія.Мк 7:24
І вось, жанчына Хананэянка, выйшаўшы з тых мясьцін, закрычала Яму: памілуй мяне, Госпадзе, Сыне Давідаў, дачку маю цяжка мучыць дэман.
Але Ён не адказаў ёй ні слова. І вучні Ягоныя, прыступіўшы, прасілі Яго, кажучы: адпусьці яе, бо крычыць за намі.
А Ён сказаў у адказ: Я пасланы толькі да пагіблых авечак дому Ізраілевага.Іс 58:6; Ер 50:6; Езк 34:5; Мц 10:6
А яна, падышоўшы, кланялася Яму, кажучы: Госпадзе! памажы мне.
А Ён сказаў у адказ: нядобра - узяць хлеб у дзяцей і кінуць шчанятам.
Яна ж сказала: так, Госпадзе! але і шчаняты ядуць крошкі, якія падаюць са стала гаспадароў іхніх.
Тады Ісус сказаў ёй у адказ: жанчына! вялікая вера твая, хай станецца табе, як ты хочаш. І выздаравела яе дачка ў тую ж гадзіну.
Перайшоўшы адтуль, прыйшоў Ісус да мора Галілейскага і, узышоўшы на гару, сеў там.
І прыступіла да Яго мноства людзей, маючы з сабою кульгавых, сьляпых, нямых, зьнявечаных і іншых многіх, і паклалі іх да ног Ісусавых; і Ён ацаліў іх,Іс 35:5
так што людзі зьдзіўляліся, бачачы, як нямыя гавораць, зьнявечаныя здаравеюць, кульгавыя ходзяць і сьляпыя бачаць; і праслаўлялі Бога Ізраілевага.
А Ісус, паклікаўшы вучняў Сваіх, сказаў ім: шкада Мне людзей, бо ўжо тры дні застаюцца пры Мне, і няма чаго ім есьці; і адпусьціць іх няеўшых не хачу, каб не аслаблі ў дарозе.Мк 8:1
І кажуць Яму вучні Ягоныя: адкуль нам узяць у пустыні столькі хлябоў, каб накарміць столькі людзей?
І кажа ім Ісус: колькі ў вас хлябоў? А яны адказалі: сем, і трошкі рыбак.
І загадаў людзям узьлегчы на зямлю.
І, узяўшы сем хлябоў і рыбы, узьнёс падзяку, пераламаў і даў вучням Сваім, а вучні - людзям.
І елі ўсе, і наеліся; і набралі рэшты кавалкаў сем кашоў поўных;
А тых, што елі, было чатыры тысячы чалавек, акрамя жанчын і дзяцей.
І адпусьціўшы народ, Ён увайшоў у лодку і прыбыў у межы Магдалінскія.