Выс Выслоўі, раздзел Кніга выслоўяў Саламонавых, раздзел 1
Прыповесьці Салямона, сына Давіда, валадара Ізраіля,3Цар 5:12
каб спазнаць мудрасьць і настаўленьне, зразумець словы розуму,
каб атрымаць настаўленьні ў разважлівасьці, праведнасьці, судзе і справядлівасьці,
каб неразумным даць разумнасьць, юнаку — веды і разважлівасьць.
Мудры няхай слухае і павялічвае веды, а разумны няхай прыдбае мудрыя думкі,
каб зразумець выслоўе і прыповесьць, словы мудрых і загадкі іхнія.
Страх перад ГОСПАДАМ — пачатак веданьня. Неразумныя пагарджаюць мудрасьцю і настаўленьнем.Ёў 28:28; Пс 111:10; Экл 12:13
Сыне мой, паслухай перасьцярогаў бацькі твайго і не адкідай настаўленьняў маці тваёй,
бо яны — прывабны вянок на галаве тваёй і каштоўныя каралі на шыі тваёй.Выс 4:9
Сыне мой, калі б цябе намаўлялі грэшнікі, не далучайся да іх.Выс 4:14
Калі яны скажуць: «Хадзем з намі! Зробім засаду дзеля праліцьця крыві; наставім без прычыны пастку на нявіннага;Ер 5:26; Міх 7:2
праглынем іх жыўцом, як пекла, і цалкам, як тых, што зыходзяць у магілу;Пс 124:3
знойдзем усялякія каштоўнасьці, напоўнім дамы свае здабычаю.
Жэрабя сваё кідай разам з намі, няхай адзін мех будзе для нас усіх».
Сыне мой, не хадзі з імі, устрымай нагу тваю ад сьцежкі іхняй,Пс 1:1
бо ногі іхнія бягуць да злачынства і сьпяшаюцца на праліцьцё крыві.Іс 59:7; Рым 3:15
Бо надарэмна настаўляецца сетка на вачах усяго птаства.
А яны цікуюць на ўласную кроў, робяць засаду супраць душы сваёй.Мц 26:16
Такія вось сьцежкі кожнага, хто прагне чужога даброцьця; яно забірае душу таго, хто завалодае ім.
Мудрасьць гукае на вуліцах, на плошчах узьнімае голас свой,Выс 8:1; Лк 11:49
на скрыжаваньнях шумлівых дарог кліча, у брамах гарадзкіх гучаць яе словы:Выс 8:3
«Дакуль, неразумныя, будзеце любіць неразумнасьць; дакуль, насьмешнікі, будзеце захапляцца насьмешкамі сваімі, а невукі — пагарджаць веданьнем?
Зьвярніцеся да настаўленьня майго, і я выльлю на вас духа майго, і абвяшчу вам словы мае.
Вось жа я клікала, але вы адмаўляліся, працягвала руку сваю, але ніхто не зьвярнуў увагі.Іс 65:12; Іс 66:4; Ер 7:13
Вы ўзгардзілі радай маёю і адкінулі дакараньні мае.
Дык і я буду сьмяяцца з падзеньня вашага, і насьміхацца буду, калі прыйдзе на вас жах.Дрз 28:63; Езк 21:22
Калі нахлыне жах, як бура, і загуба ваша, быццам віхура, калі прыйдуць на вас трывога і гора,
тады будуць клікаць мяне, але я не адкажу, будуць шукаць мяне, і ня знойдуць мяне.Іс 1:15; Ер 11:11
Бо яны зьненавідзелі веданьне і ня выбралі для сябе страху перад ГОСПАДАМ,Выс 1:24; Дзеі 13:40
і не пайшлі за парадамі маімі, і ўзгардзілі перасьцярогамі маімі.
Дык няхай ядуць яны плады шляху свайго і насыцяцца намерамі сваімі.Іс 3:10
Бо адступніцтва неразумных заб’е іх, бяздумнасьць дурняў загубіць іх.
А хто слухае мяне, будзе жыць бясьпечна, будзе спакойны, не баючыся зла».Пс 112:7