Mt Matthieu, chapitre Évangile selon Matthieu, chapitre 4
Autre écriture : церковнославянский
Тогда́ иису́с возведе́н бысть ду́хом в пусты́ню искуси́тися от диа́вола,
и пости́вся дний четы́редесять и но́щий четы́редесять, последи́ взалка́.
И присту́пль к нему́ искуси́тель рече́: а́ще сын еси́ бо́жий, рцы, да ка́мение сие́ хле́бы бу́дут.
Он же отвеща́в рече́: пи́сано есть: не о хле́бе еди́нем жив бу́дет челове́к, но о вся́цем глаго́ле исходя́щем изо уст бо́жиих.Dt 8:3; Lc 4:4
Тогда́ поя́т его́ диа́вол во святы́й град, и поста́ви его́ на криле́ церко́внем,
и глаго́ла ему́: а́ще сын еси́ бо́жий, ве́рзися ни́зу: пи́сано бо есть, я́ко а́нгелом свои́м запове́сть о тебе́ (сохрани́ти тя), и на рука́х во́змут тя, да не когда́ преткне́ши о ка́мень но́гу твою́.Ps 90:11; Lc 4:10
Рече́ (же) ему́ иису́с: па́ки пи́сано есть: не иску́сиши го́спода бо́га твоего́.Dt 6:16; Lc 4:12
Па́ки поя́т его́ диа́вол на гору́ высоку́ зело́, и показа́ ему́ вся ца́рствия ми́ра и сла́ву их,
и глаго́ла ему́: сия́ вся тебе́ дам, а́ще пад поклони́шимися.
Тогда́ глаго́ла ему́ иису́с: иди́ за мно́ю, сатано́: пи́сано бо есть: го́споду бо́гу твоему́ поклони́шися и тому́ еди́ному послу́жиши.Dt 6:13; Dt 10:20; Lc 4:8
Тогда́ оста́ви его́ диа́вол, и се, а́нгели приступи́ша и служа́ху ему́.
Слы́шав же иису́с, я́ко иоа́нн пре́дан бысть, оти́де в галиле́ю,Mc 1:14; Lc 4:14; Jn 4:43
и оста́вль назаре́т, прише́д всели́ся в капернау́м в помо́рие, в преде́лех завуло́них и неффали́млих:
да сбу́дется рече́нное иса́ием проро́ком, глаго́лющим:
земля́ завуло́ня и земля́ неффали́мля, путь мо́ря об он пол иорда́на, галиле́а язы́к,
лю́дие седя́щии во тме ви́деша свет ве́лий, и седя́щым в стране́ и се́ни сме́ртней, свет возсия́ им.És 9:1
Отто́ле нача́т иису́с пропове́дати и глаго́лати: пока́йтеся, прибли́жися бо ца́рство небе́сное.Mc 1:15
Ходя́ же при мо́ри галиле́йстем, ви́де два бра́та, си́мона глаго́лемаго петра́, и андре́а бра́та его́, вмета́юща мре́жи в мо́ре, бе́ста бо ры́баря:Mc 1:16
и глаго́ла и́ма: гряди́та по мне, и сотворю́ вы ловца́ челове́ком.
О́на же а́бие оста́вльша мре́жи, по нем идо́ста.
И преше́д отту́ду, ви́де и́на два бра́та, иа́кова зеведе́ева, и иоа́нна бра́та его́, в корабли́ с зеведе́ом отце́м ею́, завязу́юща мре́жи своя́, и воззва́ я.
О́на же а́бие оста́вльша кора́бль и отца́ своего́, по нем идо́ста.
И прохожда́ше всю галиле́ю иису́с, учя́ на со́нмищах их и пропове́дая ева́нгелие ца́рствия, исцеля́я всяк неду́г и вся́ку я́зю в лю́дех.
И изы́де слух его́ по всей сири́и: и приведо́ша к нему́ вся боля́щыя, разли́чными неду́ги и страстьми́ одержи́мы, и бе́сны, и ме́сячныя, и разсла́бленныя (жи́лами): и исцели́ их.Mc 6:55
И по нем идо́ша наро́ди мно́зи от галиле́и и десяти́ град, и от иерусали́ма и иуде́и, и со о́наго по́лу иорда́на.Lc 6:17