Num Numeri, kapitola Čtvrtá kniha Mojžíšova, kapitola 35
И҆ речѐ гдⷭ҇ь къ мѡѷсе́ю на за́падѣ мѡа́вли ѹ҆ і҆ѻрда́на при і҆ерїхѡ́нѣ, гл҃ѧ:
заповѣ́ждь сынѡ́мъ і҆и҃лєвымъ, да дадѧ́тъ леѵі́тѡмъ ѿ жрє́бїй ѡ҆держа́нїѧ своегѡ̀ гра́ды всели́тисѧ, и҆ предгра̑дїѧ гра̑дскаѧ ѡ҆́крестъ и҆́хъ да дадѧ́тъ леѵі́тѡмъ:Jos 21:2
и҆ бꙋ́дꙋтъ и҆̀мъ гра́ды вселѧ́тисѧ, и҆ ѹ҆ча̑стїѧ и҆́хъ да бꙋ́дꙋтъ скотѡ́мъ и҆́хъ и҆ всѣ̑мъ четверонѡ́жнымъ и҆́хъ:
и҆ прилєжа́щаѧ градѡ́мъ, и҆̀хже дади́те леѵі́тѡмъ, ѿ стѣны̀ гра́да и҆ внѣ̀, двѣ̀ ты́сѧщы лакѡ́тъ ѡ҆́крестъ:
и҆ да и҆змѣ́риши странꙋ̀ внѣ̀ гра́да, ꙗ҆́же на восто́къ, двѣ̀ ты́сѧщы лакѡ́тъ, и҆ странꙋ̀, ꙗ҆́же къ лі́вѣ, двѣ̀ ты́сѧщы лакѡ́тъ, и҆ странꙋ̀, ꙗ҆́же къ мо́рю, двѣ̀ ты́сѧщы лакѡ́тъ, и҆ странꙋ̀, ꙗ҆́же къ сѣ́верꙋ, двѣ̀ ты́сѧщы лакѡ́тъ, и҆ гра́дъ посредѣ̀ сегѡ̀ бꙋ́детъ ва́мъ, и҆ предѣ́лы градѡ́въ:Jos 21:12
и҆ гра́ды ꙗ҆̀же дади́те леѵі́тѡмъ, ше́сть градѡ́въ (да бꙋ́дꙋтъ) ѹ҆бѣ́жныхъ, и҆̀хже дади́те ѹ҆бѣга́ти въ нѧ̀ ѹ҆би́вшемꙋ, и҆ къ си̑мъ четы́редесѧть и҆ два̀ гра̑да:Deu 4:42; Jos 20:2
всѣ́хъ градѡ́въ дади́те леѵі́тѡмъ четы́редесѧть и҆ ѻ҆́смь градѡ́въ, сїѧ̑ и҆ предгра̑дїѧ и҆́хъ:Jos 21:41
и҆ гра́ды, и҆̀хже дади́те ѿ ѡ҆держа́нїѧ сынѡ́въ і҆и҃левыхъ, ѿ мно́гихъ мнѡ́га, а҆ ѿ ма́лыхъ ма̑ла: кі́йждо по наслѣ́дїю своемꙋ̀, є҆́же наслѣ́дѧтъ, да дадѧ́тъ ѿ градѡ́въ леѵі́тѡмъ.Gal 6:6
И҆ речѐ гдⷭ҇ь къ мѡѷсе́ю, гл҃ѧ:
глаго́ли сынѡ́мъ і҆и҃лєвымъ и҆ рече́ши къ ни̑мъ: вы̀ прехо́дите і҆ѻрда́нъ въ зе́млю ханаа́ню:
и҆ раздѣли́те са́ми себѣ̀ гра́ды: ѹ҆бѣ̑жища да бꙋ́дꙋтъ ва́мъ ѹ҆бѣга́ти въ нѧ̀ ѹ҆бі́йцѣ, всѧ́къ ѹ҆би́вый дꙋ́шꙋ нехотѧ́й:Exo 21:13; Deu 19:2; Jos 20:2
и҆ бꙋ́дꙋтъ гра́ди ва́мъ ѹ҆бѣ̑жища ѿ ѹ҆́жика кро́ве, и҆ да не ѹ҆́мретъ ѹ҆би́вый, до́ндеже ста́нетъ пред̾ со́нмомъ на сꙋдѣ̀:Lev 25:26; Jos 20:3; Jos 20:6
и҆ гра́ды, ꙗ҆̀же дади́те, ше́сть градѡ́въ, ѹ҆бѣ̑жища да бꙋ́дꙋтъ ва́мъ.
Трѝ гра́ды дади́те ѡ҆б̾ ѻ҆нꙋ̀ странꙋ̀ і҆ѻрда́на, и҆ трѝ гра́ды дади́те въ землѝ ханаа́ни:Deu 4:41; Jos 20:8
ѹ҆бѣ́жище да бꙋ́детъ сынѡ́мъ і҆и҃лєвымъ, и҆ прише́лцꙋ, и҆ ѡ҆бита́лникꙋ и҆́же въ ва́съ, да бꙋ́дꙋтъ гра́ди сі́и во ѹ҆бѣ́жище ѹ҆бѣга́ти та́мѡ всѧ́комꙋ ѹ҆би́вшемꙋ дꙋ́шꙋ нехотѣ́нїемъ.
А҆́ще же ѻ҆рꙋ́дїемъ желѣ́знымъ ѹ҆бїе́тъ є҆го̀, и҆ ѹ҆́мретъ, ѹ҆бі́йца є҆́сть: сме́ртїю да ѹ҆́мретъ ѹ҆бі́йца.Exo 21:12; Lev 24:17
А҆́ще же ка́менїемъ и҆з̾ рꙋкѝ ѹ҆бїе́тъ є҆го̀, и҆ ѹ҆́мретъ ѿ негѡ̀, ѹ҆бі́йца є҆́сть: сме́ртїю да ѹ҆́мретъ ѹ҆бі́йца.
А҆́ще же ѻ҆рꙋ́дїемъ древѧ́нымъ и҆з̾ рꙋкѝ, ѿ негѡ́же ѹ҆́мретъ, ѹ҆бїе́тъ є҆го̀, и҆ ѹ҆́мретъ, ѹ҆бі́йца є҆́сть: сме́ртїю да ѹ҆́мретъ ѹ҆бі́йца.
ѹ҆́жикъ кро́ве, се́й да ѹ҆бїе́тъ ѹ҆би́вшаго: є҆гда̀ ѹ҆срѧ́щетъ є҆го̀, се́й да ѹ҆бїе́тъ є҆го̀.2Sa 14:7; Exo 21:23
А҆́ще же вражды̀ ра́ди ри́нетъ є҆го̀ и҆ ве́ржетъ на него̀ всѧ́къ сосꙋ́дъ по навѣ́тꙋ, и҆ ѹ҆́мретъ,Deu 19:11
и҆лѝ ѿ не́нависти порази́лъ є҆го̀ рꙋко́ю, и҆ ѹ҆́мретъ, сме́ртїю да ѹ҆́мретъ ѹ҆би́вый, ѹ҆бі́йца є҆́сть: сме́ртїю да ѹ҆́мретъ ѹ҆бива́ѧй: ѹ҆́жикъ кро́ве да ѹ҆бїе́тъ ѹ҆бі́йцꙋ, є҆гда̀ срѣ́титсѧ съ ни́мъ.Deu 19:12
А҆́ще же внеза́пꙋ не вражды̀ ра́ди ри́нетъ є҆го̀, и҆лѝ ве́ржетъ на него̀ всѧ́къ сосꙋ́дъ не по навѣ́тꙋ,Deu 19:4
и҆лѝ всѧ́кимъ ка́менемъ, и҆́мже ве́ржетъ не вѣ́дый, и҆ паде́тъ на него̀, и҆ ѹ҆́мретъ, ѻ҆́нъ же вра́гъ є҆гѡ̀ не бѣ̀, нижѐ и҆щѧ́й ѕла̀ є҆мꙋ̀ твори́ти,
и҆ да сꙋ́дитъ со́нмъ междꙋ̀ ѹ҆би́вшимъ и҆ междꙋ̀ ѹ҆́жикомъ кро́ве, по сꙋдба́мъ си̑мъ,
и҆ и҆зба́витъ со́нмъ ѹ҆би́вшаго ѿ ѹ҆́жика кро́ве, и҆ да возврати́тъ є҆го̀ со́нмъ во гра́дъ ѹ҆бѣ́жища є҆гѡ̀, въ ѻ҆́ньже ѹ҆бѣжа̀, и҆ да поживе́тъ та́мѡ, до́ндеже ѹ҆́мретъ жре́цъ вели́кїй, є҆го́же пома́заша є҆ле́емъ ст҃ы́мъ.Eph 2:16; Lev 8:12; Psa 44:8
А҆́ще же и҆схо́домъ и҆зы́детъ ѹ҆би́вый внѣ̀ предѣ̑лъ гра́да, въ ѻ҆́ньже ѹ҆бѣжа̀ та́мѡ,
и҆ ѡ҆брѧ́щетъ є҆го̀ ѹ҆́жикъ кро́ве внѣ̀ предѣ̑лъ гра́да ѹ҆бѣ́жища є҆го̀, и҆ ѹ҆бїе́тъ ѹ҆́жикъ кро́ве ѹ҆би́вшаго, нѣ́сть пови́ненъ:
во гра́дѣ бо ѹ҆бѣжа́нїѧ да живе́тъ, до́ндеже ѹ҆́мретъ жре́цъ вели́кїй, и҆ по ѹ҆ме́ртвїи жерца̀ вели́кагѡ да возврати́тсѧ ѹ҆би́вый въ зе́млю ѡ҆держа́нїѧ своегѡ̀.
И҆ да бꙋ́дꙋтъ сїѧ̑ ва́мъ во ѡ҆правда́нїе сꙋда̀ въ роды̀ ва́шѧ во всѣ́хъ селе́нїихъ ва́шихъ.Exo 12:17
Всѧ́каго ѹ҆би́вшаго дꙋ́шꙋ, пред̾ свидѣ́телми да ѹ҆бїе́ши ѹ҆би́вшаго: и҆ свидѣ́тель є҆ди́нъ да не свидѣ́телствꙋетъ на сме́рть дꙋшѝ.Deu 19:15
И҆ да не во́змете и҆скꙋ́па за дꙋ́шꙋ ѿ ѹ҆би́вшагѡ, пови́нна сꙋ́ща ѹ҆бїе́нїю: сме́ртїю бо ѹ҆́мретъ:
нижѐ да во́змете и҆скꙋ́па ѹ҆бѣжа́нїѧ во гра́дъ ѹ҆бѣ́жища, да па́ки живе́тъ на землѝ, до́ндеже ѹ҆́мретъ жре́цъ вели́кїй.
И҆ да не ѹ҆бїе́те землѝ, на не́йже вы̀ ѡ҆бита́ете: кро́вь бо сїѧ̀ ѹ҆бива́етъ зе́млю, и҆ не ѡ҆чи́ститсѧ землѧ̀ ѿ кро́ве пролїѧ́нныѧ на не́й, но то́кмѡ кро́вїю пролива́ющаго:Gen 9:6; 1Ki 2:31; Mat 26:52
и҆ да не ѡ҆сквернитѐ землѝ, на не́йже живетѐ, на не́йже а҆́зъ вселѧ́юсѧ посредѣ̀ ва́съ: а҆́зъ бо є҆́смь гдⷭ҇ь вселѧ́ѧйсѧ посредѣ̀ сынѡ́въ і҆и҃левыхъ.Exo 29:45; 1Ki 6:13