Пс Псалтыр, псалом Псалтыр, псалом 144
Хвала Давідава.
Хваліць буду Цябе, Божа мой, Цару мой, і дабраслаўляць імя Тваё векі вечныя.Пс 46:3
Кожны дзень дабраслаўляць буду Цябе і хваліць імя Тваё векі вечныя.
Вялікі Гасподзь і праслаўлены вельмі, і веліч Ягоная недасьледная.Ёў 5:9; Ёў 36:26
Род у род будзе хваліць дзеі Твае і абвяшчаць магутнасьць Тваю.Дрз 4:10; Дрз 6:7
А я буду разважаць пра высокую славу велічы Тваёй і пра высокія чыны дзеі Твае.
Буду казаць пра моц страшных дзеяў Тваіх, і я буду абвяшчаць веліч Тваю.
Будуць абвяшчаць памяць вялікай даброці Тваёй і распавядацьмуць праўду Тваю.
Шчодры і міласэрны Гасподзь, вельмі цярплівы і вельмі мілажальны.Вых 34:6; Пс 85:15
Добры Гасподзь да ўсіх, і шчадроты Ягоныя на ўсіх дзеях Ягоных.2Пётр 3:9; 1Цім 2:4
Хай славяць Цябе, Госпадзе, усе дзеі Твае, і хай дабраслаўляюць Цябе сьвятыя Твае;
хай прапаведуюць славу царства Твайго і распавядаюць пра магутнасьць Тваю,Пс 46:9
каб перадаць сынам чалавечым пра моц Тваю і пра слаўную веліч царства Твайго.
Царства Тваё - царства ўсіх вякоў, і валадарства Тваё - ва ўсе роды.Пс 145:10; Дан 4:32; Дан 6:26
Гасподзь падтрымлівае ўсіх, хто падае, і падымае ўсіх, хто ўпаў.Пс 36:24
Вочы ўсіх спадзяюцца на Цябе, і Ты даеш ім ежу сваім часам;Пс 103:27
адкрываеш руку Тваю і корміш усіх жывых па добрай волі.Ёў 39:2
Праведны Гасподзь на ўсіх дарогах Сваіх і добры ва ўсіх дзеях Сваіх.
Блізкі Гасподзь да ўсіх, хто кліча Яго, да ўсіх, хто кліча Яго ў праўдзе.Дрз 4:7
Жаданьне тых, што баяцца Яго, Ён выконвае, скаргі іхнія чуе, і ратуе іх.Пс 146:11
Асланяе Гасподзь усіх, хто любіць Яго, а ўсіх бязбожных зьнішчае.1Цар 2:9
Вусны мае вымавяць хвалу Гасподнюю, і хай дабраслаўляе ўсякае цела сьвятое імя Ягонае вечна.