Ёў Ёў, раздзел Кніга Ёва, раздзел 37
І ад гэтага дрыжыць сэрца маё і зрушылася зь месца свайго.
Слухайце, слухайце голас Яго і гром з вуснаў Ягоных.
Пад усім небам раскаты Ягоныя, і бляск Ягоны - да краёў.Пс 17:15
За ім грыміць голас; грыміць Ён голасам велічы Сваёй і ня спыняе яго, калі голас Ягоны пачуты.
Даўно грыміць Бог голасам Сваім, чыніць дзеі вялікія, нам не спасьцігальныя.Пс 28:3; Пс 76:19; Ёў 5:9
Бо сьнегу Ён кажа: будзь на зямлі; гэтак сама дробны дождж і вялікі дождж у Ягонай уладзе.Пс 32:9; Пс 147:5
Ён кладзе пячатку на руку кожнаму чалавеку, каб усе людзі ведалі дзею Яго.
Тады зьвер сыходзіць у сховішча і застаецца ў сваіх логавах.Пс 103:22
З поўдня прыходзіць бура, а з поўначы - сьцюжа.
Ад павеву Божага паходзіць лёд, і паверхня вады сьціскаецца.
Гэтак сама вільгацьцю напаўняе Ён хмары, і воблакі сеюць сьвятло Ягонае,
і яны кіруюцца паводле намераў Ягоных, каб выканаць тое, што Ён загадае ім на ўлоньні населенай зямлі.
Ён загадвае ім ісьці альбо дзеля пакараньня, альбо ў дабраволеньне, альбо дзеля памілаваньня.
Слухай гэтага, Ёў; стой і разумей дзівосныя дзеі Божыя.Пс 110:2
Ці ведаеш, як Бог кіруе імі і загадвае сьвятлу зьзяць з воблака Свайго?
Ці разумееш раўнавагу воблакаў, дзівосную дзею Найдасканалейшага ў веданьні?
Як награваецца твая вопратка, калі Ён супакойвае зямлю з поўдня?
Ці ж ты зь Ім распасьцёр нябёсы, цьвёрдыя, як літае люстра?Іс 44:24
Навучы нас, што сказаць Яму? Мы ў гэтай цемры нічога ня можам ведаць.
Ці будзе абвешчана Яму, што я кажу? Ці сказаў хто, што сказанае даносіцца Яму?
Цяпер ня бачна яркага сьвятла ў воблаках, але праляціць вецер і расчысьціць іх.
Сьветлае надворэе прыходзіць з поўначы, і вакол Бога страшэнная прыгажосьць.
Усеўладца! мы не дасягаем Яго. Ён вялікі сілаю і поўніцаю правасудзьдзя. Ён ні на кога не гняце.Ёў 9:4; Ёў 12:13; Ёў 12:16; Пс 144:3
Таму хай багавеюць прад Ім людзі, і хай дрыжаць прад Ім усе мудрыя сэрцам!